ចរាចរណ៍

រថយន្តដឹកប្រេងឥន្ធនៈ បុករះរថយន្ត ២ គ្រឿង និងកង់បី ១ គ្រឿង កៀបតៃកុងម្នាក់ បាក់ជើងម្ខាង

បានផុស

៤ ខែ មុន

នៅ

ថ្ងៃព្រហស្បតិ៍ ៥ មីនា ២០២៦

ដោយ

រថយន្តដឹកប្រេងឥន្ធនៈ ១ គ្រឿង សង្ស័យដាច់ហ្វ្រាំង ជ្រុលបុករះរថយន្តឃ្លុប ២ គ្រឿង និងកង់បី ១ គ្រឿង អូសកៀបជាប់តៃកុងរថយន្តឃ្លុបម្នាក់ បណ្ដាលឲ្យរងរបួសបាក់ជើងម្ខាង ត្រូវបានកងសង្គ្រោះ ៧១១ កងពលតូចលេខ ៧០ ជួយអន្តរាគមន៍កាត់យកចេញបញ្ជូនទៅមន្ទីរពេទ្យភ្លាមៗ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ហេតុការណ៍នេះបានកើតឡើងកាលពីវេលាម៉ោង ៩ និង ៥០ នាទីព្រឹក ថ្ងៃទី ៥ ខែមីនា ឆ្នាំ ២០២៦ ស្ថិតនៅតាមបណ្ដោយផ្លូវបេតុង ភូមិត្រពាំងទា សង្កាត់ពងទឹក ខណ្ឌដង្កោ រាជធានីភ្នំពេញ។ ជនរងគ្រោះឈ្មោះ ជុំ ចាន់ធី ភេទប្រុស អាយុ ៤៦ ឆ្នាំ (បាក់ជើងខាងឆ្វេង) មានទីលំនៅភូមិអង្គ សង្កាត់ប្រឡ:ឡាង ខណ្ឌដង្កោ រាជធានីភ្នំពេញ។

តាមប្រភពព័ត៌មានបានឲ្យដឹងថា មុនពេលកើតហេតុគេបានឃើញរថយន្តឃ្លុប ២ គ្រឿង ធ្វើដំណើរស្របគ្នាតាមបណ្ដោយផ្លូវបេតុង ទិសដៅពីលិចទៅកើត។ លុះមកដល់ចំណុចកើតហេតុ ស្រាប់តែមានរថយន្តដឹកប្រេងឥន្ធនៈ ១ គ្រឿង ពាក់ស្លាកលេខ ភ្នំពេញ 3F-1921 ធ្វើដំណើរទិសដៅបញ្ច្រាសទិសគ្នា ក្នុងល្បឿនលឿន បុករថយន្តឃ្លុបដែលបើកបរនៅខាងមុខ ១ គ្រឿង ហើយរថយន្តមិនទាន់អស់ល្បឿន ក៏បន្តទៅបុករថយន្តឃ្លុប ១ គ្រឿងទៀត ពាក់ស្លាកលេខ ភ្នំពេញ 3F-8775 បណ្ដាលឲ្យកៀបជាប់ជនរងគ្រោះជាតៃកុងរថយន្តឃ្លុបនៅក្នុងរថយន្តអូសជាង ២០ ម៉ែត្រ បន្តបុកកង់បី ១ គ្រឿងទៀត។

ប្រភពដដែល បានបន្តថា ភ្លាមៗ នោះ តៃកុងរថយន្តដឹកប្រេង ក៏បានចុះពីរថយន្ត រួចរត់គេចខ្លួនបាត់។ បន្ទាប់មក កងប្រតិបត្តិការរុករក និងសង្រ្គោះគ្រោះមហន្តរាយ ៧១១ កងពលតូចលេខ ៧០ ក៏បានចុះមកអន្តរាគមន៍កាត់យកជនរងគ្រោះទៅមន្ទីរពេទ្យ។