ជប៉ុនកំណត់ពេលដាក់ពង្រាយមីស៊ីលក្បែរតៃវ៉ាន់នៅ​ឆ្នាំ២០៣១

រដ្ឋាភិបាលជប៉ុនគ្រោងនឹងដាក់ពង្រាយមីស៊ីលការពារអាកាសលើកោះដាច់ស្រយាល Yonaguni ក្បែរដែនដីតៃវ៉ាន់​ឲ្យ​បានត្រឹមខែមីនា ឆ្នាំ២០៣១ខាងមុខ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាម​ការ​ផ្សាយ​របស់ទីភ្នាក់ងារ​ព័ត៌មាន AFP រដ្ឋមន្ត្រីការពារជាតិជប៉ុន លោក Shinjiro Koizumi បានបញ្ជាក់កាលពីថ្ងៃអង្គារ​ទី​២៤​កុម្ភៈ​ថា នេះជាលើកដំបូងដែលទីក្រុងតូក្យូបញ្ជាក់ពីពេលវេលាច្បាស់លាស់សម្រាប់ប្រតិបត្តិការនេះ នៅលើកោះដែលស្ថិតនៅចម្ងាយត្រឹមតែ ១១០គីឡូម៉ែត្រពីតៃវ៉ាន់។ ផែនការនេះគឺជាផ្នែកមួយនៃយុទ្ធសាស្ត្រពង្រឹងការការពារអាកាស ដែលបានប្រកាសតាំងពីឆ្នាំ២០២២ ខណៈដែលក្រសួងនឹងរៀបចំការសង្ខេបព័ត៌មានជូនប្រជាពលរដ្ឋមូលដ្ឋាននៅសប្តាហ៍ក្រោយ។

ការប្រកាសនេះធ្វើឡើងចំពេលមានជម្លោះដ៏តានតឹងជាមួយទីក្រុងប៉េកាំង ដែលទើបតែបានដាក់កម្រិតលើការនាំចេញរបស់ក្រុមហ៊ុនជប៉ុនរាប់សិប ដែលពាក់ព័ន្ធនឹងការស្ថាបនាវិស័យយោធា។ ភាពតានតឹងបានកើនឡើងបន្ទាប់ពីលោកស្រីនាយករដ្ឋមន្ត្រី Sanae Takaichi បានបង្ហើបកាលពីខែវិច្ឆិកាឆ្នាំ​មុន​ថា ជប៉ុនអាចនឹងធ្វើអន្តរាគមន៍យោធា បើមានការវាយប្រហារលើតៃវ៉ាន់។ ជាការឆ្លើយតប ប្រទេសចិនបានរារាំងពលរដ្ឋខ្លួនមិនឲ្យ​ទៅ​កម្សាន្តនៅជប៉ុន ដែលបង្កផលប៉ះពាល់ដល់វិស័យទេសចរណ៍យ៉ាងខ្លាំង។

លោក Wang Yi អ្នកការទូតជាន់ខ្ពស់ចិន បានចោទប្រកាន់ជប៉ុនថា កំពុងព្យាយាម «រំលឹកឡើងវិញនូវលទ្ធិយោធានិយម»។ ទោះជាយ៉ាងណា លោកស្រី Takaichi បានប្រាប់សភាថា ចិនកំពុងបង្កើនការប៉ុនប៉ងផ្លាស់ប្តូរស្ថានភាពដើមនៅក្នុងសមុទ្រចិនខាងកើត និងខាងត្បូងតាមរយៈ «កម្លាំងបាយ ឬការបង្ខិតបង្ខំ» ដែលធ្វើ​ឲ្យជប៉ុនចាំបាច់ត្រូវតែពង្រឹងសមត្ថភាពការពារជាតិរបស់ខ្លួន​ឲ្យ​កាន់តែខ្លាំងក្លា៕

ប្រែសម្រួល៖ ឈាង