អាជ្ញាធរសង្កាត់ដង្កោ ចុះជួសជុលចាក់កំណាត់ផ្លូវបេតុង ឡើងវិញដែលរងការខូចខាត ប្រវែង១២ម៉ែត្រ

កាលពីថ្ងៃទី១៣ ខែមីនា ឆ្នាំ២០២៦ កំណាត់ផ្លូវបេតុង ក្នុងភូមិសំបួរ (ផ្លូវទៅបឹងតាម៉ាត) ប្រវែង១២ម៉ែត្រ ត្រូវបានជួសជុលឡើងវិញ ក្រោយរងការខូចខាត សម្រាប់សម្រួលបន្ទុកជូនពលរដ្ឋ ស្ថិតនៅភូមិសំបួរ (ផ្លូវទៅបឹងតាម៉ាត) សង្កាត់ដង្កោ ខណ្ឌដង្កោ រាជធានីភ្នំពេញ។

បើតាមការបញ្ជាក់ពី កញ្ញា ពេជ្ររចនា ជានិស្សិតនិងជាអ្នកធ្វើដំណើរឆ្លងកាត់ចំណុចនេះ បានលើកថា គាត់តែងជិះម៉ូតូ ទៅសាលារៀនរៀងរាល់ថ្ងៃ តែងជួបការលំបាក ដោយសារចំណុចផ្លូវបេតុងនេះមានជង្ហុកធំខ្លាំងពេក ដែលធ្វើអោយគាត់ ពេលជិះម៉ូតូឆ្លងចំណុចនេះ ត្រូវសម្លឹងមើលដោយប្រុងប្រយ័ត្នខ្ពស់ទើបមិន ជួបគ្រោះថ្នាក់។

លោក ហួរ ពលរដ្ឋរស់នៅក្បែរនោះ ក៏បានលើកឡើងថា កន្លែងនេះពេលយប់ឡើង មានអ្នកដំណើរបើកបរលឿនគួរសមដែរ និងពេលខ្លះមានអ្នកជិះធ្លាក់ជង្ហុកខាងលើនេះដួល ក៏មានដែរ ។ ពលរដ្ឋបន្តថា ក្រោយពេលមានអាជ្ញាធរចុះមកជួសជុលបែបនេះ លោកក៏ដូចជាពលរដ្ឋផ្សេងដទៃទៀត មានអារម្មណ៍សប្បាយចិត្តឡើងវិញ ដោយមិនចាំបាច់ កើតទុក្ខបញ្ហាផ្លូវខូចក្បែរផ្ទះពួកគាត់ទៀតនោះឡើយ ។ ជាមួយគ្នានោះ ពលរដ្ឋសូមកោតសរសើរ ចំពោះអាជ្ញាធរ លើការយកចិត្តទុកដាក់ ពីបញ្ហារបស់ប្រជាពលរដ្ឋ យកមកដោះស្រាយទាន់ពេលវេលា ដើម្បីដោះស្រាយ និងសម្រួលបន្ទុកដែលធ្លាប់ជួបកន្លងមក។

ពាក់ព័ន្ធការស្ថាបនាផ្លូវនេះដែរ ក្រុមការងារ កម្ពុជាថ្មី បានទំនាក់ទំនងជាមួយ លោកស្រី សឿង សេរី ចៅសង្កាត់ដង្កោ បានអោយដឹងថា បន្ទាប់ពីទទួលបានទទួលបាននូវព័ត៍មាន ពីពលរដ្ឋលោកស្រី បានអោយលោក លត់ ឃីម ចៅសង្កាត់រងទី១ និងចាត់អោយក្រុមការងារសង្កាត់ភូមិ ចុះជួសជុលផ្លូវបេតុងដែលខូចខាត  ប្រវែង ១២ម៉ែត្រ ទទឹង ៣,៦០ម៉ែត្រ ដើម្បីសម្រួលដល់ការធ្វើដំណើររបស់បងប្អូនប្រជាពលរដ្ឋ៕ អត្ថបទ ៖ រដ្ឋា