ឯកអគ្គរាជទូត ជា ច័ន្ទបរិបូរណ៍ ប្ដេជ្ញាចិត្តជំរុញចំណងមិត្តភាពកម្ពុជា-ស៊ីប ឱ្យកាន់តែរឹងមាំ

លោក ជា ច័ន្ទបរិបូរណ៍ បានប្រគល់សារតាំងជាឯកអគ្គរាជទូតកម្ពុជាថ្មីប្រចាំសាធារណរដ្ឋស៊ីបជូនលោកប្រធានាធិបតី Nikos Christodoulides។ ក្នុងឱកាសនោះ លោកឯកអគ្គរាជទូត បានបង្ហាញនូវការប្ដេជ្ញាចិត្តជំរុញចំណងទំនាក់ទំនង និងកិច្ចសហប្រតិបត្តិការទ្វេភាគី កម្ពុជា-ស៊ីប ឱ្យកាន់តែរឹងមាំ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ជា ច័ន្ទបរិបូរណ៍ បានបញ្ជាក់ឡើងវិញចំពោះមិត្តភាព និងទំនាក់ទំនងល្អប្រសើររវាងកម្ពុជា និងស៊ីប ដែលត្រូវបានកសាង និងបន្តអភិវឌ្ឍឡើងលើមូលដ្ឋាននៃការគោរពគ្នាទៅវិញទៅមក ការយល់ចិត្ត និងការប្តេជ្ញារួមចំពោះគោលការណ៍មូលដ្ឋាននៃអធិបតេយ្យភាព សមភាព សន្តិភាព និងការគោរពច្បាប់អន្តរជាតិ។

តាមលោកឯកអគ្គរាជទូត កម្ពុជាផ្តល់សារៈសំខាន់យ៉ាងខ្លាំងចំពោះការពង្រឹង និងពង្រីកនូវទំនាក់ទំនងទ្វេភាគីជាមួយស៊ីប ហើយមានឆន្ទៈ និងប្តេជ្ញាចិត្តយ៉ាងពេញលេញក្នុងការលើកកម្ពស់កិច្ចសហប្រតិបត្តិការឱ្យកាន់តែសកម្ម ផ្អែកលើមិត្តភាព និងភាពជាដៃគូសហប្រតិបត្តិការ ដែលមានអត្ថប្រយោជន៍រួម ឆ្ពោះទៅមុខយ៉ាងចីរភាព។

លោកបានគូសរំលេចពីកិច្ចសហប្រតិបត្តិការដ៏ល្អរវាងប្រទេសទាំងពីរ ពាក់ព័ន្ធនឹងវិស័យនយោបាយ ការទូត  សេដ្ឋកិច្ច និងពាណិជ្ជកម្ម​ អប់រំ វប្បធម៌ និងការអភិវឌ្ឍធនធានមនុស្ស ដែលសុទ្ធសឹងជាវិស័យអាទិភាព ហើយមានសក្តានុពល ក្នុងការជំរុញកិច្ចសហប្រតិបត្តិការឱ្យកាន់តែជិតស្និទ្ធ ព្រមទាំងគឺជាមូលដ្ឋានសំខាន់សម្រាប់ការយល់ចិត្តគ្នា និងការចងមិត្តភាពយូរអង្វែងរវាងប្រទេសទាំងពីរ។ ខណៈវិស័យទេសចរណ៍ និងការតភ្ជាប់ប្រជាជនទៅប្រជាជន ក៏ជាវិស័យមានសក្តានុពលខ្ពស់ផងដែរ។

លោក ជា ច័ន្ទបរិបូរណ៍ ក៏បានលើកឡើងពីការចាប់អារម្មណ៍របស់កម្ពុជាចំពោះការពង្រីកកិច្ចសហប្រតិបត្តិការក្នុងវិស័យកំពុងលេចធ្លោមួយចំនួនទៀត រួមមានសេដ្ឋកិច្ចឌីជីថល ថាមពលបៃតង សេដ្ឋកិច្ចសមុទ្រ និងការអភិវឌ្ឍប្រកបដោយចីរភាព ដែលស្របតាមអាទិភាពអភិវឌ្ឍន៍ជាតិ និងគោលដៅអភិវឌ្ឍន៍ប្រកបដោយចីរភាពសកល។

លោកបានបញ្ជាក់ជាថ្មីការប្តេជ្ញាចិត្តដ៏មុតមាំរបស់កម្ពុជាក្នុងការពង្រឹងពង្រីកទំនាក់ទំនង និងកិច្ចសហប្រតិបត្តិការទ្វេភាគីជាមួយស៊ីបឱ្យកាន់តែរឹងមាំ និងមានប្រសិទ្ធភាព ទាំងក្នុងក្របខណ្ឌទ្វេភាគី តំបន់ និងអន្តរជាតិ។ លោកមានទំនុកចិត្តថា ក្រោមការដឹកនាំរបស់លោកប្រធានាធិបតី ទំនាក់ទំនងរវាងប្រទេសទាំងពីរនឹងបន្តរីកចម្រើនបន្ថែមទៀត។

លោក Nikos Christodoulides ប្រធានាធិបតីនៃប្រទេសស៊ីប បានស្វាគមន៍ចំពោះសន្ទុះវិជ្ជមានទំនាក់ទំនងទ្វេភាគីរបស់កម្ពុជា-ស៊ីប និងទន្ទឹងរង់ចាំការអភិវឌ្ឍកិច្ចសហប្រតិបត្តិការជាក់ស្តែង តាមរយៈកិច្ចសន្ទនាដោយប្រសិទ្ធភាព ការគោរពគ្នាទៅវិញទៅមក និងការប្តេជ្ញារួមគ្នាក្នុងការអនុវត្តតាមច្បាប់អន្តរជាតិ៕