ព័ត៌មានជាតិ

ពិធីបុណ្យវប្បធម៌ចិន-កម្ពុជា លើកកម្ពស់វប្បធម៌រួម និងពង្រឹងមិត្តភាពទ្វេភាគី

បានផុស

៣ ខែ មុន

នៅ

ថ្ងៃចន្ទ ៩ កុម្ភៈ ២០២៦

ដោយ

សមាគមសម្ព័ន្ធខ្មែរចិននៅកម្ពុជា បានរៀបចំពិធីបុណ្យវប្បធម៌ចិន-កម្ពុជា ដើម្បីបង្ហាញពីការចងចាំវប្បធម៌រួមគ្នា លើកកម្ពស់ការអភិវឌ្ឍកម្ពុជា ពង្រឹងមិត្តភាពចិន-កម្ពុជា និងជំរុញឱ្យយុវជនរួបរួមគ្នាកាន់តែខ្លាំង ដើម្បីរួមចំណែកដល់ការអភិវឌ្ឍសហគមន៍ចិន និងទំនាក់ទំនងមិត្តភាពរវាងប្រទេសទាំងពីរ។

ពិធីបុណ្យនេះប្រារព្ធឡើងរយៈពេល ៣ ថ្ងៃ ចាប់ពីថ្ងៃទី ៦ ដល់ថ្ងៃទី ៨ ខែកុម្ភៈ ឆ្នាំ ២០២៦ នៅបុរីរុងរឿង វិថីរុងរឿង ១ សង្កាត់ព្រៃកលាប ខណ្ឌជ្រោយចង្វា រាជធានីភ្នំពេញ ក្រោមអធិបតីភាព ឯកឧត្តម ជាំង ណាន (JIANG Nan) ភារធារីស្ថានទូតចិនប្រចាំកម្ពុជា លោកអ្នកឧកញ៉ា ពុង ឃាវសែ ប្រធានសមាគមសម្ព័ន្ធខ្មែរចិននៅកម្ពុជា និងឧកញ៉ា ដួង តិច អនុប្រធានសមាគម និងជាប្រធានក្រុមយុវជន នៃសមាគមសម្ព័ន្ធចិន-ខ្មែរនៅកម្ពុជា។

ក្នុងពិធីបើក ឧកញ៉ា ដួង តិច បានថ្លែងសុន្ទរកថា សម្តែងការដឹងគុណ និងជូនពរឆ្នាំថ្មីទៅកាន់ស្ថានទូតចិន ប្រធានសមាគម និងភ្ញៀវកិត្តិយសទាំងអស់។ លោកបានរំលឹកពីសកម្មភាពរបស់ក្រុមយុវជន ក្នុងការបង្រួបបង្រួមសហគមន៍ចិន ការងារសប្បុរសធម៌ និងការផ្លាស់ប្តូរអាជីវកម្ម ព្រមទាំងអរគុណស្ថានទូតចិនដែលអនុម័តការប្រើប្រាស់ម៉ាក “រីករាយបុណ្យចូលឆ្នាំចិន”។ លោកក៏បានបង្ហាញក្តីសង្ឃឹមថា ក្រុមយុវជន នឹងបន្តរួមចំណែកកាន់តែច្រើនក្នុងការអភិវឌ្ឍសហគមន៍ និងមិត្តភាពចិន-កម្ពុជា។

លោកអ្នកឧកញ៉ា លី ឃុនថៃ ប្រធានប្តូរវេនសមាគមសម្ព័ន្ធខ្មែរចិននៅកម្ពុជា បានថ្លែងអំណរគុណចំពោះការគាំទ្រពីគ្រប់វិស័យ និងបានបញ្ជាក់ថា ក្នុងពិធីបុណ្យរយៈពេល ៣ ថ្ងៃនេះ មានស្តង់តាំងពិព័រណ៍ប្រមាណ ១២០ ស្តង់ ដាក់បង្ហាញផលិតផលក្រុមហ៊ុនសមាជិក មុខម្ហូបពិសេសកម្ពុជា និងទំនិញអន្តរជាតិ ព្រមទាំងមានបទពិសោធធ្វើម្ហូប និងការសម្តែងវប្បធម៌ជាច្រើន។ លោកក៏បានលើកឡើងពីតួនាទីយុវជនចិននៅក្រៅប្រទេស ក្នុងការអភិរក្សវប្បធម៌ និងចែករំលែកបទពិសោធប្រើវ៉ែនតា AI របស់ចិន ដើម្បីរៀបចំសុន្ទរកថា បង្ហាញពីស្មារតីបើកចំហ និងច្នៃប្រឌិត។

