គោលនយោបាយភូមិ ឃុំ មាន​សុវត្ថិភាព ក្នុង​ចំណោម​​ប្រធាន​បទ​សំខាន់​មួយ​​ក្នុងសន្និបាតបូកសរុបការងារឆ្នាំ ២០២៥ រដ្ឋបាលខេត្តបាត់ដំបង

គោលនយោបាយភូមិ ឃុំ សង្កាត់មានសុវត្ថិភាព ជាប្រធានបទលេចធ្លោមួយ ក្នុងចំណោមប្រធានបទចំនួន ៥ សំខាន់ៗត្រូវបានលើកមកធ្វើការពិភាក្សាដេញដោល និងបន្តអនុវត្ត ក្នុងសន្និបាតបូកសរុបលទ្ធផលការងារប្រចាំឆ្នាំ២០២៥ និងលើកទិសដៅ ការងារឆ្នាំ២០២៦ របស់រដ្ឋបាលខេត្តបាត់ដំបង រយៈពេលពីរថ្ងៃ ចាប់ពីថ្ងៃទី១៩ ដល់ថ្ងៃទី២០ ខែមករា ឆ្នាំ២០២៦។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រធានបទសំខាន់ៗទាំង ៥ រួមមាន ១.ការអនុវត្តគោលនយោបាយភូមិ ឃុំ សង្កាត់មានសុវត្ថិភាព ផ្តោតលើវិស័យសន្តិសុខ។ ២.ការគ្រប់គ្រងបរិស្ថាន (សំរាម សំណល់រឹង-រាវ ការដុតសំរាម និងការដុតព្រៃ) និងការបង្កឡេងរំខាន។ ៣.ការអភិវឌ្ឍន៍មូលដ្ឋាន កែលម្អទីប្រជុំជនក្រុង ស្រុក ឃុំ សង្កាត់។ ៤.ការស្តារ និងលើកកម្ពស់ជីវភាពគ្រួសារប្រជាពលរដ្ឋ និងទី ៥.ការដោះស្រាយវិវាទក្រៅប្រព័ន្ធតុលាការ ជាដើម។

នៅក្នុងអង្គសន្និបាតនៅព្រឹកថ្ងៃទី ២០ ខែមករា ឆ្នាំ២០២៦ លោក សុខ លូ បានជំរុញដល់អាជ្ញាធរ និងកងកម្លាំងទាំងអស់ ត្រូវរួមគ្នាប្រកបដោយឆន្ទៈពិតប្រាកដ ក្នុងការប្ដេជ្ញាបង្រ្កាបនិងលុបបំបាត់ឧក្រិដ្ឋកម្មឆបោកតាមប្រព័ន្ធបច្ចេកវិទ្យាដែលបង្កគ្រោះថ្នាក់ធ្ងន់ធ្ងរចំពោះសង្គមជាតិ។

ទន្ទឹមនឹងនេះក្នុងនាមអាជ្ញាធរខេត្តនិងកម្លាំងគ្រប់លំដាប់ថ្នាក់ ត្រូវពង្រឹងការជំរុញការអនុវត្តន៍គោលនយោបាយភូមិ ឃុំ សង្កាត់មានសុវត្ថិភាព បង្រ្កាបល្បែងស៊ីសង គ្រឿងញៀន ក្មេងទំនើង និង បទល្មើសគ្រប់ប្រភេទ ឲ្យកាន់តែមានប្រសិទ្ធភាពខ្ពស់បំផុត៕

អត្ថបទ÷សៅ សារិទ្ធ