ព័ត៌មានអន្ដរជាតិ

មន្ត្រីអឺរ៉ុបមិនពេញចិត្តសម្ដី លោក ហ្សេលេនស្គី វាយប្រហារមេដឹកនាំហុងគ្រី

បានផុស

២ ខែ មុន

នៅ

ថ្ងៃសៅរ៍ ៧ មីនា ២០២៦

ដោយ

គណៈកម្មការអឺរ៉ុបបានរិះគន់យ៉ាងខ្លាំងចំពោះប្រធានាធិបតីអ៊ុយក្រែន លោក វ៉ូឡូឌីមៀរ ហ្សេលេនស្គី ចំពោះការគំរាមកំហែងដល់នាយករដ្ឋមន្ត្រីហុងគ្រី លោក Viktor Orban ក្នុងជម្លោះលើប្រាក់កម្ចីរបស់សហភាពអឺរ៉ុបសម្រាប់ប្រទេសអ៊ុយក្រែន ចំនួន ៩០ពាន់លានអឺរ៉ូ (១០៤ ពាន់លានដុល្លារ) ដែលកំពុងត្រូវបានរារាំងដោយប្រទេសហុងគ្រី។

យោងតាមការស្រង់សម្តី អ្នកនាំពាក្យគណៈកម្មការអឺរ៉ុប លោក Olof Gill បាននិយាយនៅថ្ងៃសុក្រថា៖«យើងច្បាស់ណាស់ ក្នុងនាមជាគណៈកម្មការអឺរ៉ុប ភាសាប្រភេទនេះមិនអាចទទួលយកបានទេ។ មិនត្រូវមានការគំរាមកំហែងប្រឆាំងនឹងរដ្ឋជាសមាជិកសហភាពអឺរ៉ុបណាមួយទេ។ ជាពិសេស ការកើនឡើងនៃវោហាសាស័ព្ទពីគ្រប់ភាគី មិនមានជាប្រយោជន៍អ្វីសោះឡើយ។

លោក Olof Gill ក៏បានអំពាវនាវឲ្យភាគីទាំងពីរ «បន្ថយ» ជម្លោះវោហាស័ព្ទដ៏មុតស្រួចរៀងៗខ្លួនរបស់ពួកគេ។

លោក ហ្សេលេនស្គី បានវាយប្រហារលោក Orbán កាលពីថ្ងៃព្រហស្បតិ៍ទី៥មីនា នៅឯកិច្ចប្រជុំរដ្ឋាភិបាលនៅទីក្រុងកៀវថា «បុគ្គលម្នាក់ដែលរារាំងប្រាក់កម្ចីចំនួន ៩០ពាន់លានអឺរ៉ូ (១០៤ ពាន់លានដុល្លារ) របស់សហភាពអឺរ៉ុបដល់អ៊ុយក្រែន សូមបញ្ឈប់។ បើមិនដូច្នោះទេ លោកនឹងផ្តល់អាសយដ្ឋានរបស់បុគ្គលនោះទៅយោធាអ៊ុយក្រែន ដើម្បីឲ្យពួកគេ និយាយជាភាសារបស់ពួកគេ»។

មេដឹកនាំអ៊ុយក្រែនបានសង្កត់ធ្ងន់ថា ប្រទេសរបស់លោកមិនមានជម្រើសផ្សេងក្រៅពីប្រាក់កម្ចីរបស់សហភាពអឺរ៉ុបទេ។ ប៉ុន្តែ លោកក៏មិនបាននិយាយឈ្មោះចំៗថា បុគ្គលរារាំងប្រាក់កម្ចីនោះជា នរណាឲ្យប្រាកដដែរ។ ប៉ុន្តែ ពាក្យសម្តីបែបនេះហាក់ដូចជាកំណត់គោលដៅលើនាយករដ្ឋមន្ត្រីហុងគ្រី លោក Viktor Orban ដែលកំពុងរារាំងប្រាក់កម្ចីរបស់សហភាពអឺរ៉ុបដល់អ៊ុយក្រែន។

ទោះជាយ៉ាងណា រដ្ឋាភិបាលនៅទីក្រុង Budapest បានចាត់ទុកសេចក្តីថ្លែងការណ៍ទាំងនោះថាជា «ការគំរាមកំហែងអាយុជីវិត» លោក Orban យ៉ាងខ្លាំងទៅវិញ៕

អត្ថបទ៖ សាង ស្រីល័ក្ខ