Connect with us

ព័ត៌មានអន្ដរជាតិ

អ៊ីរ៉ង់ គំរាមកម្ទេចទីក្រុង តេអាវីវ មុនគេ បើអាមេរិក ហ៊ានវាយប្រហារខ្លួនមែន

បានផុស

នៅ

កាន់តែក្តៅហើយសភាពការណ៍នៅមជ្ឈិមបូព៌ាពេលនេះ ដែលមិនមែនត្រឹមអាមេរិកនិងអ៊ីរ៉ង់ប៉ុណ្ណោះទេ ពោលគឺអ៊ីស្រាអែល ក៏ស្ថិតក្នុងគោលដៅរបស់អ៊ីរ៉ង់ដែរ ដោយទីក្រុងតេហេរ៉ង់គំរាមថា ទីក្រុង តេអាវីវ នឹងក្លាយជាគោលដៅទីមួយដែលខ្លួននឹងកម្ទេច បើអាមេរិក ហ៊ានវាយប្រហារខ្លួនមែន។

លោក Ali Shamkhani (រូបថត៖ Reuters)

ការព្រមាននេះគឺចេញពីមាត់ទីប្រឹក្សាមេដឹកនាំអ៊ីរ៉ង់ Ali Shamkhani ដែលប្រកាសកាលពីថ្ងៃពុធទី២៨ខែមករាឆ្នាំ២០២៦ថា៖ រាល់សកម្មភាពយោធាពីសំណាក់សហរដ្ឋអាមេរិក ទោះជាមានប្រភពចេញពីណា ឬមានទ្រង់ទ្រាយកម្រិតណាក៏ដោយ នោះនឹងត្រូវចាត់ទុកថាជាការប្រកាសសង្គ្រាមហើយ។ ការឆ្លើយតបនឹងធ្វើឡើងភ្លាមៗ ក្នុងទ្រង់ទ្រាយធំដែលមិនធ្លាប់មានពីមុនមក ជាពិសេសកំណត់គោលដៅចំបេះដូងនៃទីក្រុងតេអាវីវនិងអ្នកទាំងឡាយណាដែលគាំទ្រជនឈ្លានពានតែម្តង។

តាមការផ្សាយរបស់ AFP, នេះគឺជាការគំរាមកំហែងដោយផ្ទាល់ទៅលើអ៊ីស្រាអែល ដែលអ៊ីរ៉ង់ចាត់ទុកថាជាដៃជើងរបស់អាមេរិកនៅក្នុងតំបន់ ហើយចុះហេតុអ្វីបានជាអ៊ីរ៉ង់ នឹងបាញ់មីស៊ីលវាយប្រហារទីក្រុងតេអាវីវ?

ការវាយប្រហាររបស់អ៊ីរ៉ង់លើអ៊ីស្រាអែល កាលពីខែមិថុនាឆ្នាំ២០២៥ (រូបថត៖ Reuters)

ទីក្រុងតេអាវីវ គឺជាមជ្ឈមណ្ឌលសេដ្ឋកិច្ចនិងបច្ចេកវិទ្យារបស់អ៊ីស្រាអែល។ ម្យ៉ាង អ៊ីស្រាអែលគឺជាសម្ព័ន្ធមិត្តដ៏ជិតស្និទ្ធរបស់សហរដ្ឋអាមេរិក ដែលទទួលបានការគាំទ្រយ៉ាងខ្លាំងក្លាក្នុងអំឡុងពេលមានជម្លោះជាមួយអ៊ីរ៉ង់ កាលពីខែមិថុនាឆ្នាំ២០២៥ កន្លងទៅ។

ការគំរាមនេះកើតឡើងស្របពេលប្រធានាធិបតីអាមេរិក ដូណាល់ ត្រាំ ព្រមានថា អ៊ីរ៉ង់ ជិតអស់ពេលហើយក្នុងការចរចាលើកម្មវិធីនុយក្លេអ៊ែររបស់ខ្លួន។

លោក ដូណាល់ ត្រាំ (រូបថត៖ Reuters)

លោកត្រាំបានបង្ហោះលើបណ្តាញសង្គម Truth Social កាលពីថ្ងៃពុធទី២៨ខែមករាឆ្នាំ២០២៦ថា ក្រុមនាវាចម្បាំងអាមេរិកដែលលោកបានបញ្ជាឲ្យទៅកាន់តំបន់មជ្ឈិមបូព៌ា ដឹកនាំដោយនាវាផ្ទុកយន្តហោះ USS Abraham Lincoln គឺត្រៀមខ្លួនរួចជាស្រេច មានឆន្ទៈនិងអាចបំពេញបេសកកម្មរបស់ខ្លួនបានយ៉ាងឆាប់រហ័ស ទាំងល្បឿននិងកម្លាំង ប្រសិនបើចាំបាច់។

លោកសរសេរថា៖ «សង្ឃឹមថា អ៊ីរ៉ង់នឹងប្រញាប់មកកាន់តុចរចា ហើយនិយាយគ្នាលើកិច្ចព្រមព្រៀងមួយដែលត្រឹមត្រូវនិងយុត្តិធម៌ គឺមិនមានអាវុធនុយក្លេអ៊ែរ ដែលជាកិច្ចព្រមព្រៀងដ៏ល្អសម្រាប់គ្រប់ភាគី»។

ដោយសំដៅទៅការវាយប្រហាររបស់សហរដ្ឋអាមេរិក លើទីតាំងនុយក្លេអ៊ែរអ៊ីរ៉ង់កាលពីខែមិថុនាឆ្នាំមុន, ប្រធានាធិបតីអាមេរិកគំរាមថា៖ «ការវាយប្រហារលើកក្រោយនឹងកាន់តែធ្ងន់ជាងនេះទៅទៀត! កុំបណ្តោយឲ្យរឿងនោះកើតឡើងជាថ្មីឲ្យសោះ»៕

អត្ថបទ៖ សុខ សុវណ្ណ

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត
Helistar Cambodia - Helicopter Charter Services
Sokimex Investment Group
Sokha Hotels

ព័ត៌មានពេញនិយម