ព័ត៌មានជាតិ

សម្រួលនីតិវិធីផ្តល់សេវាសាធារណៈនៅក្រសួងប្រៃសណីយ៍ បន្ថយរយៈពេលរង់ចាំនៅសល់តែ ៨ ម៉ោង និង ៧ ថ្ងៃ សម្រាប់បច្ចេកទេសខ្ពស់

បានផុស

២ ខែ មុន

នៅ

ថ្ងៃអង្គារ ១៩ ឧសភា ២០២៦

ដោយ

ក្រសួងប្រៃសណីយ៍ និងទូរគមនាគមន៍ បានចេញសេចក្តីណែនាំស្តីអំពីដំណើរការសម្រួលការផ្តល់សេវាសាធារណៈឲ្យបានកាន់តែល្អប្រសើរ និងមានប្រសិទ្ធភាព តាមរយៈការកាត់បន្ថយរយៈពេលនៃការផ្តល់សេវាសាធារណៈមិនឲ្យលើសពី ៨ ម៉ោង សម្រាប់សេវាដែលមានលក្ខណៈបច្ចេកទេសទាប និងមិនលើសពី ៧ ថ្ងៃ សម្រាប់សេវាសាធារណៈដែលមានលក្ខណៈបច្ចេកទេសខ្ពស់។

បើតាមសេចក្តីជូនដំណឹងរបស់ក្រសួងប្រៃសណីយ៍ និងទូរគមនាគមន៍ (ក.ប.ទ.) បានឲ្យដឹងថា ដោយពិនិត្យឃើញកន្លងមក ការផ្តល់សេវាសាធារណៈពាក់ព័ន្ធសេវាប្រៃសណីយ៍និងទូរគមនាគមន៍ មិនទាន់អាចឆ្លើយតបទាន់ពេលដោយអាចប្រើរយៈពេលរង់ចាំចាប់ពី ៣ ទៅ ១៥ ថ្ងៃ សម្រាប់សេវាសាធារណៈដែលមានលក្ខណៈបច្ចេកទេសទាប ឬ ១៦ ទៅ ៦០ ថ្ងៃ ក្នុងករណីសេវាដែលមានលក្ខណៈបច្ចេកទេសខ្ពស់ កាលពីថ្ងៃទី១៣ ខែមីនា ឆ្នាំ២០២៦ ក្រសួងប្រៃសណីយ៍និងទូរគមនាគមន៍ បានចាប់ផ្តើមអនុវត្តសាកល្បងលើការកែសម្រួលនីតិវិធី និងកាត់បន្ថយពេលវេលានៃការផ្តល់សេវាសាធារណៈឱ្យកាន់តែឆាប់រហ័ស និងមានប្រសិទ្ធភាព ដើម្បីឆ្លើយតបទៅនឹងតម្រូវការជាក់ស្តែងរបស់ប្រជាពលរដ្ឋ និងម្ចាស់អាជីវកម្ម ក្នុងបរិបទនៃយុគសម័យឌីជីថលដែលកំពុងរីកចម្រើនយ៉ាងឆាប់រហ័ស។

ផ្អែកលើបទពិសោធជោគជ័យក្នុងការអនុវត្តសាកល្បង ក្រសួងប្រៃសណីយ៍និងទូរគមនាគមន៍ បានសម្រេចពង្រីកវិសាលភាពបន្ថែមក្នុងការកែសម្រួលនីតិវិធី និងកាត់បន្ថយពេលវេលាលើការផ្តល់សេវាសាធារណៈទាំងអស់ដែលស្ថិតនៅក្រោមសមត្ថកិច្ចក្រសួងប្រៃសណីយ៍ និងទូរគមនាគមន៍សរុបចំនួន ១៥៨ ប្រភេទ ដូចខាងក្រោម៖

១. ការកំណត់រយៈពេលថ្មី

រយៈពេលនៃការផ្តល់សេវានឹងចាប់ផ្តើមគិតចាប់ពីពេល ដែលពាក្យស្នើសុំបានបំពេញគ្រប់លក្ខខណ្ឌរបស់សេវានីមួយៗ និងបានភ្ជាប់មកជាមួយឯកសារតម្រូវការចាំបាច់គ្រប់គ្រាន់ ដែលត្រូវកំណត់ដូចខាងក្រោម៖

– រយៈពេលមិនលើសពី ៨ ម៉ោងនៃថ្ងៃធ្វើការ ក្នុងការសម្រេចផ្តល់ជូនសម្រាប់សេវាសាធារណៈដែលមានលក្ខណៈបច្ចេកទេសទាប។
– រយៈពេលមិនលើសពី ៧ ថ្ងៃនៃថ្ងៃធ្វើការ ក្នុងការសម្រេចផ្តល់ជូនសម្រាប់សេវាសាធារណៈ ដែលមានលក្ខណៈបច្ចេកទេសខ្ពស់។