រដ្ឋបាលខេត្តមណ្ឌលគិរី សហការជាមួយវិស័យឯកជន ចែកអំណោយជូនពលរដ្ឋខ្វះខាត ៤០០ គ្រួសារ

រដ្ឋបាលខេត្តមណ្ឌលគិរី សហការជាមួយវិស័យឯកជនដែលកំពុងវិនិយោគនៅតំបន់ភូមិភាគឦសាន បានរៀបចំកម្មវិធីសប្បុរសធម៌ ចែកអំណោយជូនប្រជាពលរដ្ឋដែលមានជីវភាពខ្វះខាតចំនួន ៤០០ គ្រួសារ ក្នុងឱកាសបុណ្យចូលឆ្នាំប្រពៃណីជាតិខ្មែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ពិធីនេះបានប្រព្រឹត្តទៅនៅថ្ងៃទី១០ ខែមេសា ឆ្នាំ២០២៦ ក្រោមអធិបតីភាព លោក ថង សាវុន អភិបាលខេត្ត និងលោក CHEN HEJIAN អគ្គនាយកក្រុមហ៊ុន ម៉ឹងទ័រជីលី ហ្ស្វុងហ្គូស៊ាងម៉ៅឆេង ព្រមទាំងមានការចូលរួមពីមន្រ្តីរាជការជុំវិញខេត្ត។ កម្មវិធីនេះត្រូវបានរៀបចំឡើងនៅផ្សារទំនើបទីក្រុងពាណិជ្ជកម្មចិនមណ្ឌលគិរី ក្នុងក្រុងសែនមនោរម្យ ខេត្តមណ្ឌលគិរី។

ក្នុងឱកាសនោះ លោក ថង សាវុន អភិបាលខេត្តមណ្ឌលគិរី បានមានប្រសាសន៍ថា ក្នុងនាមថ្នាក់ដឹកនាំខេត្ត លោកមានសេចក្តីសោមនស្សរីករាយយ៉ាងខ្លាំងចំពោះវត្តមានក្រុមហ៊ុនដែលបានមកវិនិយោគនៅលើទឹកដីខេត្តមណ្ឌលគិរី និងបានចូលរួមសហការជាមួយអាជ្ញាធរក្រុងសែនមនោរម្យ និងរដ្ឋបាលខេត្ត ក្នុងការផ្តល់អំណោយសប្បុរសធម៌ជូនប្រជាពលរដ្ឋដែលមានជីវភាពខ្វះខាតចំនួន ៤០០ គ្រួសារ ដើម្បីអបអរសាទរពិធីបុណ្យចូលឆ្នាំប្រពៃណីជាតិខ្មែរ ដែលនឹងមកដល់ក្នុងពេលឆាប់ៗនេះ។

លោកក៏បានជំរុញឲ្យក្រុមហ៊ុនបន្តពង្រីកការវិនិយោគរបស់ខ្លួនបន្ថែមទៀត ដើម្បីរួមចំណែកលើកស្ទួយសេដ្ឋកិច្ចក្នុងតំបន់ឲ្យកាន់តែរីកចម្រើន។ ជាមួយគ្នានេះ លោកក៏បានសង្កត់ធ្ងន់ថា ជនបរទេសណាដែលមកវិនិយោគ និងផ្តល់អត្ថប្រយោជន៍ដល់ប្រជាពលរដ្ឋ ត្រូវបានគាំទ្រយ៉ាងពេញទំហឹង។ ដោយឡែក សម្រាប់ជនបរទេសដែលបើកក្រុមហ៊ុន ឬធ្វើអាជីវកម្មណាមួយដែលបង្កផលប៉ះពាល់ដល់សន្តិសុខ និងសណ្ដាប់ធ្នាប់សង្គម នឹងមិនត្រូវបានអនុញ្ញាតជាដាច់ខាតឡើយ។

សូមជម្រាបថា ប្រជាពលរដ្ឋចំនួន ៤០០ គ្រួសារ ដែលទទួលបានអំណោយសប្បុរសធម៌ពីអគ្គនាយកក្រុមហ៊ុនផ្សារទំនើបពាណិជ្ជកម្មចិនខេត្តមណ្ឌលគិរី ក្នុងមួយគ្រួសារ ទទួលបាន មី ២ កេស ទឹកសុទ្ធ ១ កេស អង្ករ ១ បាវ ប្រេងឆា ១ ប៊ីដុង និងថវិកាចំនួន ១០ ដុល្លារ៕

អត្ថបទ៖ រៀម សុខហេង