ប្រធានស្ដីទីព្រឹទ្ធសភា បញ្ជាក់ជាថ្មីពីឆន្ទៈរបស់រដ្ឋាភិបាលកម្ពុជាចំពោះកិច្ចសហការជាមួយកូរ៉េក្នុងការប្រឆាំង Scams  

លោក អ៊ុច បូររិទ្ធ ប្រធានស្ដីទីព្រឹទ្ធសភាបញ្ជាក់ជាថ្មីទៅកាន់ភាគីកូរ៉េខាងត្បូងពីឆន្ទៈរបស់រាជរដ្ឋាភិបាលកម្ពុជាក្នុងការបន្តបង្ក្រាបអំពើឆបោកតាមប្រព័ន្ធបច្ចេកវិទ្យា (Online Scams) ឱ្យអស់ពីប្រទេស។ ដោយ Online Scams បានក្លាយជាបញ្ហារួមរបស់ពិភពលោក លោក អ៊ុច បូររិទ្ធ បានសង្កត់ធ្ងន់ពីភាពបាច់ចាំសម្រាប់កិច្ចសហការពីគ្រប់ភាគី ដើម្បីរួមគ្នាប្រយុទ្ធប្រឆាំងនឹងឧក្រិដ្ឋកម្មបច្ចេកវិទ្យាមួយនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការបញ្ជាក់របស់ប្រធានស្ដីទីព្រឹទ្ធសភា បានធ្វើឡើងនៅក្នុងជំនួបជាមួយលោក KIM Chang Yong ឯកអគ្គរដ្ឋទូតកូរ៉េខាងត្បូងប្រចាំកម្ពុជា កាលពីព្រឹកថ្ងៃទី២៥ ខែមីនា ឆ្នាំ២០២៦ នៅវិមានសាមគ្គីភាពនៃព្រឹទ្ធសភា។ ក្នុងជំនួបនោះ លោក អ៊ុច បូររិទ្ធ និងលោក KIM Chang Yong បានពិភាក្សាពីទំនាក់ទំនង និងកិច្ចសហប្រតិបត្តិការទ្វេភាគីរវាងកម្ពុជា-កូរ៉េ ជាមួយនឹងការលើកឡើងពីបញ្ហា Online Scams។

ទាក់ទងបញ្ហា Online Scams ភាគីទាំងពីរ បានវាយតម្លៃខ្ពស់ចំពោះកិច្ចសហប្រតិបត្តិការរវាងកម្ពុជា និងកូរ៉េខាងត្បូង ក្នុងការប្រយុទ្ធប្រឆាំងនឹងបទល្មើសឆបោកតាមប្រព័ន្ធអនឡាញ ដែលកន្លងមក លោក ថា ទទួលបានលទ្ធផលជាក់ស្តែងគួរឱ្យកត់សម្គាល់។ លោក អ៊ុច បូររិទ្ធ គូសបញ្ជាក់ថា កម្ពុជា បន្តគាំទ្រ និងយកចិត្តទុកដាក់ខ្ពស់ចំពោះកិច្ចសហប្រតិបត្តិការនេះ ដោយចាត់ទុកថា បទល្មើសឆបោកអនឡាញជាបញ្ហាសកល ដែលទាមទារឱ្យមានការសហការយ៉ាងជិតស្និទ្ធពីបណ្តាប្រទេសពាក់ព័ន្ធ។

ក្នុងករណី Scams នេះ កម្ពុជា និងកូរ៉េខាងត្បូង តាមរយៈកងកម្លាំងអនុវត្តច្បាប់នៃប្រទេសទាំងពីរ បានចាប់ដៃគ្នាយ៉ាងស្អិតរមួតក្នុងការការបង្ការ ទប់ស្កាត់ និងបង្ក្រាបបទល្មើសប្រភេទនេះ ដែលកើតមានក្នុងប្រទេសកម្ពុជា និងកូរ៉េខាងត្បូង។ ប៉ូលិសជាតិកម្ពុជា និងប៉ូលិសជាតិកូរ៉េ បានបង្កើតក្រុមការងាររួមមួយ Task Force ក្នុងបំណងពង្រឹងកិច្ចសហប្រតិបត្តិការក្នុងវិស័យសន្តិសុខ ជាពិសេសផ្ដោតលើប្រយុទ្ធប្រឆាំងឧក្រិដ្ឋកម្មឆ្លងដែននានា រាប់ទាំងបទល្មើសឆបោកតាមប្រព័ន្ធបច្ចេកវិទ្យា ដែលជាប់ពាក់ព័ន្ធជាមួយជនជាតិកូរ៉េនៅកម្ពុជា។

នាយករដ្ឋមន្ត្រីកម្ពុជា សម្ដេចធិបតី ហ៊ុន ម៉ាណែត ធ្លាប់បានប្រកាសថា កម្ពុជាគឺបានប្ដូរទិសដៅពីការទប់ស្កាត់ឧក្រិដ្ឋកម្មឆបោកតាមអនឡាញទៅជាការលុបបំបាត់ឱ្យអស់ពីកម្ពុជា នៅត្រឹមខែមេសា ឆ្នាំ២០២៦។ តែក្នុងន័យនេះ សម្ដេចធិបតីនាយករដ្ឋមន្រ្តី បានអះអាងថា ការបោសសម្ពាត Online Scams នៅកម្ពុជា ពុំមែនបញ្ចប់យុទ្ធនាការត្រឹមតែខែមេសាខាងមុខនោះឡើយ គឺបន្តធ្វើជាប់ជាប្រចាំ ដើម្បីសេដ្ឋកិច្ចសង្គមកម្ពុជា៕

ដោយ៖ ធឿន វ៉ាន់សុង