មុនបោះឆ្នោត ត្រាំសរសើរលោកស្រី Takaichi ជា «មេដឹកនាំដ៏រឹងមាំ មានអំណាច និងឈ្លាសវៃ»

ប្រធានាធិបតីសហរដ្ឋអាមេរិក លោក ដូណាល់ ត្រាំ កាលពីថ្ងៃព្រហស្បតិ៍ទី៥ខែកុម្ភៈ បានលើកសរសើរនាយករដ្ឋមន្ត្រីជប៉ុន លោកស្រី Sanae Takaichi ថាជា «មេដឹកនាំដ៏រឹងមាំ មានអំណាច និងឈ្លាសវៃបំផុត» ខណៈដែលទីក្រុងតូក្យូនឹងត្រូវរៀបចំការបោះឆ្នោតដ៏សំខាន់មួយនៅឯចុងសប្តាហ៍នេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការចេញផ្យាយពីភ្នាក់ងារ Reuters លោកត្រាំបានបង្ហាញនូវការគាំទ្រទាំងស្រុងលើ Takaichi ជាសាធារណៈ មុនការបោះឆ្នោតនៅថ្ងៃអាទិត្យ ដែលមានសារៈសំខាន់សម្រាប់លោកស្រី និងគណបក្សប្រជាធិបតេយ្យសេរីដែលកំពុងកាន់អំណាចរបស់លោកស្រី ខណៈដែលពួកគេកំពុងស្វែងរកការបង្កើនឋានៈនៅក្នុងសភាជាន់ទាបនៃសភាជប៉ុន។

លោកបានសរសេរនៅនៅលើប្រព័ន្ធផ្សព្វផ្សាយសង្គម Truth Social ថា «បន្ថែមពីលើសន្តិសុខជាតិ សហរដ្ឋអាមេរិក និងជប៉ុន បានធ្វើការយ៉ាងជិតស្និទ្ធជាមួយគ្នា លើការធ្វើកិច្ចព្រមព្រៀងពាណិជ្ជកម្មដ៏សំខាន់មួយ ដែលផ្តល់ផលប្រយោជន៍យ៉ាងខ្លាំងដល់ប្រទេសទាំងពីរ។ នាយករដ្ឋមន្ត្រី Takaichi គឺជាមនុស្សម្នាក់ដែលសមនឹងទទួលបានការទទួលស្គាល់ដ៏មានឥទ្ធិពលចំពោះការងារដែលលោកស្រី និងសម្ព័ន្ធភាពរបស់លោកស្រីកំពុងធ្វើ»។

នៅក្នុងសារដដែលនោះ មេដឹកនាំអាមេរិកបានបញ្ចាក់បន្ថែមថា «ក្នុងនាមជាប្រធានាធិបតីនៃសហរដ្ឋអាមេរិក វាជាកិត្តិយសរបស់ខ្ញុំក្នុងការផ្តល់ការគាំទ្រពេញលេញ និងទាំងស្រុងចំពោះលោកស្រី និងអ្វីដែលសម្ព័ន្ធភាពដ៏គួរឲ្យគោរពរបស់លោកស្រីកំពុងតំណាង។ ដូច្នេះ Takaichi នឹងមិនធ្វើឲ្យប្រជាជនជប៉ុនខកចិត្តឡើយ! សូមជូនពរឲ្យអ្នកមានសំណាងល្អក្នុងការបោះឆ្នោតថ្ងៃអាទិត្យដែលជាថ្ងៃដ៏សំខាន់របស់អ្នក»។

មិនតែប៉ុណ្ណោះ លោកហាក់ទន្ទឹងរង់ចាំស្វាគមន៍លោកស្រី Takaichi មកកាន់សេតវិមាន នៅថ្ងៃទី ១៩ ខែមីនាខាងមុខនេះ ដោយមិនភ្លេចលើកឡើងអំពីដំណើរទស្សនកិច្ចដ៏ស្អិតរមួតរបស់ខ្លួនទៅកាន់ប្រទេសជប៉ុន កាលពីឆ្នាំមុនឡើយ៕

អត្ថបទ៖ សាង ស្រីល័ក្ខ

ចុចអានខាងក្រោមនេះ៖

ព្រិលធ្លាក់ខ្លាំងគំរាមកំហែងដល់ចំនួនអ្នកទៅបោះឆ្នោតនៅ​ជប៉ុន​ នាចុង​សប្ដាហ៍​នេះ