ព័ត៌មានជាតិ

ពលរដ្ឋភូមិ ៣ សង្កាត់ស្មាច់មានជ័យ ទទួលបានផ្លូវបេតុងថ្មី ១ ខ្សែ គ្រាផ្លូវចាស់រងការខូចខាតខ្លាំង

បានផុស

៣ ខែ មុន

នៅ

ថ្ងៃសុក្រ ២៣ មករា ២០២៦

ដោយ

ប្រជាពលរដ្ឋរស់នៅក្នុងភូមិ ៣ សង្កាត់ស្មាច់មានជ័យ ក្រុងខេមរភូមិន្ទ ផ្តើមទទួលបានផ្លូវបេតុងថ្មី ១ ខ្សែ ប្រវែងជិត ១ គីឡូម៉ែត្រ គ្រាផ្លូវចាស់បច្ចុប្បន្នរងការខូចខាតលំបាកធ្វើដំណើរ។ ទន្ទឹមនោះ ពលរដ្ឋ ក៏ស្នើអាជ្ញាធរ ជួយស្តារប្រឡាយធម្មជាតិ ដើម្បីរំដោះការជន់លិចរដូវវស្សា។

ផ្លូវបេតុងដែលរងការខូចខាតរហូតដល់ឡើងចេញសរសៃដែក កំពុងត្រូវបានស្ថាបនាថ្មីជំនួសវិញ ដើម្បីបម្រើការធ្វើដំណើរទៅមកប្រកបដោយសុវត្ថិភាព ក្រោមគម្រោងអភិវឌ្ឍន៍របស់រដ្ឋបាលខេត្តកោះកុង សម្រាប់ឆ្នាំ ២០២៦ នេះ។

អ្នកស្រី ធារី និងលោក សុខ សារឹម ជាពលរដ្ឋភូមិ ៣ សង្កាត់ស្មាច់មានជ័យ បានលើកឡើងកាលពីថ្ងៃទី ២២ ខែមករា ឆ្នាំ ២០២៦ ថា បច្ចុប្បន្ន ផ្លូវបេតុងមុខផ្ទះរបស់ពួកគាត់រងការខូចខាតខ្លាំងណាស់រហូតដល់ចេញសរសៃដែកទៀតផង ដែលងាយប្រឈមគ្រោះថ្នាក់ពេលធ្វើដំណើរម្តងៗ ប៉ុន្តែពេលនេះបានឃើញរដ្ឋបាលខេត្តកោះកុង ចុះមកកសាងផ្លូវបេតុងថ្មី ប្រវែងជិត ១ គីឡូម៉ែត្រ នេះ គឺត្រេកអរយ៉ាងខ្លាំង ព្រោះបានផ្លូវស្អាតល្អ ងាយស្រួលចរាចរណ៍ លែងលំបាក មិនថាយប់ ឬថ្ងៃ នោះទេ។

តំណាងពលរដ្ឋ ក៏សូមថ្លែងអំណរអរគុណដល់ថ្នាក់ដឹកនាំខេត្ត និងមន្ទីរពាក់ព័ន្ធ ដែលយកចិត្តទុកដាក់កសាងផ្លូវបេតុងជូនពលរដ្ឋ ហើយពួកគាត់ជឿជាក់ថា ផ្លូវរងការខូចខាតដទៃទៀតក្នុងក្រុងខេមរភូមិន្ទ នឹងត្រូវជួសជុលកែលម្អឲ្យល្អប្រសើរដូចគ្នាដែរ។ ទោះយ៉ាងណា ពលរដ្ឋ ស្នើដល់អាជ្ញាធរពាក់ព័ន្ធ បន្តជួយស្តារប្រឡាយលូធម្មជាតិបន្ថែម មិនដូច្នេះទេ រដូវវស្សាអាចនឹងជន់លិច ថ្វីត្បិតបានផ្លូវបេតុងថ្មីល្អស្អាតក៏ដោយ។

លោក អ៊ូច ពន្លក នាយកទីចាត់ការផែនការ និងវិនិយោគរបស់រដ្ឋបាលខេត្ត បានឲ្យដឹងថា បេតុង ១ ខ្សែ កំពុងស្ថាបនានេះ មានប្រវែង ៩៨១ ម៉ែត្រ និងទទឹង ៧ ម៉ែត្រ អមដោយការដាក់ប្រព័ន្ធលូមុខកាត់ថ្មីប្រវែង ៦៧២ ម៉ែត្រ ទៀតផង។ គម្រោងស្ថាបនាផ្លូវបេតុងនេះស្ថិតនៅក្រោមមូលនិធិអភិវឌ្ឍន៍របស់សាលាខេត្ត ដើម្បីលើកកម្ពស់សោភ័ណភាព និងសុវត្ថិភាពរាល់ការធ្វើដំណើរជូនពលរដ្ឋក្នុងមូលដ្ឋាន។

លោក អ៊ូច ពន្លក អះអាងដែរថា គម្រោងនេះ នឹងបញ្ចប់នាពេលឆាប់ៗ ខាងមុខនេះ សំដៅធ្វើយ៉ាងណាអាចឲ្យប្រជាពលរដ្ឋ ក៏ដូចជាអ្នកទេសចរ ឆាប់បានធ្វើដំណើរងាយស្រួល។ ខណៈមានការស្ថាបនាផ្លូវខាងលើ រដ្ឋបាលខេត្តកោះកុង ក៏កំពុងតែអ៊ុតផ្លូវកៅស៊ូចំនួន ៤ ខ្សែ បន្ថែមផ្សេងទៀត ក្នុងក្រុងខេមរភូមិន្ទ៕

អត្ថបទ ៖ សិរីវឌ្ឍនៈ