ព័ត៌មានជាតិ

ក្នុងស្ថានភាពប្រេងសាំងឡើងថ្លៃ ៖ សហជីព និងកម្មករ-និយោជិត ថ្លែងអំណរគុណ សម្ដេចធិបតី ដែលតែងតែយកចិត្តទុកដាក់រិះរកវិធីសម្រាលបន្ទុក

បានផុស

២ ខែ មុន

នៅ

ថ្ងៃសុក្រ ២០ មីនា ២០២៦

ដោយ

ក្រោយមានការណែនាំពី សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា សហជីព និងកម្មករ-និយោជិត នៅថ្ងៃទី ២០ ខែមីនា ឆ្នាំ ២០២៦ នេះ បានថ្លែងអំណរគុណដល់ សម្ដេច ដែលតែងតែយកចិត្តទុកដាក់ក្នុងការជួយអន្តរាគមន៍នៅក្នុងស្ថានភាពប្រេងឥន្ធនៈឡើងថ្លៃ ដើម្បីជួយសម្រាលបន្ទុកការចំណាយរបស់កម្មករ-និយោជិត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក សំ សឿន ប្រធានសហភាពពលកម្មជាតិកម្ពុជា បានថ្លែងថា លោកគាំទ្រចំពោះចំណាត់ការរបស់ សម្ដេចធិបតី បានណែនាំដល់ក្រសួងការងារ និងបណ្ដុះបណ្ដាលវិជ្ជាជីវៈ ជួបប្រជុំជាមួយសហជីព តំណាងសមាគមរោងចក្រ ដើម្បីរកដំណោះស្រាយ នៃការឡើងតម្លៃប្រេងឥន្ធនៈ ដែលជាបញ្ហាសកលលោក ខណៈកម្ពុជាក៏ទទួលរងនូវផលប៉ះពាល់នេះដែរ។

លោកបន្តថា ប្រមុខរាជរដ្ឋាភិបាលកម្ពុជា តែងតែគិតគូរពីដំណោះស្រាយជូនប្រជាពលរដ្ឋ និងកម្មករ-និយោជិត បានទាន់ពេលវេលា ដើម្បីឆ្លើយតបទៅនឹងបញ្ហាសកលនេះ។ ដំណោះស្រាយនេះ នឹងជួយសម្រាលបន្ទុកការចំណាយរបស់កម្មករ-និយោជិត ដែលជាការរួមចំណែកដ៏សំខាន់ក្នុងការលើកកម្ពស់ជីវភាពរបស់ពួកគាត់។

លោកបញ្ជាក់ថា «‍ជួសមុខឲ្យកម្មករ-និយោជិត ខ្ញុំជាថ្នាក់ដឹកនាំសហជីព សូមគោរពថ្លែងអំណរគុណដល់ សម្ដេចមហាបវរធិបតី ដែលបានយកចិត្តទុកដាក់ខ្ពស់ចំពោះបញ្ហានេះ ជាពិសេសក្រសួងការងារ និងបណ្ដុះបណ្ដាលវិជ្ជាជីវៈ បានជួបប្រជុំជាមួយភាគីពាក់ព័ន្ធ ដើម្បីរកដំណោះស្រាយនេះ។ ការគិតគូររបស់រាជរដ្ឋាភិបាលនេះ គឺសំខាន់ខ្លាំងណាស់ជួយដល់ដោះស្រាយបញ្ហាជីវភាពបងប្អូនកម្មករ-និយោជិតរបស់យើងនៅក្នុងស្ថានភាពនេះ»។

អ្នកស្រី សុខា លីនដា កម្មកររោងចក្រ ដុង ឌូ ស្ថិតនៅរាជធានីភ្នំពេញ បានសម្ដែងក្ដីរីករាយថា «ខ្ញុំសូមថ្លែងអំណរគុណយ៉ាងជ្រាលជ្រៅចំពោះរាជរដ្ឋាភិបាលដែលតែងតែយកចិត្តទុកដាក់ និងអន្តរាគមន៍ទាន់ពេលវេលា ដើម្បីបន្ធូរបន្ថយបញ្ហាតម្លៃប្រេងឥន្ធនៈឡើងថ្លៃ ដែលអាចជួយសម្រួលដល់ការចំណាយប្រចាំថ្ងៃ និងរក្សាស្ថិរភាពជីវភាពរបស់យើងខ្ញុំបានល្អប្រសើរឡើងក្នុងស្ថានភាពលំបាកបច្ចុប្បន្ននេះ»។

នាថ្ងៃទី ១៩ ខែមីនា ឆ្នាំ ២០២៦ នេះ សម្តេចធិបតី បានណែនាំឲ្យ លោក ហេង សួរ រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ បើកកិច្ចប្រជុំពិភាក្សាជាបន្ទាន់ជាមួយភាគីពាក់ព័ន្ធ ដើម្បីស្វែងរកលទ្ធភាពជួយសម្រាលបន្ទុកចំណាយថ្លៃធ្វើដំណើររបស់កម្មករ-និយោជិត។

សម្តេចធិបតី បានបញ្ជាក់ថា «ដើម្បីពិនិត្យដោះស្រាយផលវិបាកដែលកើតចេញពីការកើនឡើងតម្លៃប្រេងឥន្ធនៈជាសកលនាពេលថ្មីៗ នេះ ខ្ញុំបានណែនាំឲ្យ លោក ហេង សួរ រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ រៀបចំកិច្ចប្រជុំជាមួយតំណាងភាគីនិយោជក និងភាគីសហជីព ដែលតំណាងបងប្អូនកម្មករ-និយោជិត ដើម្បីពិនិត្យពិភាក្សាស្វែងរកលទ្ធភាពជួយសម្រាលបន្ទុកចំណាយថ្លៃធ្វើដំណើររបស់បងប្អូនកម្មករ-និយោជិតយើង នៅក្នុងរយៈពេលអន្តរកាលនេះឲ្យបានឆាប់បំផុត»។

សម្តេចមហាបវរធិបតី ហ៊ុន ម៉ាណែត ក៏បានបង្ហាញក្តីសង្ឃឹមថា ភាគីនិយោជក និងភាគីសហជីព នឹងអាចរកបាននូវចំណុចប្រសព្វសមរម្យមួយដែលអាចជួយសម្រាលបន្ទុកថ្លៃធ្វើដំណើររបស់កម្មករផង និងអាចរក្សាបាននូវភាពប្រកួតប្រជែង នៃឧស្សាហកម្មផងដែរ៕