និស្សិតឆ្នាំទី៣ នៃសាកលវិទ្យាល័យភូមិន្ទភ្នំពេញមានឱកាសទទួលបានអាហារូបករណ៍ ១,២០០ដុល្លារសម្រាប់១ឆ្នាំសិក្សា

ដើម្បីជួយសម្រួលដល់ការសិក្សា Mitsubishi UFJ Foundation Scholarship នឹងផ្តល់អាហារូបករណ៍ថ្មី ចំនួន ៦កន្លែង ជាទឹកប្រាក់ចំនួន ១,២០០ដុល្លារអាមេរិកសម្រាប់មួយឆ្នាំសិក្សា ដល់និស្សិតឆ្នាំទី៣ ដែលកំពុងសិក្សានៅសាកលវិទ្យាល័យភូមិន្ទភ្នំពេញ ក្នុងឆ្នាំសិក្សា ២០២៥-២០២៦។ នេះបើតាមសេចក្តីជូនដំណឹងរបស់សាកលវិទ្យាល័យភូមិន្ទភ្នំពេញ តាមរយៈការិយាល័យទំនាក់ទំនងអន្តរជាតិសាកលវិទ្យាល័យភូមិន្ទភ្នំពេញ នារសៀលថ្ងៃទី២០ ខែមេសា។

ចំពោះលក្ខខណ្ឌនៃការជ្រើសរើស គឺនិស្សិតដែលកំពុងសិក្សាឆ្នាំទី៣ នៃសាកលវិទ្យាល័យភូមិន្ទភ្នំពេញ ក្នុងឆ្នាំសក្សា ២០២៥-២០២៦។ ជានិស្សិតដែលមានពិន្ទុសិក្សាល្អ CGPA ៣.០០ ឡើងទៅ។ និស្សិតមានសុខភាពផ្លូវកាយ ផ្លូវចិត្ត អត្តចរិត និងបុគ្គលិកលក្ខណៈល្អ។ ជាមួយគ្នានេះ គឺជានិស្សិតដែលមានចំណេះដឹងពីប្រទេសជប៉ុន និងមានបំណងចង់បន្តការសិក្សានៅប្រទេសជប៉ុនបន្ទាប់ពីបញ្ចប់ថ្នាក់បរិញ្ញាបត្រ។ សម្រាប់បេក្ខភាពនិស្សិតដែលចង់ដាក់អាហារូបករណ៍នេះ ជានិស្សិតដែលពុំធ្លាប់ទទួលបានអាហារូបករណ៍ពីស្ថាប័នណាមួយ លើកលែងតែអាហារូបករណ៍របស់ក្រសួងអប់រំ។

តើនិស្សិតគួរភ្ជាប់ឯកសារអ្វីខ្លះដើម្បីដាក់ពាក្យអាហារូបករណ៍នេះ? តាមសេចក្តីជូនដំណឹងរបស់សាកលវិទ្យាល័យបញ្ជាក់ថា និស្សិតត្រូវភ្ជាប់មកនូវឯកសារមួយចំនួន ដូចជា ជីវប្រវត្តិសង្ខេបនិស្សិត ១ច្បាប់, ព្រឹត្តិបត្រពិន្ទុដែលបញ្ជាក់ពិន្ទុរាល់ឆមាស (ច្បាប់ដើម) ១ច្បាប់, វិញ្ញាបនបត្រដែលបញ្ជាក់ការសិក្សានិស្សិត (ច្បាប់ដើម) ១ច្បាប់។ បន្ថែមពីនេះ និស្សិតតម្រូវឱ្យសរសេរសំណេរពណ៌នាពីខ្លួនឯង រួមជាមួយគោលដៅសិក្សា ការងារ និងគម្រោងដែលនិស្សិតប្រាថ្នានាពេលអនាគតជាភាសាអង់គ្លេសមិនតិចជាង ៤០០ពាក្យ។

និស្សិត តម្រូវឱ្យភ្ជាប់មកជាមួយនូវឯកសារដែលមានបញ្ជាក់ខាងលើ រួចយកទៅដាក់ពាក្យនៅការិយាល័យទំនាក់ទំនងអន្តរជាតិសាកលវិទ្យាល័យភូមិន្ទភ្នំពេញ បន្ទប់ ២១៩A ជាន់ទី២ អគារA រៀងរាល់ម៉ោងធ្វើការ ចាប់ពីថ្ងៃជូនដំណឹង ដល់ថ្ងៃទី២៩ ខែឧសភា ឆ្នាំ២០២៦ ត្រឹមម៉ោង ១៦៖៤៥នាទីរសៀល៕