Ronaldo កំពុងជួបហានិភ័យបង្ហាញខ្លួននៅ World Cup 2026 ក្រោយរបួសវិវត្តធ្ងន់ធ្ងរ

ខ្សែប្រយុទ្ធរបស់ក្រុម Al-Nassr កីឡាករ Cristiano Ronaldo កំពុងស្ថិតក្នុងភាពស្រពិចស្រពិល សម្រាប់ការត្រៀមខ្លួនជាមួយក្រុមជម្រើសជាតិ ព័រទុយហ្គាល់ ក្នុងព្រឹត្តិការណ៍បាល់ទាត់ជើងឯកពិភពលោក World Cup 2026 បន្ទាប់ពីមានសេចក្តីរាយការណ៍ចុងក្រោយនៃបញ្ហារបួសសាច់ដុំភ្លៅក្រោយរបស់គាត់បានវិវត្តទៅរកសភាពធ្ងន់ធ្ងរជាងការរំពឹងទុក។

របួសរបស់ខ្សែប្រយុទ្ធវ័យ ៤១ ឆ្នាំរូបនេះ បានកើតឡើងអំឡុងការប្រកួតរវាងក្រុម Al-Nassr ទល់នឹង Al-Fayha កាលពីថ្ងៃ អាទិត្យ ទី ១ ខែ មីនា ឆ្នាំ ២០២៦។ ដំបូងឡើយ របួសនេះត្រូវបានគេគិតថាមិនធ្ងន់ធ្ងរនោះទេ ប៉ុន្តែចុងក្រោយនេះ គ្រូបង្វឹកលោក Jorge Jesus បានបញ្ជាក់ ថា បច្ចុប្បន្នរបួសរបស់ Ronaldo បានវិវត្តទៅរកភាពធ្ងន់ធ្ងរជាងអ្វីដែលគេគិតពីដំបូង។

Ronaldo បានធ្វើដំណើរទៅកាន់ទីក្រុង ម៉ាឌ្រីត ប្រទេស អេស្ប៉ាញ ដើម្បីទទួលការព្យាបាលជាមួយអ្នកព្យាបាលផ្ទាល់ខ្លួនរបស់គាត់ ដោយធ្វើតាមដំណាក់កាល ពីការចាប់ផ្តើមស្ដារនីតិសម្បទា។ ក្លិប Al-Nassr ក៏បានបញ្ជាក់ផងដែរ ថា គាត់បានចាប់ផ្តើមកម្មវិធីស្ដាររាងកាយ ហើយនឹងត្រូវត្រួតពិនិត្យស្ថានភាពរៀងរាល់ថ្ងៃ។

ប្រធានក្រុមជម្រើសជាតិ ព័រទុយហ្គាល់ រូបនេះ នឹងត្រូវអវត្តមានការប្រកួតទល់នឹងក្រុម Neom S.C. នាយប់រំលងអាធ្រាត្រឈានចូលថ្ងៃ អាទិត្យ ទី ៨ ខែ មីនា ឆ្នាំ ២០២៦ ហើយគេនៅមិនទាន់អាចសន្មតបាននៅឡើយទេ ថា គាត់នឹងអាចវិលត្រឡប់មកទីលានវិញបាននៅពេលណា។ យ៉ាងណា ស្ថានភាពរបស់គាត់ ក៏ត្រូវបានគេព្រួយបារម្ភផងដែរ ដែលអាចនឹងប៉ះពាល់ដល់ការតំណាងឱ្យជម្រើសជាតិ ព័រទុយហ្គាល់ ក្នុងពាន World Cup 2026។

ពាក់ព័ន្ធនឹងរយៈពេលនៃការស្តារកាយសម្បទាអំពីរបួសសាច់ដុំភ្លៅមាន ៣ កម្រិត។ ប្រសិនបើរបួសស្ថិតនៅ៖

• កម្រិតទី១ (ស្រាល)៖ អាចសម្រាកប្រហែល ៣ សប្ដាហ៍

• កម្រិតទី២ (របួសមធ្យម)៖ អាចសម្រាកប្រហែល ១ ខែ ដល់ ២ ខែ

• កម្រិតទី៣ (ដាច់សរសៃសាច់ដុំទាំងស្រុង)៖ អាចសម្រាករហូតដល់ ៦ ខែ

គួរបញ្ជាក់ថា ព្រឹត្តិការណ៍ World Cup 2026 នៅសល់រយៈពេល ៣ ខែទៀតប៉ុណ្ណោះ ដែលនឹងចាប់ផ្តើមពីថ្ងៃទី ១១ ខែ មិថុនា ដល់ថ្ងៃទី ១៩ ខែ កក្កដា ឆ្នាំ ២០២៦៕

ប្រែសម្រួល៖ សេម កុសល
ប្រភព៖ Mundo Deportivo