អ៊ីរ៉ង់ ព្រមាន ត្រាំ ពីការវាយបក បើហ៊ានបង្កសង្គ្រាមឡើងវិញ ស្រប​ពេល ប៉ាគីស្ថាន​កំពុង​ខ្នះខ្នែង​សម្របសម្រួល​

ប្រព័ន្ធផ្សព្វផ្សាយរដ្ឋអ៊ីរ៉ង់ បានរាយការណ៍ថា លោក Mohammad Bagher Ghalibaf ប្រធានសភា និងជា​ប្រធានក្រុម​ចរចា​របស់​​អ៊ីរ៉ង់ បានជួបពិភាក្សាការងារជាមួយលោក Asim Munir មេបញ្ជាការកងទ័ពប៉ាគីស្ថាន នៅទីក្រុងតេហេរ៉ង់ កាលពីថ្ងៃសៅរ៍ទី ២៣ ខែឧសភា។ ជំនួបនេះធ្វើឡើងក្នុងខណៈពេលដែលទីក្រុងអ៊ីស្លាម៉ាបាដ កំពុងជំរុញ​កិច្ចប្រឹងប្រែងផ្នែកការទូតយ៉ាងខ្លាំងក្លា ដើម្បីជួយសម្របសម្រួលរវាងប្រទេសអ៊ីរ៉ង់ និងសហរដ្ឋអាមេរិក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមប្រព័ន្ធផ្សព្វផ្សាយរដ្ឋ លោក Ghalibaf បានប្រាប់លោក Munir ថា កងកម្លាំងប្រដាប់អាវុធអ៊ីរ៉ង់បានស្តារ និងពង្រឹងសមត្ថភាពរបស់ខ្លួនឡើងវិញយ៉ាងពេញលេញ ក្នុងកំឡុងពេលឈប់បាញ់នេះ។ លោកបានព្រមានថា ប្រសិនបើប្រធានាធិបតីអាមេរិក លោក ដូណាល់ ត្រាំ «ធ្វើសកម្មភាពល្ងង់ខ្លៅ និងបង្កសង្គ្រាមឡើងវិញ» នោះ អ៊ីរ៉ង់នឹងវាយបកទៅវិញ «យ៉ាងខ្លាំងក្លា និងជូរចត់បំផុត» ជាងថ្ងៃដំបូងនៃសង្គ្រាមទៅទៀត។

ក្រៅពីជំនួបនេះ លោក Munir ក៏បានចូលជួបពិភាក្សាដាច់ដោយឡែកជាមួយប្រធានាធិបតីអ៊ីរ៉ង់ លោក Masoud Pezeshkian និងរដ្ឋមន្ត្រីការបរទេស លោក Abbas Araghchi ផងដែរ។ ជំនួបជាមួយលោក Araghchi នេះ គឺជាជំនួបលើកទីពីរហើយ ចាប់តាំងពីមេបញ្ជាការកងទ័ពប៉ាគីស្ថានរូបនេះបានធ្វើដំណើរមកដល់ទីក្រុងតេហេរ៉ង់ កាលពីថ្ងៃសុក្រ។

ប្រព័ន្ធផ្សព្វផ្សាយរដ្ឋអ៊ីរ៉ង់បានបន្ថែមថា នៅក្នុងជំនួបលើកដំបូងរបស់ពួកគេ លោក Munir និងលោក Araghchi បានផ្លាស់ប្តូរទស្សនៈគ្នាយ៉ាងលម្អិតលើគំនិតផ្តួចផ្តើមការទូតចុងក្រោយបង្អស់ ដែលមានគោលបំណងទប់ស្កាត់កុំឲ្យមានការកើនឡើងកម្តៅយោធាបន្ថែមទៀត និងដើម្បីបញ្ចប់សង្គ្រាមរវាងអាមេរិក និងអ៊ីរ៉ង់ នៅក្នុងកិច្ចពិភាក្សាដែលបានអូសបន្លាយរហូតដល់យប់ជ្រៅ។

ប្រភពនានាបានប្រាប់ទូរទស្សន៍ Al Arabiya ថា លោក Munir បាននាំយកសាររបស់អាមេរិកមកប្រគល់ជូនទីក្រុងតេហេរ៉ង់។ សាររបស់អាមេរិករួមមាន ការធានាថាបញ្ហាប្រឈមដែលកំពុងជជែកវែកញែកទាំងឡាយ អាចនឹងត្រូវដោះស្រាយនៅពេលក្រោយបាន ប្រសិនបើអ៊ីរ៉ង់យល់ព្រមលើកិច្ចព្រមព្រៀងសន្តិភាពមួយនេះ។ ទោះជាយ៉ាងណាក៏ដោយ ប្រភពដដែលបានបញ្ជាក់ថា សាររបស់អាមេរិកក៏បានព្រមានពី «ផលវិបាកអវិជ្ជមានធ្ងន់ធ្ងរ» ផងដែរ ប្រសិនបើអ៊ីរ៉ង់បដិសេធមិនព្រមទទួលយកកិច្ចព្រមព្រៀង។

ជាមួយគ្នានេះដែរ ប្រភពដដែលបានឲ្យដឹងទៀតថា គណៈប្រតិភូបច្ចេកទេស និងច្បាប់របស់ប៉ាគីស្ថាន កំពុងធ្វើដំណើរចាកចេញទៅកាន់ទីក្រុងតេហេរ៉ង់ ដើម្បីចូលរួមចំណែកគាំទ្របេសកកម្មរបស់លោក Munir ក្នុងប្រទេសអ៊ីរ៉ង់ផងដែរ៕

អត្ថបទ៖ សាង ស្រីល័ក្ខ