ព័ត៌មានអន្ដរជាតិ

លោកត្រាំរិះគន់ប្រធានាធិបតីអ៊ីស្រាអែល ដែលមិនព្រមលើកលែងទោសឲ្យណេតាន់យ៉ាហ៊ូ

បានផុស

២ ខែ មុន

នៅ

ថ្ងៃសុក្រ ១៣ កុម្ភៈ ២០២៦

ដោយ

Chheang

ប្រធានាធិបតីអាមេរិក ដូណាល់ ត្រាំ បានធ្វើការរិះគន់យ៉ាងខ្លាំងៗទៅលើស្ថាប័នប្រធានាធិបតីអ៊ីស្រាអែលកាលពីថ្ងៃព្រហស្បតិ៍ទី១២ខែកុម្ភៈ ដោយបានហៅការបដិសេធរបស់លោក Isaac Herzog ក្នុងការលើកលែងទោសឲ្យនាយករដ្ឋមន្ត្រី បេនចាមីន ណេតាន់យ៉ាហ៊ូ ថាជា«រឿងគួរឲ្យអាម៉ាស់»។

*លោកត្រាំ និងលោកណេតាន់យ៉ាហ៊ូ (រូបថត៖ Reuters)*

យោងតាមរ៉យទ័រ ថ្លែងនៅសេតវិមាន លោកត្រាំបានលើកឡើងថា ប្រជាជនអ៊ីស្រាអែលគួរតែធ្វើឲ្យលោក Herzog មានការអៀនខ្មាស់ ចំពោះការមិនព្រមផ្តល់ការលើកលែងទោសដល់ «នាយករដ្ឋមន្ត្រីក្នុងសម័យសង្គ្រាមដ៏ឆ្នើម»។ ការរិះគន់នេះ កើតឡើងបន្ទាប់ពីជំនួបដ៏សំខាន់មួយកាលពីថ្ងៃពុធ ដែលជាជំនួបលើកទី៧ រវាងលោកត្រាំ និងលោកណេតាន់យ៉ាហ៊ូ ចាប់តាំងពីមេដឹកនាំអាមេរិកវ័យ៧៩ឆ្នាំវិលត្រឡប់មកកាន់តំណែងក្នុងអាណត្តិទីពីរ ដែលផ្តោតជាពិសេសលើកិច្ចព្រមព្រៀងនុយក្លេអ៊ែរជាមួយអ៊ីរ៉ង់។

លោកណេតាន់យ៉ាហ៊ូ ដែលបានក្លាយជាមេដឹកនាំអ៊ីស្រាអែលកាន់តំណែងដំបូងគេដែលប្រឈមមុខនឹងបទល្មើសព្រហ្មទណ្ឌ កំពុងបន្តតតាំងនឹងការចោទប្រកាន់ពីបទសូកប៉ាន់ បន្លំ និងការរំលោភលើទំនុកចិត្តនៅក្នុងសវនាការដែលបានអូសបន្លាយអស់រយៈពេល៦ឆ្នាំមកហើយ។ ខណៈលោកត្រាំប្រកាសថា ការកាត់ក្តីនេះគឺជា «ការបោកប្រាស់» ក្នុងគោលបំណងធ្វើឲ្យសម្ព័ន្ធមិត្តយុទ្ធសាស្ត្រចុះខ្សោយ ការពិតផ្នែកច្បាប់នៅក្នុងប្រទេសអ៊ីស្រាអែលនៅតែជាឧបសគ្គធំ ដោយសារការលើកលែងទោសជាទូទៅតម្រូវឲ្យមានការសារភាពកំហុសជាមុនសិន ដែលលោកណេតាន់យ៉ាហ៊ូតែងតែបដិសេធទទួលកំហុសដាច់ខាត។ ក្រសួងយុត្តិធម៌អ៊ីស្រាអែលកំពុងពិនិត្យលើសំណើផ្លូវការដែលបានដាក់ដោយនាយករដ្ឋមន្ត្រីកាលពីចុងឆ្នាំ២០២៥ ប៉ុន្តែដំណើរការនេះមានភាពយឺតយ៉ាវ ដែលកាន់តែបង្កើនការមិនពេញចិត្តជាសាធារណៈពីលោកត្រាំ។

ជាការឆ្លើយតបយ៉ាងកម្រ និងចំៗ ការិយាល័យប្រធានាធិបតី Herzog បានចេញសេចក្តីថ្លែងការណ៍បញ្ជាក់ជាថ្មីថា អ៊ីស្រាអែលគឺជា «រដ្ឋអធិបតេយ្យដែលគ្រប់គ្រងដោយនីតិរដ្ឋ» ហើយនឹងមិនត្រូវបានបង្កាប់បញ្ជាដោយសម្ពាធពីខាងក្រៅណាមួយឡើយ។ លោក Herzog បានសង្កត់ធ្ងន់ថា មិនមានការសម្រេចចិត្តណាមួយអាចធ្វើឡើងបានទេ រហូតទាល់តែក្រសួងយុត្តិធម៌ផ្តល់មតិផ្លូវការផ្នែកច្បាប់៕