អាជ្ញាធរខណ្ឌមានជ័យ ចុះរុះរេីតូបអាជីវករដែលសង់រំលោភផ្លូវសាធារណៈក្រោយជូនដំណឹង៣ថ្ងៃមិនអនុវត្តតាម

ភ្នំពេញ ៖​ ក្រោយពីទុករយៈពេល៣ថ្ងៃ ក្នុងការជូនដំណឹងដល់បងប្អូនអាជីវករ លក់ដូរ ដែលសាងសង់តូបរំលោភមកលេីផ្លូវសាធារណៈ​ ផ្លូវបេតុង​ មុខអគ្គិសនីកម្ពុជា​ ដែលស្ថិតនៅក្នុង​ ភូមិដំណាក់ធំ២ សង្កាត់ស្ទឹងមានជ័យទី៣​ ខណ្ឌមានជ័យ​ នៅរសៀលថ្ងៃទី២២​ ខែមករា​ ឆ្នាំ២០២៦នេះ​ លោក​ សេង​ គន្ធ​ អភិបាលនៃគណៈអភិបាលខណ្ឌមានជ័យ​ បានដឹកនាំកម្លាំងចុះមករុះរេីកាត់ចេញដេីម្បីរក្សាចំណែកផ្លូវថ្មេីរជេីង។ 

អាជ្ញាធរបាលឱ្យដឹងថា​ ដោយអនុវត្ត​ តាមការណែនាំរបស់ លោក ឃួង ស្រេង អភិបាលក្រុង រាជធានីភ្នំពេញ លោក សេង គន្ធ អភិបាល នៃគណៈអភិបាលខណ្ឌមានជ័យ បានដឹកនាំមន្ត្រីចុះណែនាំជូនដំណឹងដល់អាជីវករដែលយកចំណីផ្លូវសាធារណៈមកដាក់តាំងសម្ភារៈលក់ដូរជាកម្មសិទ្ធិផ្ទាល់ខ្លួន បង្កឲ្យបាត់បង់ចិញ្ចើមផ្លូវសាធារណៈរបស់រដ្ឋ​ និងទុករយៈពេល៣ថ្ងៃដេីម្បីឱ្យបងប្អូនអាជីវកររុះរេីចេញ​ដោយខ្លួនឯង​ និងមិនមានការលេីកលែងឡេីយ។ 

អាជ្ញាធរបន្តថា​ ដោយសារតែដល់ថ្ងៃកំណត់​ ក្រុមបងប្អូនអាជីវករនៅតែមិនអនុវត្តតាមសេចក្តីជូនដំណឹង​ ទេីបលោក​ សេង​ គន្ធ​ អភិបាលនៃគណៈអភិបាលខណ្ឌ​ ដឹកនាំកម្លាំងចុះរុះរេី​ កាត់ចេញតែម្តង។

បន្ថែមលើនេះ អាជ្ញាធរ ក៏បាន អរគុណដល់ប្រជាពលរដ្ឋ និង អាជីវករលក់ដូរ ដែលបានចូលរួមសហការ៕

ដោយ ៖ សុខា