ព័ត៌មានអន្ដរជាតិ

អាមេរិកបន្តវាយប្រហារនាវាភេរវករគ្រឿងញៀន ខណៈក្រុមសិទ្ធិមនុស្សទទូចឱ្យអនុវត្តតាមផ្លូវច្បាប់

បានផុស

២ ខែ មុន

នៅ

ថ្ងៃពុធ ១៨ កុម្ភៈ ២០២៦

ដោយ

យោធាសហរដ្ឋអាមេរិក បានប្រកាសថា ខ្លួនបានធ្វើការវាយប្រហារចំនួនបីលើកប្រឆាំងនឹងនាវាដែលសង្ស័យថាដឹកគ្រឿងញៀននៅក្នុងមហាសមុទ្រប៉ាស៊ីហ្វិក និងសមុទ្រការ៉ាប៊ីន ដោយបានសម្លាប់មនុស្សយ៉ាងហោចណាស់ ១១នាក់។

យោងតាមការចុះផ្សាយ Al Jazeera ថ្ងៃទី១៧ ខែកុម្ភៈ ឱ្យដឹងថា មេបញ្ជាការភាគខាងត្បូងសហរដ្ឋអាមេរិក (SOUTHCOM) ត្រួតពិនិត្យសកម្មភាពយោធានៅអាមេរិកឡាទីនបាននិយាយថា ខ្លួនបានធ្វើការវាយប្រហារចំនួនពីរលើកនៅសមុទ្រប៉ាស៊ីហ្វិកខាងកើត និងមួយលើកនៅការ៉ាប៊ីន ជាផ្នែកមួយនៃយុទ្ធនាការមួយដែលមានឈ្មោះថា ប្រតិបត្តិការ «Southern Spear» ។ ការវាយប្រហារទាំងបីលើកនេះត្រូវបានធ្វើឡើងនៅយប់ថ្ងៃចន្ទ។

បញ្ជាការភាគខាងត្បូងសហរដ្ឋអាមេរិកបាននិយាយកាលពីថ្ងៃអង្គារថា៖ «ភេរវករគ្រឿងញៀនប្រុស ១១ នាក់ ត្រូវបានសម្លាប់អំឡុងពេលប្រតិបត្តិការ។ មនុស្ស ៤ នាក់នៅលើនាវាទីមួយនៅតំបន់ប៉ាស៊ីហ្វិកខាងកើត ៤ នាក់នៅលើនាវាទីពីរនៅតំបន់ប៉ាស៊ីហ្វិកខាងកើតដូចគ្នា និង ៣ នាក់នៅលើនាវាទីបី នៅតំបន់ការ៉ាប៊ីន»។

គួរបញ្ជាក់ថារដ្ឋបាលរបស់ប្រធានាធិបតីអាមេរិក លោក ដូណាល់ ត្រាំ បានវាយប្រហារលើនាវាដែលសង្ស័យថាជួញដូរគ្រឿងញៀននៅក្នុងដែនទឹកនៃអាមេរិកខាងត្បូងចាប់តាំងពីថ្ងៃទី ២ ខែកញ្ញា ជាផ្នែកមួយនៃយុទ្ធនាការដ៏កក្រើកប្រឆាំងនឹងក្រុមជួញដូរគ្រឿងញៀនក្នុងតំបន់។

យ៉ាងណា អ្នកជំនាញផ្នែកច្បាប់បានថ្កោលទោសយុទ្ធនាការនេះថាជាការសម្លាប់ក្រៅប្រព័ន្ធតុលាការជាបន្តបន្ទាប់។ យ៉ាងហោចណាស់មានមនុស្ស ១៤៥ នាក់ត្រូវបានសម្លាប់ នៅក្នុងការវាយប្រហារចាប់តាំងពីខែកញ្ញាមក ទោះបីជាការប៉ាន់ស្មានមានភាពខុសគ្នាបន្តិចបន្តួចក៏ដោយ។

លោក Ben Saul អ្នករាយការណ៍ពិសេសរបស់អង្គការសហប្រជាជាតិស្តីពីសិទ្ធិមនុស្ស និងប្រឆាំងភេរវកម្ម បាននិយាយលើបណ្តាញសង្គម ឆ្លើយតបទៅនឹងការវាយប្រហារថ្មីៗបំផុតថា៖ « សហរដ្ឋអាមេរិកសារភាពចំពោះការសម្លាប់ជនស៊ីវិលលើកទី ១៤៦ នៅលើសមុទ្រ បន្ទាប់ពីការវាយប្រហាររបស់យោធាខុសច្បាប់លើកទី ៤៣ របស់ខ្លួនប្រឆាំងនឹង ភេរវករគ្រឿងញៀន»។

លោកបន្តថា៖ « មេដឹកនាំអាមេរិកត្រូវតែទទួលខុសត្រូវ ប្រកបដោយយុត្តិធម៌របស់អាមេរិក និងអន្តរជាតិ។ អត្តសញ្ញាណរបស់អ្នកដែលត្រូវបានសម្លាប់ មិនដែលចេញផ្សាយជាផ្លូវការដល់សាធារណជនទេ ហើយក៏មិនមានភស្តុតាងណាមួយចេញផ្សាយ ដើម្បីបញ្ជាក់ថាពួកគេជាប់ពាក់ព័ន្ធជាមួយនឹងការជួញដូរគ្រឿងញៀនដែរ»។

យ៉ាងណា លោក Pete Hegseth រដ្ឋមន្ត្រីក្រសួងការពារជាតិបាននិយាយលើបណ្តាញសង្គម បង្ហាញពីវីដេអូនៃនាវាដែលបានវាយប្រហារថា៖ « វាបង្ហាញថាជាទិវានៃការដឹកនាំរបស់ប្រធានាធិបតី ក្រោមការដឹកនាំរបស់ប្រធានាធិបតី ត្រាំ។ ហើយក៏មិនមែនជាថ្ងៃល្អសម្រាប់ដំណើរការគ្រឿងញៀននោះដែរ»៕

ប្រែសម្រួល៖ ណឺ មិនា