ជនជាតិអ៊ីរ៉ង់ម្នាក់សម្លាប់ខ្លួន សុំអង្វរលោកត្រាំ កុំឲ្យចរចាជាមួយរបបដឹកនាំអ៊ីរ៉ង់

ក្នុងទង្វើតវ៉ាដ៏រន្ធត់មួយ បុរសជនជាតិអ៊ីរ៉ង់ម្នាក់ឈ្មោះ Pouria Hamidi ត្រូវបានរាយការណ៍ថាបានធ្វើ​អត្តឃាត​កាលពីថ្ងៃអាទិត្យ​ទី​៨​ខែ​កុម្ភៈ​ឆ្នាំ​២០២៦ ក្រោយពីបានបញ្ចេញវីដេអូរយៈពេល១០​នាទី អង្វរប្រធានាធិបតីអាមេរិក ដូណាល់ ត្រាំ ឲ្យបោះបង់ចោលការចរចាការទូតជាមួយសាធារណរដ្ឋអ៊ីស្លាម។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាម​ការ​ផ្សាយ​របស់​សារព័ត៌មានIran International ដោយនិយាយចេញពីទីក្រុងកំពង់ផែ Bushehr លោក Hamidi បានចាប់ផ្តើមសារចុងក្រោយរបស់លោកដោយពាក្យដ៏ខ្លោចផ្សាថា «បើអ្នកកំពុងមើលវីដេអូនេះ មានន័យថាខ្ញុំលែងនៅទៀតហើយ» ដោយលោកចាត់ទុកការស្លាប់របស់លោកថាជាការព្យាយាមផ្តល់អត្ថន័យដល់ជីវិតដែលលោកមានអារម្មណ៍ថាគ្មានអនាគតក្រោមរបបដឹកនាំបច្ចុប្បន្ន។

ក្នុងវីដេអូដែលថតជាភាសាអង់គ្លេស លោក Hamidi បានអំពាវនាវដោយផ្ទាល់ទៅកាន់សេតវិមាន​ឲ្យ​បញ្ឈប់រាល់កិច្ចព្រមព្រៀងដែលអាចកើតមាន។ លោកបានអះអាងថា មនុស្សជាង ៤០ ០០០នាក់ត្រូវបានសម្លាប់ក្នុងការបង្ក្រាបនាពេលថ្មីៗនេះ ជាតួលេខមួយដែលលោកពណ៌នាថាជាការសម្លាប់រង្គាលធំជាងសង្គ្រាមនៅអ៊ុយក្រែន ឬហ្គាហ្សាទៅទៀត។ លោក Hamidi បាននិយាយថា «ការធ្វើកិច្ចព្រមព្រៀងជាមួយរបបនេះ គឺជាការក្បត់ចំពោះអ្នកដែលបានស្លាប់ទាំងអស់» ដោយលោកបន្ថែមថា យុវជនជំនាន់លោកកំពុងរត់ចេញ​ពីសាសនាអ៊ីស្លាម និងក្រុមភេរវករដែលជួលដោយរបបនេះ។ លោកបានសម្តែងនូវភាពអស់សង្ឃឹមយ៉ាងខ្លាំង ដោយលើកឡើងថា ប្រជាជនអ៊ីរ៉ង់ជាច្រើនជឿថាមានតែការជ្រៀតជ្រែកពីបរទេស ឬរដ្ឋាភិបាលអន្តរកាលដឹកនាំដោយព្រះអង្គម្ចាស់ Reza Pahlavi ប៉ុណ្ណោះ ទើបអាចនាំមកនូវការផ្លាស់ប្តូរ។

មរណភាពរបស់លោក Hamidi បានគូសបញ្ជាក់ពីភាពអស់សង្ឃឹមយ៉ាងខ្លាំងរបស់សកម្មជនអ៊ីរ៉ង់មួយចំនួន ខណៈដែលមានពាក្យចចាមអារ៉ាមអំពីកិច្ចព្រមព្រៀងថ្មីរវាងវ៉ាស៊ីនតោន និងតេហេរ៉ង់។ នៅក្នុងវីដេអូ លោក​ Hamidi បានជំរុញឲ្យក្រុមប្រឆាំងនៅក្រៅប្រទេសបញ្ឈប់ការឈ្លោះប្រកែកគ្នា ហើយរួបរួមគ្នា ខណៈដែលលោកបានពណ៌នាអំពីស្ថានភាពបច្ចុប្បន្នរបស់ប្រជាជនអ៊ីរ៉ង់ថាជា «អ្នកឯកោ» និងគ្មានសំឡេង។ ពាក្យសម្តីចុងក្រោយរបស់លោកជាភាសាពែរ្ស បានអំពាវនាវ​ឲ្យ​ជនរួមជាតិរបស់លោកជួយគ្នាទៅវិញទៅមក ដោយបន្សល់ទុកនូវការព្រមានយ៉ាងច្បាស់ថា ការចរចាការទូតណាមួយនឹងត្រូវចាត់ទុកដោយយុវជនថាជាការក្បត់ចំពោះអ្នកដែលបានតស៊ូ និងបូជាជីវិតដើម្បីសេរីភាព៕

ប្រែសម្រួល៖ ឈាង