វៀតណាមកាត់ពន្ធលើប្រេងឥន្ធនៈទាំងអស់​ត្រឹម ០% ដល់ខែមិថុនា

រដ្ឋសភាវៀតណាម (NA) បានអនុម័តការកាត់បន្ថយពន្ធទាក់ទងនឹង​​ប្រេង​ឥន្ធនៈទាំងអស់ដល់សូន្យភាគរយ (០%) រហូតដល់ថ្ងៃទី ៣០​ ខែមិថុនា​ ដើម្បី​បន្ធូរបន្ថយសម្ពាធតម្លៃ ធ្វើឱ្យទីផ្សារមានស្ថិរភាព និងគាំទ្រដល់​កំណើន​សេដ្ឋកិច្ច ​ចំពេលទីផ្សារ​ថាមពលសកលធ្លាក់ចូលទៅក្នុងអស្ថិរភាពធ្ងន់ធ្ងរ។ នេះបើតាមការចុះផ្សាយរបស់បណ្ដាញកាសែត VnExpress។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ពន្ធទាំងអស់លើសាំង ប្រេង និងប្រេងឥន្ធនៈអាកាសចរណ៍ រួមទាំងពន្ធការពារបរិស្ថាន ពន្ធលើតម្លៃបន្ថែម (VAT) និងពន្ធលើការប្រើប្រាស់ពិសេស នឹងត្រូវកាត់បន្ថយមកត្រឹមសូន្យ ក្រោមសេចក្តីសម្រេចដែលអនុម័តដោយរដ្ឋសភាកាលពីថ្ងៃអាទិត្យ។ ​

គោលនយោបាយនេះ នឹងចូលជាធរមាន​ចន្លោះពីថ្ងៃទី ១៦ មេសា ដល់ថ្ងៃទី ៣០ មិថុនា។

អាជីវកម្ម និងអ្នកនាំចូលប្រេងសាំង ផលិតផលប្រេង ​រួមទាំងប្រេងម៉ាស៊ូត ប្រេង Kerosene និងប្រេង Mazut និងប្រេង យន្តហោះ នឹងមិនតម្រូវឱ្យប្រកាស ឬបង់ពន្ធលើតម្លៃបន្ថែម (VAT) នៅដំណាក់កាលនាំចូល ឬដំណាក់កាលលក់នោះទេ។

ក្នុងស្ថានភាពអាសន្ន រដ្ឋាភិបាលអាចកែសម្រួលរយៈពេលនៃគោលនយោបាយ ​ ហើយ​រាយការណ៍ទៅរដ្ឋសភានៅសម័យប្រជុំដែលនៅ​ជិតបំផុត។

គេមើលឃើញថា ជម្លោះដែលកំពុងបន្ត​នៅមជ្ឈិមបូព៌ា បានប៉ះពាល់យ៉ាងខ្លាំងដល់ទីផ្សារថាមពលពិភពលោក រួមទាំង​វៀតណាមផងដែរ ដែលជំរុញឱ្យតម្លៃប្រេងឥន្ធនៈកើនឡើង។

ជាការឆ្លើយតប រដ្ឋាភិបាលវៀតណាម​បានដាក់ចេញវិធានការផ្សេងៗ ​ដើម្បីគ្រប់គ្រងតម្លៃប្រេងឥន្ធនៈ និងគាំទ្រដល់អាជីវកម្ម និងអ្នកប្រើប្រាស់ រួមទាំងការប្រើប្រាស់មូលនិធិស្ថិរភាពតម្លៃ​ជាដើម៕