ព័ត៌មានអន្ដរជាតិ

ភ្នាក់ងារ UN ជំរុញឱ្យស៊ើបអង្កេតជាបន្ទាន់ មិនលំអៀង និងហ្មត់ចត់ លើការវាយប្រហារចំសាលាក្មេងស្រីនៅអ៊ីរ៉ង់

បានផុស

៣ ខែ មុន

នៅ

ថ្ងៃពុធ ៤ មីនា ២០២៦

ដោយ

ការិយាល័យសិទ្ធិមនុស្សអង្គការសហប្រជាជាតិ (UN) នៅថ្ងៃអង្គារបានជំរុញឱ្យមានការស៊ើបអង្កេតលើការប្រើប្រាស់កងកម្លាំងនៅពីក្រោយការវាយប្រហារដ៏សាហាវបំផុតមួយ ចំសាលារៀនក្មេងស្រីនៅភាគខាងត្បូងប្រទេសអ៊ីរ៉ង់ ដែលបានសម្លាប់សិស្សជាង១៦០នាក់។ នេះបើយោងតាមរ៉យទ័រ ចុះផ្សាយថ្ងៃទី០៣ ខែមីនា ឆ្នាំ២០២៦ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកស្រី Ravina Shamdasani អ្នកនាំពាក្យការិយាល័យសិទ្ធិមនុស្សអង្គការសហប្រជាជាតិ បានថ្លែងប្រាប់សន្និសីទសារព័ត៌មានក្នុងទីក្រុងហ្សឺណែវថា ៖«ឧត្តមស្នងការ លោក Volker Turk អំពាវនាវឱ្យមានការស៊ើបអង្កេតជាបន្ទាន់ មិនលំអៀង និងហ្មត់ចត់លើការវាយប្រហារនេះ។ រឿងត្រូវតែដឹងគឺនៅលើកងកម្លាំងដែលអនុវត្តការវាយប្រហារនេះ យកមកស៊ើបអង្កេត»។

លោកស្រី Shamdasani បន្តថា៖ «រឿងនេះពិតជាគួរឱ្យរន្ធត់ណាស់។ រូបភាពដែលបង្ហោះនៅលើបណ្តាញសង្គម គឺមានខ្លឹមសារនៃការបំផ្លិចបំផ្លាញ ភាពអស់សង្ឃឹម គ្មានន័យ និងភាពឃោរឃៅនៃជម្លោះនេះ»។

ចំណែកលោក Turk ក៏បានជំរុញឱ្យគ្រប់ភាគីទាំងអស់រក្សាភាពអត់ធ្មត់ និងត្រឡប់ទៅតុចរចាវិញ។

គួរបញ្ជាក់ថា សាលារៀននៅភាគខាងត្បូងប្រទេសអ៊ីរ៉ង់ត្រូវបានវាយប្រហារនៅថ្ងៃសៅរ៍ ជាថ្ងៃដំបូងនៃការវាយប្រហាររបស់សហរដ្ឋអាមេរិក និងអ៊ីស្រាអែលប្រឆាំងនឹងប្រទេសនេះ។

រដ្ឋមន្ត្រីការបរទេសសហរដ្ឋអាមេរិក លោក Marco Rubio និយាយកាលពីថ្ងៃចន្ទថា៖ «កងកម្លាំងសហរដ្ឋអាមេរិកនឹងមិនវាយប្រហារសាលារៀនដោយចេតនាទេ»។

រីឯអ៊ីស្រាអែលឆ្លើយតបថា ខ្លួនកំពុងស៊ើបអង្កេតឧប្បត្តិហេតុនេះ។

ឯកអគ្គរដ្ឋទូតអ៊ីរ៉ង់ប្រចាំអង្គការសហប្រជាជាតិនៅទីក្រុងហ្សឺណែវ លោក Ali Bahreini ធ្លាប់បានលើកឡើងពីបញ្ហានេះជាមួយ លោក Turk ក្នុងលិខិតមួយចុះថ្ងៃទី០១ ខែមីនា ដោយហៅការវាយប្រហារនេះថាមិនសមហេតុផលនិងជាឧក្រិដ្ឋកម្ម។

ការលើកឡើងនាពេលនោះរបស់ លោក Bahreini ការវាយប្រហារនេះសម្លាប់សិស្សចំនួន ១៥០ នាក់ ប៉ុន្តែជាបន្តបន្ទាប់ប៉ុន្មានថ្ងៃមកនេះ ចំនួនអ្នកស្លាប់បានកើនឡើងដល់់ជាង១៦០នាក់ ហើយពិធីហែរសពទៅបញ្ចុះវិញបង្ហាញពីភាពរន្ធត់ និងសោកសង្រេងខ្លាំងណាស់៕

ប្រែសម្រួល៖ ណឺ មិនា