ជើងហោះហើរអន្ដរជាតិទាំងទៅ និងមកពី ឥណ្ឌា បន្តផ្អាករហូតដល់ចុងខែក្រោយ តែលើកលែងប្រតិបត្តិការដឹកជំនួយ

ក្រុមមន្រ្តីបាននិយាយនៅថ្ងៃសុក្រនេះថា ជើងហោះហើរពាណិជ្ជកម្មអន្តរជាតិ ទាំងទៅ និងមកពីប្រទេសឥណ្ឌា នឹងត្រូវផ្អាករហូតដល់ម៉ោង ២៣ និង ៥៩ នាទី ថ្ងៃទី ៣១ ខែឧសភា ។

យោងតាមសារាចរ ដែលចេញដោយអគ្គនាយក ឃ្លាំមើលអាកាសចរណ៍ស៊ីវិល (DGCA) របស់ប្រទេសនៅថ្ងៃសុក្រនេះ បានឲ្យដឹងថា ការរឹតត្បិតនេះ មិនបានអនុវត្តចំពោះ ប្រតិបត្តិការដឹកទំនិញអន្តរជាតិនោះទេ ខណៈជើងហោះហើរអន្តរជាតិនេះ ត្រូវបានអនុម័តជាពិសេសដោយ DGCA ។

ជើងហោះហើរពាណិជ្ជកម្ម ត្រូវបានផ្អាក នៅពេលដែលប្រទេសនេះ បានបិទខ្ទប់ទូទាំងប្រទេស កាលពីចុងខែមីនាឆ្នាំមុន ដើម្បីទប់ស្កាត់ការរីករាលដាល នៃជំងឺកូវីដ ១៩ ។

ទន្ទឹមនោះ ជើងហោះហើរក្នុងស្រុករបស់ឥណ្ឌា បានបន្តប្រតិបត្តិការ កាលពីថ្ងៃទី ២៥ ខែឧសភាឆ្នាំមុន បន្ទាប់ពីផ្អាកអស់រយៈពេលជិត ២ ខែ ។

អាជ្ញាធរឥណ្ឌា បាននិងកំពុងប្រតិបត្តិការជើងហោះហើរអន្តរជាតិពិសេស ចាប់តាំងពីខែឧសភាឆ្នាំមុន និងក្រោមការរៀបចំទ្វេភាគីជាមួយប្រទេសដែលបានកំណត់ តាំងពីខែកក្កដាឆ្នាំមុន ៕

ប្រែសម្រួលដោយ ៖ ជីវ័ន្ត

ប្រភព ៖ XINHUA