ព័ត៌មានជាតិ

ចាយពេលជាង ៣០ ឆ្នាំ ផ្នែកណាខ្លះនៃប្រាសាទបាយ័នកំពុងបន្តជួសជុល និងបានជួសជុលបញ្ចប់ទាំងស្រុង?

បានផុស

២ ខែ មុន

នៅ

ថ្ងៃសុក្រ ២២ ឧសភា ២០២៦

ដោយ

តាមរយៈកិច្ចសហការជាមួយស្ថាប័នប្រទេសជប៉ុន ប្រាសាទបាយ័នបានទទួលការយកចិត្តទុកដាក់ក្នុងការជួសជុលនិងអភិរក្សតាំងពីឆ្នាំ ១៩៩៣ មក។

ស្របពេលដែលរមណីយដ្ឋានអង្គរ ត្រូវបានដាក់បញ្ចូលជាសម្បត្តិបេតិកភណ្ឌពិភពលោក ប្រទេសជប៉ុន ដែលជាសហប្រធាននៃអង្គការយូណេស្កូ គឺជាប្រទេសដំបូងគេដែលបានមកជួយធ្វើការស្រាវជ្រាវ និងជួសជុលនៅប្រាសាទបាយ័នក្នុងរយៈពេលជាង ៣០ ឆ្នាំមកនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក សោម សុផារ៉ាត់ ប្រធាននាយកដ្ឋានអភិរក្សប្រាសាទ និងបុរាណវិទ្យានៃអាជ្ញាធរជាតិអប្សរា

លោក សោម សុផារ៉ាត់ ប្រធាននាយកដ្ឋានអភិរក្សប្រាសាទ និងបុរាណវិទ្យានៃអាជ្ញាធរជាតិអប្សរាបានគូសបញ្ជាក់ថា តាមរយៈកិច្ចសហការគ្នានេះ ក្រុមការងារបានបញ្ចប់ការជួសជុលបណ្ណាល័យខាងជើងមុនគេ ដែលបានចំណាយពេលដល់ទៅ ១០ ឆ្នាំ និងថវិកាប្រមាណ ១០ លានដុល្លារ ខណៈការងារបន្តកំពុងជួសជុលបណ្ណាល័យខាងត្បូង និងផ្នែកជាច្រើនទៀតជាបន្តបន្ទាប់។

លោក សោម សុផារ៉ាត់ បន្តថា សព្វថ្ងៃដោយសារមានកិច្ចសហការពិសេសមួយទៀតរវាងសាកលវិទ្យាល័យវ៉ាសេដាពីប្រទេសជប៉ុន និងអាជ្ញាធរជាតិអប្សរា ក្រុមការងារបានកំពុងធ្វើការពង្រឹងតួប៉មកណ្តាលជាន់ទី ៣ ដែលបានបិទអស់រយៈពេលជាង ៣០ ឆ្នាំ រួមទាំងតួប៉មទាំង ៨ ជុំវិញ និងកម្រាលបង្កាន់ដៃនាគនៅផ្នែកខាងក្រោម និងប្រាង្គអមផ្សេងៗទៀត។

បើតាមមន្រ្តីជំនាញអាជ្ញាធរជាតិអប្សរា ដោយសារប្រាសាទមានការខូចខាតច្រើន ទីតាំងផ្សេងៗត្រូវបានបែងចែកជួសជុលទៅតាមកម្រិតហានិភ័យជាផ្នែកម្តងបន្តិចៗជារៀងរាល់ឆ្នាំ។

លោក សោម សុផារ៉ាត់ បានអះអាងថា កិច្ចការជួសជុលនិងអភិរក្សត្រូវបានចាត់ទុកថាជាការងារដែលធ្វើគ្មានថ្ងៃបញ្ចប់ ពោលគឺត្រូវធ្វើជាបន្តបន្ទាប់ពីមួយជំនាន់ទៅមួយជំនាន់ ដើម្បីធានាស្ថិរភាពប្រាសាទដែលមានអាយុកាលរាប់ពាន់ឆ្នាំនេះសម្រាប់បន្តដល់កូនចៅជំនាន់ក្រោយ។

យ៉ាងណាមិញ មន្រ្តីបច្ចេកទេសអាជ្ញាធរអប្សរាបានគូសបញ្ជាក់ថា គ្រប់សកម្មភាពជួសជុលទាំងអស់គឺតែងតែគោរពតាមអនុសាសន៍របស់អ្នកជំនាញការ ICC យ៉ាងខ្ជាប់ខ្ជួនជានិច្ច។

ពាក់ព័ន្ធដំណើរការជួសជុលនៅប្រាសាទបាយ័ន លោក សោម សុផារ៉ាត់ បានបញ្ជាក់ថា ជាចក្ខុវិស័យអាជ្ញាធររំពឹងថានឹងបើកឲ្យភ្ញៀវទេសចរអាចចូលទស្សនានៅទីតាំង ដែលបានជួសជុលរួចក្នុងពេលឆាប់ៗឬអាចនៅឆ្នាំនេះក្រោយការងាររួចរាល់ទាំងស្រុង៕