ខ្សែប្រយុទ្ធ Jonata ជាកីឡាករបរទេសម្នាក់គត់ ធ្លាប់ឈ្នះស្បែកជើងមាសក្នុងពានសម្តេចតេជោ

អតីតខ្សែប្រយុទ្ធរបស់ក្រុមបាល់ទាត់ វិសាខា កីឡាករសញ្ជាតិ ប្រេស៊ីល Jonata បានជាប់ជាកីឡាករបរទេសម្នាក់គត់ ដែលធ្លាប់មានប្រវត្តិឈ្នះស្បែកជើងមាសក្នុងពានរង្វាន់សម្តេចអគ្គមហាសេនាបតីតេជោ ហ៊ុន សែន។

ការប្រកួតពានសម្តេចតេជោថ្នាក់ជាតិ បានរៀបចំឡើងចំនួន ១៨ លើកហើយ ខណៈនៅរដូវកាល ២០២៥-២០២៦ គឺជាលើកទី ១៩។ ចាប់តាំងពីពានលំដាប់ទី ២ នេះបង្កើតឡើង គឺពុំធ្លាប់មានកីឡាករបរទេសណាមានប្រវត្តិឈ្នះស្បែកជើងមាសឡើយ ក្រៅតែអំពីកីឡាករ Jonata។

មូលហេតុចម្បង គឺដោយសារពានសម្តេចតេជោ មុនរដូវកាល ២០២៣-២០២៤ ពុំអនុញ្ញាតឱ្យប្រើកីឡាករបរទេសឡើយ។ រហូតមកដល់រដូវកាល ២០២៣-២០២៤ ទើបគណៈកម្មការរៀបចំការប្រកួតសម្រេចអនុញ្ញាតឱ្យក្រុមនីមួយៗ ប្រើប្រាស់កីឡាករបរទេសជាលើកដំបូង និងរហូតមកដល់បច្ចុប្បន្ន។

ទោះបីជាពាននេះអនុញ្ញាតឱ្យប្រើកីឡាករបរទេស ២ រដូវកាលរួចមកហើយ ប៉ុន្តែមានតែ Jonata ម្នាក់គត់ ដែលត្រូវបានចារជាកីឡាករបរទេសធ្លាប់ឈ្នះស្បែកជើងមាសក្នុងពានសម្តេចតេជោ។ កីឡាករប្រេស៊ីលវ័យ ២៨ ឆ្នាំ បានឈ្នះនៅរដូវកាល ២០២៣-២០២៤ ជាមួយ វិសាខា ដោយពេលនោះរូបគេរកបាន ៦ គ្រាប់។

គួរឱ្យដឹង ថា ក្នុងពានសម្តេចតេជោបច្ចុប្បន្ន អតីតខ្សែប្រយុទ្ធក្រុម ព្រះខ័នរាជស្វាយរៀង និងបឹងកេត លោកឃួន ឡាបូរ៉ាវី កំពុងកាន់កាប់តំណែងជាកីឡាករឈ្នះស្បែកមាសច្រើនជាងគេក្នុងពានសម្តេចតេជោ ដោយបានឈ្នះសរុបចំនួន ៤ លើក៕

អត្ថបទ៖ សេម កុសល