ព័ត៌មានអន្ដរជាតិ

ប្រធានាធិបតី អាអូន៖ លីបង់លែងធ្វើជាកូនអុកសម្រាប់សង្វៀនប្រយុទ្ធទៀតហើយ

បានផុស

៦ ថ្ងៃ មុន

នៅ

ថ្ងៃសៅរ៍ ១៨ មេសា ២០២៦

ដោយ

ប្រធានាធិបតីលីបង់ លោក ចូសេហ្វ អាអូន (Joseph Aoun) បានលើកឡើងថា ប្រទេសរបស់លោកកំពុងស្ថិតក្នុងដំណាក់កាលថ្មីមួយឆ្ពោះទៅរកកិច្ចព្រមព្រៀងសន្តិភាពអចិន្ត្រៃយ៍ បន្ទាប់ពីបទឈប់បាញ់រយៈពេល១០ថ្ងៃដ៏កម្របំផុត រវាងអ៊ីស្រាអែល-ក្រុមហេសបូឡា (Hezbollah) ចូលជាធរមានចាប់តាំងពីថ្ងៃព្រហស្បតិ៍។

យោងតាមសារព័ត៌មាន AFP និង CNA ផ្សាយថ្ងៃទី១៨ ខែមេសា ឆ្នាំ២០២៦ នៅក្នុងសេចក្តីថ្លែងការណ៍មួយទៅកាន់ប្រជាជនលីបង់នៅមួយថ្ងៃ បន្ទាប់ពីប្រធានាធិបតីអាមេរិក លោក ដូណាល់ ត្រាំ បានប្រកាសអំពីបទឈប់បាញ់ លោក អាអូន និយាយថា៖ « ប្រទេសលីបង់លែងជាសង្វៀនសម្រាប់សង្គ្រាមរបស់នរណាម្នាក់ទៀតហើយ»។

**ប្រធានាធិបតីលីបង់ លោក Joseph Aoun. រូបភាព៖ Reuters**

ប្រទេសលីបង់ត្រូវបានអូសទាញចូលទៅក្នុងជម្លោះនៅមជ្ឈិមបូព៌ាចាប់តាំងពីថ្ងៃទី០២ ខែមីនា នៅពេលដែលក្រុមហេសបូឡា ដែលគាំទ្រដោយទីក្រុងតេហេរ៉ង់ វាយប្រហារអ៊ីស្រាអែល ដើម្បីសងសឹកចំពោះការស្លាប់របស់អតីតមេដឹកនាំកំពូលអ៊ីរ៉ង់ លោក អាយ៉ាតូឡាស់ អាលី ខាមេណៃ (Ayatollah Ali Khamenei)។

ជាការឆ្លើយតបចំពោះការបាញ់ប្រហាររបស់ក្រុមហេសបូឡា ភាគីអ៊ីស្រាអែល បានបើកការបាញ់ប្រហារច្រើនលើកច្រើនសារលើប្រទេសលីបង់ និងបើកការវាយលុកតាមជើងគោក ដោយសម្លាប់មនុស្សជិត ២ ៣០០នាក់ របួសជាង៧០០០នាក់ និងបណ្តេញជនស៊ីវិលជាង១លាននាក់ចេញពីផ្ទះរបស់ពួកគេក្នុងរយៈពេលជាង១ខែចុងក្រោយនេះ។

ប្រធានាធិបតី អាអូន បានលើកឡើងក្នុងសុន្ទរកថាដំបូងរបស់លោកទៅកាន់ប្រជាជាតិចាប់តាំងពីបទឈប់បាញ់មកថា៖ «ឥឡូវនេះ! យើងទាំងអស់គ្នាកំពុងឈរនៅដំណាក់កាលថ្មីមួយ។ វាគឺជាដំណាក់កាលនៃការផ្លាស់ប្តូរ លើបទឈប់បាញ់ ទៅជាកិច្ចព្រមព្រៀងអចិន្ត្រៃយ៍ដែលរក្សាសិទ្ធិរបស់ប្រជាជន ឯកភាពនៃទឹកដី និងអធិបតេយ្យភាពរបស់ប្រជាជាតិយើង»។

ប្រធានាធិបតីរូបនេះបន្ថែមថា៖ « រដ្ឋាភិបាលលីបង់បានទាមទារយក សិទ្ធិអំណាចសម្រេចចិត្តរបស់ប្រទេសលីបង់មកវិញ វាជាលើកដំបូងសម្រាប់ប្រទេសយើង ក្នុងរយៈពេលជិតកន្លះសតវត្សរ៍មកនេះ។ ថ្ងៃនេះ(ទី១៧ ខែមេសា) យើងចរចាដើម្បីខ្លួនយើង[…] យើងលែងជាកូនអុកក្នុងល្បែងរបស់នរណាម្នាក់ទៀតហើយ ហើយក៏មិនមែនជាសង្វៀនសម្រាប់សង្គ្រាមរបស់នរណាម្នាក់ដែរ ហើយយើងក៏មិនធ្វើម្តងទៀតដែរ»៕

ប្រែសម្រួល៖ ណឺ មិនា