ព័ត៌មានអន្ដរជាតិ

ជប៉ុនរំសាយពិធីបុណ្យរដូវស្លឹកឈើជ្រុះឆ្នាំនេះ ព្រោះកំណើនអ្នកចូលរួមច្រើនពេក លំបាកគ្រប់គ្រង

បានផុស

៣ ខែ មុន

នៅ

ថ្ងៃសុក្រ ៦ កុម្ភៈ ២០២៦

ដោយ

អាជ្ញាធរជប៉ុនក្នុងក្រុង Fujiyoshida ក្បែរភ្នំ Fuji បានរំសាយចោលពិធីបុណ្យរដូវផ្ការីកឆ្នាំនេះ ដោយសារតែចំនួនភ្ញៀវទេសចរកើនឡើងច្រើនហួសហេតុ ជាពិសេសប្រជាជនក្នុងស្រុកមិនអាចគ្រប់គ្រងបាន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាម ABC News, ផ្សាយនៅថ្ងៃទី៥ ខែកុម្ភៈនេះ ការហូរចូលនៃអ្នកទេសចរទៅកាន់ទីក្រុង Fujiyoshida នាំឱ្យមានការកកស្ទះចរាចរណ៍ខ្លាំង ការទុកដាក់សំរាមមិនបានល្អ ខណៈអ្នកស្រុកខ្លះលើកឡើងថា ខ្លួនធ្លាប់ទទួលបទពិសោធន៍ដែលអ្នកទេសចរ បើកទ្វារផ្ទះរបស់ពួកគេដោយគ្មានការអនុញ្ញាត ប្រើប្រាស់បន្ទប់ទឹក ការទុកដាក់សំរាមមិនបានល្អ និងបន្ទោរបង់ក្នុងទីធ្លាឯកជន ដែលនាំឱ្យមានភាពច្របូកច្របល់។

គួរឱ្យដឹងថា តំបន់នេះគឺជាគោលដៅទេសចរណ៍ដ៏ពេញនិយមមួយក្នុងរដូវផ្ការីក ដោយសារតែដើមឈើ cherry ដ៏ល្បីល្បាញលើពិភពលោកក្នុងប្រទេសនេះ ដល់រដូវកាលផ្ការីក ជាពិសេសអាចគយគន់ភ្នំ Fuji ពីផ្ទៃខាងក្រោយបាន។

យ៉ាងណាទេសភាពដ៏ស្រស់ស្អាតរបស់ក្រុង Fujiyoshida បានគំរាមកំហែងដល់ជីវិតរស់នៅ របស់ពលរដ្ឋក្នុងតំបន់។

ចំណែក អភិបាលក្រុង Fujiyoshida លោក Shigeru Horiuchi បានឱ្យដឹងថា៖ «យើងមានអារម្មណ៍ថារាងមានសម្ពាធ»។

លោកបានលើកឡើងក្នុងសេចក្តីប្រកាសកាលពីថ្ងៃអង្គារថា៖«ដើម្បីការពារសេចក្តីថ្លៃថ្នូរ និងបរិយាកាសរស់នៅរបស់ប្រជាពលរដ្ឋក្នុងតំបន់ យើងសម្រេចចិត្តរំសាយពិធីបុណ្យដែលមានអាយុ ១០ឆ្នាំ នេះហើយ»។

មិនតែប៉ុណ្ណោះ ក្នុងឆ្នាំ ២០១៦ អាជ្ញាធរក្នុងក្រុង Fujiyoshida បានចាប់ផ្តើមរៀបចំព្រឹត្តិការណ៍ប្រចាំឆ្នាំ នៅឧទ្យាន Arakurayama Sengen ជាមួយក្តីសង្ឃឹមខ្ពស់ ក្នុងការបង្កើនភាពទាក់ទាញនៅតំបន់នេះ និងបង្កើនចំនួនភ្ញៀវទេសចរតាមរយៈបង្កើតបរិយាកាសដ៏រស់រវើកក្នុងតំបន់។

ទោះបីជាយ៉ាងណាក៏ដោយ អាជ្ញាធរបាននិយាយថា ចំនួនភ្ញៀវទេសចរក្នុងរយៈពេលប៉ុន្មានឆ្នាំចុងក្រោយនេះ បានកើនឡើងយ៉ាងខ្លាំង លើសពីសមត្ថភាពរបស់ទីក្រុងដែលអាចផ្ទុកបាន។ ជាពិសេសបណ្តាលឱ្យកកស្ទះចរាចរណ៍ និងបង្កផលប៉ះពាល់យ៉ាងធ្ងន់ធ្ងរដល់បរិស្ថានរស់នៅរបស់អ្នកស្រុក។

លើសពីនេះ អាជ្ញាធរក្រុង Fujiyoshida បន្ថែមនៅក្នុងសេចក្តីថ្លែងការណ៍មួយថា៖ « បច្ចុប្បន្នភ្ញៀវទេសចរច្រើន ដល់ទៅ ១០ ០០០នាក់ សម្រុកមកទីក្រុងនេះជាប្រចាំក្នុងរដូវផ្ការីក»។ ការកើនឡើងនេះ គឺ ដោយសារតែកត្តាប្រាក់យ៉េនចុះថោក និងការផ្ទុះប្រជាប្រិយភាពដោយប្រព័ន្ធផ្សព្វផ្សាយសង្គម»។

យ៉ាងណា ទោះបីជាពិធីបុណ្យនេះមិនបន្តទៅមុខក៏ដោយ ក៏ទីក្រុងកំពុងរៀបចំ ឱ្យមានការកើនឡើងនៃចំនួនភ្ញៀវទេសចរ អំឡុងខែមេសា និងឧសភា ផងដែរ៕

ប្រែសម្រួល៖ ណឺ មិនា