អគ្គិភ័យឆាបឆេះបន្ទប់ជួលជាន់ទី៤ នៃអាផាតមិនជួល ក្នុងសង្កាត់អូឡាំពិក 

ភ្នំពេញ ៖ ឆេះអាផាតមិនជួលជាន់ទី៤ បង្កការខូចខាត បន្ទប់មួយចំនួន រួមជាមួយសម្ភារៈ ផ្អើលពលរដ្ឋ និង សមត្ថកិច្ចអន្តរាគមន៍ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ហេតុការណ៍បង្កភ្ញាក់ផ្អើលនេះ កើតឡើងកាលពីវេលាម៉ោង ១០ និង ២០នាទីថ្ងៃទី០២ ខែមីនា ឆ្នាំ២០២៦ នៅតាមបណ្តោយផ្លូវលេខ ២៩២ ក្នុងសង្កាត់អូឡាំពិក ខណ្ឌបឹងកេងកង រាជធានីភ្នំពេញ ។

តាមប្រភពព័ត៍មានពីប្រជាពលរដ្ឋបានឱ្យដឹងថា មុនកើតហេតុគេបានធុំក្លិនឈ្ងៀមផ្សែង ប៉ុន្តែរកមិនឃើញ ក៏ពួកគាត់ត្រឡប់ចូលផ្ទះវិញ ។ លុះមួយសន្ទុះក្រោយមក ក៏ស្រាប់តែ ឃើញអណ្តាតភ្លើង ចេញពីបន្ទប់ជាន់ទី៤ នៃអាផាតមិនជួល យ៉ាងសន្ធោសន្ធៅ ។ ភ្លាមៗ ប្រជាពលរដ្ឋ បានប្រញាប់រាយការណ៍ជូនសមត្ថកិច្ច ដើម្បីជួយអន្តរាគមន៍ ការពាររាលដាលកាន់តែខ្លាំង ។ 

អគ្គិភ័យនេះបង្កការខូចខាត បន្ទប់ជាន់ទី៤ រួមមានសម្ភារៈមួយចំនួនធំ និង បានប្រើប្រាស់រថយន្តពន្លត់អគ្គិភ័យរបស់ស្នងការដ្ឋាននគរបាលរាជធានីភ្នំពេញ ចំនួន ០៥គ្រឿង បាញ់ឱ្យរលត់ជាស្ថាពរ ។ ចំពោះមូលហេតុ សមត្ថកិច្ច កំពុងស្រាវជ្រាវ ៕

អត្ថបទ ៖ រដ្ឋា