កីឡា

អ្នកគាំទ្រប្រមាណ ១០០ នាក់ មានទាំងថ្នាក់ដឹកនាំ ទៅលើកទឹកចិត្ត ព្រះខ័នរាជស្វាយរៀង ផ្ទាល់

បានផុស

២ ខែ មុន

នៅ

ថ្ងៃអង្គារ ១២ ឧសភា ២០២៦

ដោយ

ព្រះខ័នរាជស្វាយរៀង នឹងមានអ្នកគាំទ្រលើកទឹកចិត្តផ្ទាល់ប្រមាណ ១០០ នាក់ សម្រាប់ការប្រកួតវគ្គផ្តាច់ព្រ័ត្រ ពានរង្វាន់ AFC Challenge League ជាមួយក្រុម Kuwait SC វេលាម៉ោង ១១:៤៥ នាទីយប់ ម៉ោងនៅកម្ពុជា ថ្ងៃទី១៣ ខែឧសភា ឆ្នាំ ២០២៦ នៅប្រទេសគុយវ៉ែត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកស្រី សំ ថាវី ប្រធានអ្នកគាំទ្រផ្លូវការរបស់ក្លិបបាល់ទាត់ ព្រះខ័នរាជស្វាយរៀង បានប្រាប់«កម្ពុជាថ្មី»ថា ចំនួនបណ្តោះអាសន្នសិនដោយមិនទាន់រាប់បញ្ចូលថ្នាក់ដឹកនាំក្លិបបាល់ទាត់ព្រះខ័នរាជស្វាយរៀង ទៅពីប្រទេសកម្ពុជាគឺប្រហែលជាជិត ១០០នាក់។

លោកស្រីបានបញ្ជាក់ថា អ្នកដែលនឹងទៅមើលផ្ទាល់ភាគច្រើនគឺជានិស្សិត និងអ្នកធ្វើការនៅប្រទេសគុយវ៉ែត។ ជាពិសេស ឯកអគ្គរាជទូត និងមន្ត្រីទូតកម្ពុជាប្រចាំនៅប្រទេសគុយវ៉ែត ព្រមទាំងមិត្តភក្តិបរទេសមួយចំនួនទៀតដែលគាំទ្រក្លិប ព្រះខ័នរាជស្វាយរៀង។

នេះគ្រាន់តែអ្នកគាំទ្រដែលបានទៅទស្សនាផ្ទាល់តែប៉ុណ្ណោះ ប៉ុន្តែបើអ្នកគាំទ្រលើកទឹកចិត្តពីចម្ងាយគឺរាប់លាននាក់។ ប្រជាពលរដ្ឋកម្ពុជាទូទាំងប្រទេស ជាពិសេសអ្នកចូលចិត្តកីឡាបាល់ទាត់ គ្រប់ក្លិប និងគ្រប់ភាគីពាក់ព័ន្ធបាល់ទាត់សុទ្ធតែគាំទ្រក្លិបបបាល់ទាត់ ព្រះខ័នរាជស្វាយរៀងទាំងអស់។

ការប្រកួតវគ្គផ្តាច់ព្រ័ត្រនៅកីឡដ្ឋាន Jaber Al-Ahmad ដែលអាចផ្ទុកអ្នកទស្សនាផ្ទាល់ប្រមាណ ៦ ម៉ឺននាក់។ តម្លៃសំបុត្រមាន ២ ប្រភេទគឺ តម្លៃ ១០ ដុល្លារ និង ៣.៥ ដុល្លារ។

នៅចាំបានថា ការប្រកួតវគ្គផ្តាច់ព្រ័ត្រ ពានរង្វាន់ AFC Challenge League រដូវកាលមុននៅពហុកីឡដ្ឋានជាតិមរតកតេជោ បានបំបែកកំណត់ត្រាអ្នកគាំទ្រចូលទស្សនាផ្ទាល់ច្រើនបំផុតគឺចំនួន ៥១,៦១០នាក់ នៅក្នុងប្រវត្តិសាស្ត្រពានរង្វាន់អាស៊ីមួយនេះ។ ចាំមើលថា តើនៅប្រទេសគុយវ៉ែត អាចបំបែកកំណត់ត្រានៅកម្ពុជាបានដែរឬទេ?

នេះជាលើកទី ២ ហើយដែល ព្រះខ័នរាជស្វាយរៀង បានឡើងដល់វគ្គផ្តាច់ព្រ័ត្រ ពានរង្វាន់ AFC Challenge League បន្ទាប់ពីលើកទី១ កាលពីរដូវកាលមុន។ ចំណែក ក្រុម Kuwait SC ជាលើកទី១ ដែលពួកគេបានចូលរួមប្រកួតពានរង្វាន់កម្រិតទី៣ ប៉ុន្តែពួកគេមានប្រវត្តិប្រកូតពានរង្វាន់អាស៊ីកម្រិតទី១ និងទី២ ជោកជាំហើយ៕