លោក​ត្រាំ អះអាងពីអាវុធសម្ងាត់ម្យ៉ាង ដែលជួយក្នុងការចាប់ខ្លួនលោកម៉ាឌូរ៉ូ

ប្រធានាធិបតីអាមេរិក លោក ដូណាល់ ត្រាំ បានទម្លាយ​ឲ្យ​ដឹងពីអត្ថិភាពនៃឧបករណ៍យោធាសម្ងាត់មួយដែលលោកហៅថា «Discombobulator» ដោយអះអាងថា វាបានដើរតួនាទីយ៉ាងសំខាន់ក្នុងប្រតិបត្តិការឆ្មក់ចូលចាប់ខ្លួនមេដឹកនាំវ៉េណេស៊ុយអេឡា លោក នីកូឡាស ម៉ាឌូរ៉ូ កាលពីថ្ងៃទី៣ខែមករា​ឆ្នាំ​២០២៦។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងបទសម្ភាសន៍ជាមួយកាសែត New York Post កាល​ពី​ថ្ងៃ​ទី​២៤​មករា​ លោកត្រាំ បានអួតអាងថា បច្ចេកវិទ្យាដ៏អាថ៌កំបាំងនេះបានធ្វើ​ឲ្យ​ប្រព័ន្ធការពាររបស់វ៉េណេស៊ុយអេឡា លែងដំណើរការប្រកបដោយប្រសិទ្ធភាព ដោយរារាំងពួកគេមិន​ឲ្យ​បាញ់រ៉ុក្កែតដែលផលិតដោយរុស្ស៊ី និងចិន ខណៈដែលកងកម្លាំងអាមេរិកបានចូលទៅក្នុងទីក្រុងការ៉ាកាស។ ទោះបីជាលោកប្រធានាធិបតីបានបដិសេធផ្តល់ព័ត៌មានលម្អិតផ្នែកបច្ចេកទេស ដោយលើកឡើងពីស្ថានភាពសម្ងាត់នៃអាវុធនេះក៏ដោយ លោកបានបញ្ជាក់ថា វាបានធ្វើ​ឲ្យ​ប្រព័ន្ធសត្រូវបរាជ័យក្នុងគ្រាដ៏សំខាន់ ដែលអនុញ្ញាត​ឲ្យ​ប្រតិបត្តិការដ៏មានហានិភ័យខ្ពស់នេះប្រព្រឹត្តទៅដោយមិនមានការបាត់បង់ជីវិតទាហានអាមេរិកសូម្បី​ម្នាក់។

ការលើកឡើងរបស់លោកប្រធានាធិបតី គឺស្របទៅនឹងរបាយការណ៍ដ៏គួរ​ឲ្យ​តក់ស្លុតដែលកើតចេញពីប្រទេសវ៉េណេស៊ុយអេឡា ទាក់ទងនឹងការប្រើប្រាស់អាវុធអេឡិចត្រូនិក ឬអាវុធរលកសំឡេងកម្រិតខ្ពស់។ អ្នកនាំពាក្យសេតវិមាន លោកស្រី Karoline Leavitt កាលពីពេលថ្មីៗនេះ បានចែករំលែករបាយការណ៍ពីឆ្មាំវ៉េណេស៊ុយអេឡាម្នាក់ដែលមិនបញ្ចេញឈ្មោះ ដែលបានរៀបរាប់ពីការរងគ្រោះដោយ «រលកសំឡេងយ៉ាងខ្លាំង» ដែលបណ្តាលឲ្យទាហានរងសម្ពាធក្នុងខ្លួន ហូរឈាមតាមច្រមុះ និងក្អួតឈាម។ យោងតាមរបាយការណ៍ ការប្រើប្រាស់បច្ចេកវិទ្យានេះបានកើតឡើងមុនការវាយប្រហារយ៉ាងរហ័សដោយកងកម្លាំងប្រតិបត្តិការពិសេសរបស់អាមេរិក។ ឆ្មាំរូបនោះបានអះអាងថា អាវុធនេះមានប្រសិទ្ធភាពខ្លាំង រហូតដល់ធ្វើឲ្យភ្នាក់ងារសន្តិសុខរបស់លោកម៉ាឌូរ៉ូ រាប់រយនាក់បាត់បង់សមត្ថភាពប្រយុទ្ធ មិនអាចសូម្បីតែក្រោកឈរ ឬបាញ់តបតនឹងកងទ័ពអាមេរិកដែលកំពុងសម្រុកចូល។

ទោះបីជាក្រសួងការពារជាតិអាមេរិកមិនទាន់បានបញ្ជាក់ជាផ្លូវការអំពីការប្រើប្រាស់អាវុធរលកសំឡេង ឬអាវុធថាមពលក្នុង «ប្រតិបត្តិការ Absolute Resolve» ក៏ដោយ ក៏ក្រុមអ្នកវិភាគយោធាបានលើកឡើងថា «Discombobulator» អាចសំដៅលើកញ្ចប់ឧបករណ៍សង្គ្រាមអេឡិចត្រូនិកដ៏ទំនើប ដែលរៀបចំឡើងដើម្បីរំខានដល់ប្រព័ន្ធទំនាក់ទំនង និងឧបករណ៍ចាប់សញ្ញាការពារអាកាស។ ការចាប់ខ្លួនលោកម៉ាឌូរ៉ូ និងការបញ្ជូនលោកទៅកាន់ទីក្រុងញូវយ៉ក ដើម្បីប្រឈមមុខនឹងការចោទប្រកាន់ពីបទភេរវកម្មគ្រឿងញៀន បានបង្កឲ្យមានការជជែកដេញដោលជាសកលអំពីច្បាប់អន្តរជាតិ និងអធិបតេយ្យភាព។ ការអួតអាងជាសាធារណៈរបស់លោកត្រាំ អំពីអាវុធសម្ងាត់នេះ គឺជាសញ្ញាមួយបង្ហាញពីឧត្តមភាពយោធារបស់អាមេរិក ខណៈដែលក្រុមអ្នករិះគន់ និងមេដឹកនាំពិភពលោកបានសម្តែងការព្រួយបារម្ភអំពីផលប៉ះពាល់ផ្នែកសីលធម៌ និងច្បាប់នៃការប្រើប្រាស់បច្ចេកវិទ្យាពិសោធន៍បែបនេះនៅក្នុងការជ្រៀតជ្រែកបរទេស៕

ប្រែសម្រួល៖ ឈាង