ព័ត៌មានអន្ដរជាតិ

ចិនគាំទ្រអ៊ីរ៉ង់ក្នុងការការពារខ្លួនពីការវាយប្រហាររបស់អាមេរិក-អ៊ីស្រាអែល ខណៈសង្គ្រាមរីករាលដាលពេញមជ្ឈិមបូព៌ា

បានផុស

២ ខែ មុន

នៅ

ថ្ងៃអង្គារ ៣ មីនា ២០២៦

ដោយ

រដ្ឋមន្ត្រីការបរទេសចិន លោក វ៉ាង យី (Wang Yi) បានប្រាប់ភាគីអ៊ីរ៉ង់តាមរយៈទូរស័ព្ទថា ទីក្រុងប៉េកាំងគាំទ្រទីក្រុងតេហេរ៉ង់ក្នុងការពារខ្លួនពីការវាយប្រហាររបស់សហរដ្ឋអាមេរិក-អ៊ីស្រាអែល ខណៈសង្គ្រាមនេះបាននិងកំពុងរីករាលដាលពាសពេញតំបន់មជ្ឈិមបូព៌ា។ នេះបើយោងតាម JustNews ចុះផ្សាយថ្ងៃទី០២ ខែមីនា ឆ្នាំ២០២៦។

រដ្ឋមន្ត្រីការបរទេសចិន លោក វ៉ាង យី ។ រូបភាព៖ Reuters

លោក វ៉ាង បានប្រាប់រដ្ឋមន្ត្រីការបរទេសអ៊ីរ៉ង់ លោក Abbas Araghchi ថា៖ «ទីក្រុងប៉េកាំងឱ្យតម្លៃចំពោះមិត្តភាពដ៏យូរអង្វែងរវាងចិន-អ៊ីរ៉ង់ គាំទ្រអ៊ីរ៉ង់ក្នុងការការពារអធិបតេយ្យភាព សន្តិសុខ បូរណភាពទឹកដី និងសេចក្តីថ្លៃថ្នូរជាតិរបស់ខ្លួន និងគាំទ្រអ៊ីរ៉ង់ក្នុងការការពារសិទ្ធិ និងផលប្រយោជន៍ស្របច្បាប់របស់ខ្លួន»។ នេះបើយោងតាមការចុះផ្សាយរបស់ទូរទស្សន៍រដ្ឋ CCTV។

លោក វ៉ាង ត្រូវបានស្រង់សម្តីដោយ CCTV ដូចបាននិយាយថា៖«ប្រទេសចិនបានជំរុញឱ្យសហរដ្ឋអាមេរិក និងអ៊ីស្រាអែលបញ្ឈប់ប្រតិបត្តិការយោធាជាបន្ទាន់ ជៀសវាងការកើនឡើងនៃភាពតានតឹងបន្ថែមទៀត ជាពិសេសរារាំងជម្លោះពីការរីករាលដាលដល់តំបន់មជ្ឈិមបូព៌ាទាំងមូល»។

នៅក្នុងការហៅទូរស័ព្ទដាច់ដោយឡែកមួយជាមួយរដ្ឋមន្ត្រីការបរទេសអូម៉ង់ លោក វ៉ាង បានហៅសហរដ្ឋអាមេរិក និងអ៊ីស្រាអែលថា៖ «ជាការរំលោភលើគោលបំណង និងគោលការណ៍នៃធម្មនុញ្ញអង្គការសហប្រជាជាតិដោយញុះញង់សង្គ្រាមប្រឆាំងនឹងអ៊ីរ៉ង់ដោយចេតនា»។

មិនតែប៉ុណ្ណោះ លោក វ៉ាង ប្រាប់រដ្ឋមន្រ្តីក្រសួងការបរទេសអូម៉ង់ លោក Badr Albusaidi ថា៖ «ប្រទេសចិនក៏មានឆន្ទៈក្នុងការដើរតួនាទីស្ថាបនាផងដែរ រួមទាំងការលើកកម្ពស់យុត្តិធម៌ ការខិតខំដើម្បីសន្តិភាព និងការបញ្ឈប់សង្គ្រាម តាមរយៈវេទិការបស់ក្រុមប្រឹក្សាសន្តិសុខតរបស់អង្គការសហប្រជាជាតិ»។

ចំណែកការហៅទូរស័ព្ទមួយផ្សេងទៀតជាមួយរដ្ឋមន្ត្រីការបរទេសនិងអឺរ៉ុបនៃប្រទេសបារាំង លោក Jean-Noel Barrot លោក វ៉ាង លើកឡើងថា៖ « ពិភពលោកកំពុងប្រឈមនឹងការដើរថយក្រោយទៅរកច្បាប់ព្រៃ»។

យោងតាម CCTV លោក វ៉ាង បន្តថា៖«មហាអំណាចមិនអាចវាយប្រហារប្រទេសដទៃទៀត ដោយបំពានផ្អែកលើឧត្តមភាពយោធារបស់ពួកគេបានទេ។ ហើយបញ្ហានុយក្លេអ៊ែរអ៊ីរ៉ង់ត្រូវតែវិលត្រឡប់ទៅរកផ្លូវនៃការដោះស្រាយបែបនយោបាយ និងការទូតវិញទើបជាការប្រសើរ» ៕

ប្រែសម្រួល៖ ណឺ មិនា