រដ្ឋមន្ត្រីការបរទេសរុស្ស៊ី​និងអ៊ីរ៉ង់ សន្ទនាគ្នាតាម​ទូរស័ព្ទ​​ ក្នុងពេល​តានតឹងខ្លាំងបំផុត​

រដ្ឋមន្ត្រីការបរទេសរុស្ស៊ី លោក Sergei Lavrov បានជំរុញឲ្យមានការបន្ធូរបន្ថយភាពតានតឹងក្នុងសង្គ្រាមនៅមជ្ឈិមបូព៌ា បន្ទាប់ពីសន្ទនា​គ្នាតាមទូរស័ព្ទជាមួយសមភាគីអ៊ីរ៉ង់ លោក Abbas Araghchi កាលពីថ្ងៃអង្គារទី៣មីនា។ នេះ​បើ​យោងតាមរបាយការណ៍ពីក្រសួងការបរទេសទីក្រុងមូស្គូ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាម themoscowtimes ក្នុងអំឡុងពេលនៃការហៅទូរស័ព្ទជាមួយលោក Araghchi លោក Lavrov បានសង្កត់ធ្ងន់លើតម្រូវការក្នុងការ «ធានាសុវត្ថិភាពប្រជាជនស៊ីវិល និងហេដ្ឋារចនាសម្ព័ន្ធស៊ីវិលនៅក្នុងប្រទេសទាំងអស់ក្នុងតំបន់»។

រដ្ឋមន្ត្រីរូបនេះក៏បានបញ្ជាក់ជាថ្មីនូវការអំពាវនាវរបស់ភាគីរុស្ស៊ី សម្រាប់ការបន្ធូរបន្ថយភាពតានតឹង បដិសេធការប្រើប្រាស់កម្លាំង ព្រមទាំងជំរុញឲ្យមានដំណោះស្រាយនយោបាយ និងការទូត ដោយលើកឡើងថា «ទីក្រុងមូស្គូត្រៀមខ្លួនជួយជានិច្ច»។

គួរបញ្ចាក់ដែរថា ការវាយប្រហាររបស់សហរដ្ឋអាមេរិក និងអ៊ីស្រាអែលលើអ៊ីរ៉ង់ ដែលបានចាប់ផ្តើមកាលពីថ្ងៃសៅរ៍ បានជំរុញឲ្យប្រទេសជាច្រើនបិទដែនអាកាសរបស់ពួកគេរៀងៗខ្លួន។ ការបិទច្រកទាំងនេះ ក៏បានបណ្តាលឲ្យមានការលុបចោលជើងហោះហើររាប់ពាន់ជើងនៅទូទាំងប្រទេសឈូងសមុទ្រ ស្របពេលដែលគោលដៅវិស្សមកាលដ៏ពេញនិយមសម្រាប់ភ្ញៀវទេសចររុស្ស៊ី បានក្លាយជាការរំខានដ៏ធំបំផុតចំពោះការធ្វើដំណើរទូទាំងពិភពលោកចាប់តាំងពីជំងឺរាតត្បាតកូវីដ៕

អត្ថបទ៖ សាង ស្រីល័ក្ខ