ព័ត៌មានអន្ដរជាតិ

លោក ត្រាំ និយាយបែបលេងសើច ថា ខ្លួនអាចឈរឈ្មោះដឹកនាំអ៊ីស្រាអែល ព្រោះប្រជាប្រិយភាពកើនខ្លាំងនៅទីនោះ

បានផុស

២ ខែ មុន

នៅ

ថ្ងៃសុក្រ ២២ ឧសភា ២០២៦

ដោយ

ខណៈសង្គ្រាមនៅអ៊ីរ៉ង់បន្តធ្វើឱ្យប៉ះពាល់ដល់ប្រជាប្រិយភាពរបស់ប្រធានាធិបតីសហរដ្ឋអាមេរិក លោក ដូណាល់ ត្រាំ ក្នុងសហរដ្ឋអាមេរិក លោក ត្រាំ លើកឡើងកាលពីកាលពីថ្ងៃពុធថា ខ្លួនអាចឈរឈ្មោះជានាយករដ្ឋមន្ត្រីនៅអ៊ីស្រាអែល ដោយមានអ្នកគាំទ្រ ៩៩ភាគរយក្នុងប្រទេសអ៊ីស្រាអែល។

យោងតាមសារព័ត៌មានអង់គ្លេស The Independent ចេញផ្សាយថ្ងៃទី២១ ខែឧសភា ឆ្នាំ២០២៦ ប្រធានាធិបតី ត្រាំ មិនបានបញ្ជាក់ថា តើការស្ទង់មតិមួយណាដែលលោកកំពុងអះអាងពីការគាំទ្រនោះទេ ប៉ុន្តែ វាសម្គាល់ពីភាពផ្ទុយគ្នាស្រឡះជាមួយនឹងចំណាត់ថ្នាក់របស់លោកនៅសហរដ្ឋអាមេរិក ឈានដល់កម្រិតទាបបំផុតមួយទៀតនៅអាណត្តិទីពីរនេះ ចំពេលមានការកើនឡើងនៃការចំណាយនិងជម្លោះដែលមិនមានប្រជាប្រិយភាពនៅមជ្ឈិមបូព៌ា។

ប្រធានាធិបតីសហរដ្ឋអាមេរិក លោក ដូណាល់ ត្រាំ។ រូបភាព៖ Reuters

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ត្រាំ ប្រាប់អ្នកយកព័ត៌មានកាលពីថ្ងៃពុធថា៖ « ឥឡូវនេះខ្ញុំមាន ៩៩ភាគរយ[អ្នកគាំទ្រ] នៅអ៊ីស្រាអែល! ខ្ញុំអាចឈរឈ្មោះជានាយករដ្ឋមន្ត្រីបាន។ ដូច្នេះប្រហែលបន្ទាប់ពីខ្ញុំធ្វើបែបនេះ[បញ្ចប់សង្រ្គាមនៅអ៊ីរ៉ង់] ខ្ញុំនឹងទៅអ៊ីស្រាអែល ហើយឈរឈ្មោះជានាយករដ្ឋមន្ត្រី»។

លោកនិយាយម្តងទៀតថា៖ « ព្រឹកមិញនេះ ខ្ញុំបានធ្វើការស្ទង់មតិមួយ ហើយខ្ញុំមានគាំទ្រ ៩៩ភាគរយ»។ លោក ត្រាំ បានឆ្លើយតបទៅនឹងសង្គ្រាមនិងទំនាក់ទំនងរបស់ខ្លួនជាមួយនាយករដ្ឋមន្ត្រីអ៊ីស្រាអែលបច្ចុប្បន្ន គឺ លោក បេនយ៉ាមីន ណេតាន់យ៉ាហ៊ូ ថាជា «បុរសដ៏អស្ចារ្យ»។

ដោយមិនគិតពីប្រជាប្រិយភាពធ្លាក់ចុះជាក់ស្តែងក្នុងប្រទេស ចំណែកសង្គ្រាមអ៊ីរ៉ង់បានរួមចំណែកដល់ការបរាជ័យរបស់ លោក ត្រាំ នៅសហរដ្ឋអាមេរិក។

ការស្តង់មតិមួយ មានការយល់ព្រម ការសម្រេចចិត្ត លោក ត្រាំ ត្រឹមតែ ៣៩ភាគរយប៉ុណ្ណោះ នេះបើយោងតាមការស្ទង់មតិថ្មីមួយពី Fox News ដោយ ៦១ភាគរយបង្ហាញពីភាពមិនពេញចិត្ត ចំពោះការងាររបស់លោក កំពុងធ្វើនៅក្នុងសេតវិមាន។

រីឯការមិនពេញចិត្ត ចំពោះសង្គ្រាមអ៊ីរ៉ង់បានកើនឡើងដល់ ៦០ភាគរយក្នុងខែឧសភា ពី ៥៥ភាគរយក្នុងខែមេសា ទោះបីជាពីរភាគបីនៃអ្នកដែលស្ទង់មតិនិយាយថាពួកគេជឿថាសហរដ្ឋអាមេរិកកំពុងឈ្នះជម្លោះនោះក៏ដោយ៕

សម្រួល៖ ណឺ មិនា