កីឡា

ចុងសប្តាហ៍នេះ កាន់តែច្បាស់ ក្រុមណាខ្លះរក្សាខ្លួននៅ Top 6 លីគកំពូលកម្ពុជា

បានផុស

៣ ខែ មុន

នៅ

ថ្ងៃពុធ ១១ កុម្ភៈ ២០២៦

ដោយ

ក្រុមខ្លាំង ៥ ក្រុមកំពុងប្រជែងគ្នាដើម្បីរក្សាខ្លួនឲ្យស្ថិតនៅក្នុងចំណោមក្រុមកំពូលទាំង ៦ ឆ្ពោះទៅរកឱកាសប្រជែងជើងឯកលីគបាល់ទាត់កំពូលកម្ពុជា រដូវកាល ២០២៥-២៦ ដែលនៅសល់ ២ សប្តាហ៍ទៀតនឹងបញ្ចប់ជុំទី២។

ក្រុមកំពូលតារាង ព្រះខ័នរាជស្វាយរៀង និងក្រុមចំណាត់ថ្នាក់លេខ ២ ភ្នំពេញក្រោន មានសុវត្ថិភាពហើយនៅក្នុងចំណោមក្រុមកំពូលតារាងទាំង ៦ ប៉ុន្តែនៅមាន ៥ ក្រុមត្រូវប្រជែងគ្នាដណ្តើមយក ៤ កៅអី ហើយមានតែ ១ ក្រុមប៉ុណ្ណោះនឹងធ្លាក់ទៅក្រុមលំដាប់ទាបទាំង ៥។ ក្រុមទាំង ៥ គឺ បឹងកេត អង្គរថាយហ្គឺរ វិសាខា ណាហ្គាវើលដ៍ និង អឹមអូអាយកំពង់ដេវ៉ា។

បឹងកេត នៅសល់តែ ១ ប្រកួតទៀតប៉ុណ្ណោះ នឹងបញ្ចប់ជុំទី២ បន្ទាប់ពីឆ្លងកាត់ ១៩ ប្រកួត រកបាន ៣២ ពិន្ទុ តាមរយៈការឈ្នះ ៩ លើក ស្មើ ៥ លើក និងចាញ់ ៥ លើក។ ការប្រកួតចុងក្រោយ ពួកគេ ត្រូវតទល់នឹង ណាហ្គាវើលដ៍ ដែលជាគូប្រជែងដ៏ខ្លាំង។

ប្រសិនបើ បឹងកេត ឈ្នះ ណាហ្គាវើលដ៍ នៅថ្ងៃសៅរ៍ ទី១៤ ខែកុម្ភៈ នេះ ពួកគេនឹងស្ថិតនៅ Top 6 ដោយស្វ័យប្រវត្តិ ប៉ុន្តែប្រសិនបើចាញ់ ក៏មិនទាន់រអិលខ្លួនធ្លាក់ដែរ ដោយត្រូវរង់ចាំអ៊ុតមើលលទ្ធផលក្រុមផ្សេងៗទៀត។ ទោះជាយ៉ាងណា បឹងកេត មានសង្ឃឹមខ្ពស់ក្នុងការរក្សាខ្លួននៅក្រុមកំពូលទាំង ៦ ។

ណាហ្គាវើលដ៍ នៅសល់ ២ ប្រកួតទៀត បន្ទាប់ពីឆ្លងកាត់ ១៨ ប្រកួត មាន ២៩ ពិន្ទុ ស្ថិតនៅលេខ ៦ ពីការឈ្នះ ៨ ស្មើ ៥ និងចាញ់ ៥។ ប្រសិនបើពួកគេ ឈ្នះ បឹងកេត កាន់តែមានភាគរកខ្ពស់ ប៉ុន្តែបើចាញ់ ត្រូវការឈ្នះដាច់ខាតសម្រាប់ការប្រកួតសប្តាហ៍ចុងក្រោយជាមួយ ឡាយហ្វ ព្រះសីហនុ។

ចំណែក អង្គរថាយហ្គឺរ ក៏ប្រឈមនឹងហានិភ័យដែរ ប្រសិនបើពួកគេធ្វើមិនបានល្អពីរប្រកួតចុងក្រោយ។ នៅចុងសប្តាហ៍នេះ ពួកគេ ធ្វើការធ្ងន់មែនទែនដោយត្រូវតទល់នឹង ភ្នំពេញក្រោន ហើយចុងក្រោយ ប៉ះ កងយោធពលខេមរភូមិន្ទ។

វិសាខា ឆ្លងកាត់ ១៩ ប្រកួត រកបាន ២៩ ពិន្ទុ ពីការឈ្នះ ៧ ស្មើ ៨ និងចាញ់ ៤ ស្ថិតនៅលេខ ៦ នៅសល់តែ ១ ប្រកួតទៀតប៉ុណ្ណោះ។ ដូច្នេះការប្រកួតចុងក្រោយជាមួយ ភ្នំពេញក្រោន ត្រូវការឈ្នះ ដាច់ខាត។ ប្រសិនបើចាញ់ វិសាខា នឹងពិបាក។

ព្រះខ័នរាជស្វាយរៀង អបអរគ្រាប់បាល់ស៊ុតចូល ភ្នំពេញក្រោន

ក្រុមដែលនៅសល់ឱកាសស្តួចស្តើងគឺ អឹមអូអាយ កំពង់ដេវ៉ា ដែលកំពុងស្ថិតនៅលេខ ៧ មាន ២៧ ពិន្ទុ ពីការឈ្នះ ៧ ស្មើ ៦ និងចាញ់ ៥។ ចុងសប្តាហ៍នេះ ពួកគេត្រូវធ្វើការធ្ងន់ជាមួយ ព្រះខ័នរាជស្វាយរៀង និងចុងក្រោយប៉ះ អាយអេសអាយ ដង្កោសែនជ័យ។ ពួកគេត្រូវការឈ្នះទាំង ២ ប្រកួត និងត្រូវអ៊ុតមើលលទ្ធផលក្រុមផ្សេងៗទៀត។