សេដ្ឋកិច្ច

ការនាំចូលបង្កងពីក្រៅប្រទេស កំពុងប៉ះពាល់ដល់អ្នកចិញ្ចឹមក្នុងស្រុក

បានផុស

២ ខែ មុន

នៅ

ថ្ងៃព្រហស្បតិ៍ ១៩ កុម្ភៈ ២០២៦

ដោយ

ប្រធានសមាគមបង្កងខេត្តតាកែវ លោក ស៉ាប់ សារុន បានឱ្យ«កម្ពុជាថ្មី» ដឹងនៅថ្ងៃទី១៩ ខែកុម្ភៈ ឆ្នាំ២០២៦ នេះថា បច្ចុប្បន្នបង្កងតាកែវបាននិងកំពុងប្រឈមបញ្ហាទីផ្សារ ដោយសារតែការហូចូលពីបង្កងខាងក្រៅកំពុងវាយលុកលើទីផ្សារខ្លាំង។

លោក ស៉ាប់ សារុន លើកឡើងថា បច្ចុប្បន្ននេះបង្កងតាកែវកំពុងប្រឈមទៅនឹងបញ្ហាទីផ្សារខ្លាំង ដោយសារតែបង្កងពីខាងក្រៅហូចូលច្រើនហួសប្រមាណ និងលក់ក្នុងតម្លៃថោក ដែលធ្វើឱ្យបន្ទាបតម្លៃបង្កងក្នុងស្រុក។

តែទោះជាយ៉ាងណាត្បិតថាបង្កងខាងក្រៅហូចូលច្រើនក្តី ប៉ុន្តែប្រជាពលរដ្ឋនៅស្រុកនៅតែបន្តចិញ្ចឹមជាធម្មតា ដោយហេតុថា ប្រជាពលរដ្ឋដែលបានដឹងពីរសជាតិ និងស្គាល់ពីបង្កងធម្មជាតិ គឺនៅតែមានតម្រូវការ ព្រោះបង្កងចិញ្ចឹមតាមធម្មជាតិ ទោះតូចៗបន្តិច និងមានតម្លៃរាងថ្លៃបន្តិច តែសាច់ស្វិតឆ្ងាញ់ មិនដូចបង្កងនាំចូលឡើយ។

បើយោងតាមលោកសារុន បច្ចុប្បន្នបង្កងតាកែវអាចលក់ចេញបានក្នុងមួយថ្ងៃប្រមាណ ១០គីឡូ ទៅ ២០គីឡូប៉ុណ្ណោះ ដោយសារតែបង្កងខាងក្រៅសម្រុកនាំចូលខ្លាំង។ ក្នុងនោះបង្កងលេខ៣ លក់បានចន្លោះពី ៤ ម៉ឺនរៀលទៅ ៥ ម៉ឺនរៀលប៉ុណ្ណោះក្នុងមួយគីឡូក្រាម ដោយឡែកបង្កងលេខ២ លក់បានតែ ៧ ម៉ឺនរៀលក្នុងមួយគីឡូក្រាម ធ្លាក់ចុះ ១ ម៉ឺនរៀល កាលពីមុនលក់ក្នុងតម្លៃ ៨ ម៉ឺនរៀលក្នុងមួយគីឡូក្រាម។

សូមជម្រាបថា កាលពីឆ្នាំ២០២៥ កន្លងទៅ បង្កងតាកែវប្រមូលទិន្នផលសរុបបានប្រមាណជិត ១០តោន ដើម្បីលក់ផ្គត់ផ្គង់នៅលើទីផ្សារ។ បច្ចុប្បន្នខេត្តតាកែវមានជិត ១០ កសិដ្ឋាន តាមស្រុកមួយចំនួនដូចជា ស្រុកអង្គរបុរី ស្រុកបុរីជលសារ ស្រុកកោះអណ្ដែត និងនៅក្នុងទីរួមខេត្តតាកែវផ្ទាល់។ ចំពោះកសិដ្ឋានទាំងអស់មានទំហំចាប់ពី ៤-៨ ហិតា ឬខ្លះទៀត ១០-៣០ហិតា ជាដើម៕