រុស្ស៊ីរុញបញ្ហាព្រំដែនមកលើតុចរចានៅទីក្រុងហ្សឺណែវ

ការចាប់អារម្មណ៍​របស់​ពិភពលោក​បានងាកទៅរកទីក្រុងហ្សឺណែវនៅថ្ងៃអង្គារ​ទី​១៧​ខែ​កុម្ភៈ​នេះ ខណៈដែលរុស្ស៊ី និងអ៊ុយក្រែនត្រៀមខ្លួនសម្រាប់កិច្ចចរចារយៈពេលពីរថ្ងៃ លើបញ្ហាសំខាន់បំផុតដែលធ្វើ​ឲ្យ​សង្រ្គាមបន្តអូសបន្លាយ នោះគឺរឿងទឹកដី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោង​តាម​រ៉យទ័រ ដើម្បីបង្ហាញពីភាពម៉ឺងម៉ាត់ វិមានក្រឹមឡាំងបានបញ្ជូនក្រុមការងារធំជាងមុន ដែលរួមមានទាំងមេដឹកនាំចារកម្មយោធា និងអ្នកការទូតជាន់ខ្ពស់។ ចំណាត់ការនេះបង្ហាញថា ទីក្រុងមូស្គូហាក់ដូចជាត្រៀមខ្លួនរួចរាល់ដើម្បីរំលងការពិភាក្សាត្រឹមតែរឿងយោធា ហើយងាកមកដោះស្រាយបញ្ហាដ៏ស្មុគស្មាញនៃរឿងព្រំដែនវិញ។

ចំណុចសំខាន់​នៃកិច្ចចរចា​លើក​​នេះ គឺវត្តមាន​​លោក Vladimir Medinsky អតីតរដ្ឋមន្ត្រីវប្បធម៌ដែលត្រូវបានជ្រើសរើសដោយផ្ទាល់ដោយប្រធានាធិបតី វ៉្លាឌីមៀរ ពូទីន។ ការវិលត្រឡប់របស់លោកមកកាន់តុចរចាវិញ បានបង្ក​ឲ្យមានការជជែកដេញដោលខ្លាំង ព្រោះអ៊ុយក្រែនធ្លាប់បានរិះគន់លោកចំៗថាជាដៃគូចរចាដែល «មិនយកជាការបាន»។ លោក Medinsky មិនបានចូលរួមក្នុងកិច្ចប្រជុំនាពេលថ្មីៗនេះនៅ​ក្រុង​ Abu Dhabi ទេ ដោយសារកិច្ចពិភាក្សានោះផ្ដោតតែលើរឿងកងទ័ព ប៉ុន្តែនៅពេលនេះដែលការចរចាងាកមកផ្ដោតលើរឿងទឹកដី និងនយោបាយ ទើប​លោកពូទីន ក៏បានដាក់​​ទីប្រឹក្សា​ជំនិត​ម្នាក់​នេះ​ឲ្យ​មកដឹកនាំវិញតែម្តង។

ទោះបីជាមានការរៀបចំកិច្ចប្រជុំថ្មីក៏ដោយ ក៏ភាគីទាំងពីរនៅតែមានគំនិតផ្ទុយគ្នាស្រឡះ។ ទីក្រុងមូស្គូបង្ហាញការខកចិត្តយ៉ាងខ្លាំងដែលទីក្រុងកៀវ​បដិសេធ​​ប្រគល់តំបន់ដែលខ្លួនទាមទារ ដូចជា តំបន់​ Donetsk ជាដើម ខណៈដែលប្រធានាធិបតីអ៊ុយក្រែន​ វ៉ូឡូឌីមៀរ ហ្សេលេនស្គី បានព្រមានយ៉ាងច្បាស់ថា លោកនឹងមិនផ្តល់ «កាដូទឹកដី» ណាមួយទៅ​ឲ្យលោក​ពូទីន គ្រាន់តែដើម្បីបញ្ចប់ការវាយប្រហារនោះឡើយ។ គំនិតប្លែកមួយទៀតដែលរុស្ស៊ីលើកមកនិយាយសាជាថ្មី គឺសំណើដែលធ្លាប់ត្រូវបានបដិសេធក្នុងការដាក់​ប្រទេស​អ៊ុយក្រែន​ឲ្យ​ស្ថិតក្រោមការគ្រប់គ្រងបណ្តោះអាសន្នរបស់អង្គការសហប្រជាជាតិ ដែលនេះជាអ្វីដែលរុស្ស៊ីសង្ឃឹមថាលោកខាងលិចអាចនឹងពិចារណា បើទោះបីជាវាមិនទាន់មានការគាំទ្រណាមួយក៏ដោយ៕

ប្រែសម្រួល៖ ឈាង