ថ្ងៃចូលឆ្នាំទី១ អាវុធហត្ថក្រុងក្រចេះ បង្ក្រាបក្រុមក្មេងទំនើង ១២នាក់ ដកហូតម៉ូតូ១១គ្រឿង

កម្លាំងអាវុធហត្ថក្រុងក្រចេះ ដឹកនាំផ្ទាល់ដោយលោក ទេព ដារ៉ា មេបញ្ជាការកងរាជអាវុធហត្ថក្រុងក្រចេះ បានធ្វើការបង្ក្រាបក្រុមក្មេងទំនើងចំនួន ១២នាក់ ដែលបានប្រើប្រាស់ម៉ូតូកែច្នៃបំពង់ស៊ីម៉ាំងខុសបច្ចេកទេស និងបើកបរក្នុងល្បឿនលឿនក្នុងទីប្រជុំជន ដែលធ្វើឲ្យប៉ះពាល់ដល់សណ្ដាប់ធ្នាប់សាធារណៈ ក្នុងឱកាសពិធីបុណ្យចូលឆ្នាំថ្មីប្រពៃណីជាតិ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងការចុះបង្ក្រាបនេះ ធ្វើឡើងនារសៀលថ្ងៃទី១៤ ខែមេសា ឆ្នាំ២០២៦ ជាថ្ងៃទី១នៃវិធីបុណ្យចូលឆ្នាំ ថ្មីប្រពៃណីជាតិ។ ក្នុងនោះឃាត់ខ្លួនបានក្រុមក្មេងទំនើងចំនួន ១២នាក់ និងម៉ូតូកែច្នៃបំពង់ស៊ីម៉ាំងលឺខ្លាំង ខុសបច្ចេកទេសចំនួន ១១គ្រឿង។

សមត្ថកិច្ចបានបញ្ជាក់ឲ្យដឹងថា ក្មេងទំនើងទាំងអស់ រួមទាំងម៉ូតូ ត្រូវបានបញ្ជូនមកបញ្ជាការដ្ឋានកងរាជអាវុធហត្ថខេត្តក្រចេះ ដើម្បីធ្វើការអប់រំណែនាំ ដោយក្នុងការណែនាំនោះ ត្រូវឃាត់ខ្លួនមនុស្ស រយៈពេល ៤៨ម៉ោង។

យោងតាមរបាយការណ៍ ក្នុងត្រីមាសទី១ ឆ្នាំ២០២៦ កងរាជអាវុធហត្ថខេត្តក្រចេះ បង្ក្រាបករណីក្មេងទំនើង បានចំនួន១៦លើក ឃាត់ក្មេងទំនើង ៤០នាក់ ម៉ូតូ ៣៦គ្រឿង។ ចំពោះក្មេងទំនើង ប្រើវិធានការអប់រំ អាណាព្យាបាលធានាយកទៅអប់រំបន្តនៅផ្ទះ បន្ទាប់ពីឃាត់ខ្លួន ៤៨ម៉ោង។ ចំពោះវត្ថុតាង ម៉ូតូ ដែលខុសលក្ខណៈបច្ចេកទេស បានឃាត់ទុករយៈពេលមួយខែ ទើបឱ្យម្ចាស់យកសម្ភារៈមកដោះដូរតាមលក្ខណៈបច្ចេកទេសទើបប្រគល់ជូនវិញ៕

អត្ថបទ៖ ប្រុញ វិធិន