លោកអ្នកឧកញ៉ា ពុង ឃាវសែ ប្រធានសមាគមសម្ព័ន្ធខ្មែរចិននៅកម្ពុជា បានថ្លែងស្វាគមន៍ និងជូនពរឆ្នាំថ្មីដល់ភ្ញៀវទាំងអស់ ដោយលើកឡើងថា ពិធីបុណ្យនិទាឃរដូវជានិមិត្តរូប នៃការជួបជុំ ក្តីសង្ឃឹម និងការចងចាំវប្បធម៌រួម។ លោកបានបញ្ជាក់ពីកិច្ចខិតខំប្រឹងប្រែងរបស់សមាគមក្នុងការបម្រើសហគមន៍ចិន លើកកម្ពស់ការអភិវឌ្ឍកម្ពុជា និងពង្រឹងមិត្តភាពចិន-កម្ពុជា ព្រមទាំងសរសើរក្រុមយុវជនដែលបានរៀបចំព្រឹត្តិការណ៍នេះដោយជោគជ័យ។

ឯកឧត្តម ជាំង ណាន ភារធារីស្ថានទូតចិនប្រចាំកម្ពុជា បានផ្ញើសារជូនពរថ្ងៃឈប់សម្រាក និងសម្តែងការគោរពខ្ពស់ចំពោះការងាររបស់សមាគមសម្ព័ន្ធខ្មែរចិននៅកម្ពុជា។ លោកបានពន្យល់អំពីសារៈសំខាន់ នៃពិធីបុណ្យនិទាឃរដូវ ដែលជាបេតិកភណ្ឌវប្បធម៌អរូបីរបស់អង្គការយូណេស្កូ និងសរសើរតួនាទីសមាគម ក្នុងការបង្រួបបង្រួមសហគមន៍ចិននៅក្រៅប្រទេស បង្កើតសាលារៀនចិន និងលើកកម្ពស់មិត្តភាពប្រទេសទាំងពីរ។ លោកក៏បានរំលឹកពីសមិទ្ធផលកិច្ចសហប្រតិបត្តិការចិន-កម្ពុជា ឆ្នាំ ២០២៥ និងបញ្ជាក់ថា ស្ថានទូតចិន នឹងបន្តគាំទ្រជនជាតិចិននៅក្រៅប្រទេសជានិច្ច។

ពិធីបុណ្យនេះ ក៏មានការសម្តែងវប្បធម៌ជាច្រើន ដូចជា របាំសំណើរៀបការរបស់មូ គួយយីង ល្ខោនអូប៉េរ៉ាឆាវចូវ របាំក្បាច់គុនខ្មែរ ការសម្តែងស្តេចស្វា ល្ខោនអូប៉េរ៉ាស៊ីឈួនប្តូរមុខ និងរបាំទ្រង់ទ្រាយធំជាច្រើន ដើម្បីស្វាគមន៍ឆ្នាំថ្មី។ កម្មវិធីបានបញ្ចប់ដោយការសម្តែង “អបអរសាទរចូលឆ្នាំចិន” ដោយតំណាងក្រុមយុវជន។

ជារួម ព្រឹត្តិការណ៍នេះ បានប្រព្រឹត្តទៅក្នុងបរិយាកាសអធិកអធម៌ សប្បាយរីករាយ និងសុខដុមរមនា បង្ហាញពីភាពរស់រវើក និងសាមគ្គីភាពរបស់សមាគមសម្ព័ន្ធខ្មែរចិននៅកម្ពុជា និងបន្ថែមភាពភ្លឺស្វាងថ្មីដល់មិត្តភាពប្រពៃណីរវាងចិន និងកម្ពុជា៕

ដោយ ៖ សុខា