លោក ស៊ី ជីនពីង រិះគន់ជប៉ុនខ្លាំងៗ នៅ​ចំពោះ​មុខ​លោក ត្រាំ

ក្នុង​ជំនួបកំពូល​​នៅ​​ទីក្រុងប៉េកាំង កាលពីពាក់កណ្ដាល​ខែឧសភា កន្លងទៅនេះ មេដឹកនាំចិន លោក ស៊ី ជីនពីង បានបង្ហាញអារម្មណ៍ខឹងសម្បារយ៉ាង​ខ្លាំង និងនិយាយ​រិះគន់​ចំៗ​​ទៅ​លើ​​​លោកស្រី​នាយករដ្ឋមន្ត្រី Sanae Takaichi នៅ​ចំពោះមុខប្រធានាធិបតីអាមេរិក លោក ដូណាល់ ត្រាំ រឿងដែលជប៉ុនខំប្រឹងពង្រឹងកម្លាំងទាហាន និងបង្កើនកញ្ចប់ថវិកាយោធា។

ប្រភពដែលដឹងរឿងនេះ បានទម្លាយប្រាប់សារព័ត៌មាន Financial Times កាល​ពី​ថ្ងៃទី​២៤ ខែ​ឧសភា ឆ្នាំ​២០២៦ ថា នេះគឺជាវគ្គដែលឡើងកម្ដៅខ្លាំងបំផុត នៅក្នុងកិច្ចប្រជុំទាំងមូល ព្រោះភាគីអាមេរិក មិនបានត្រៀមខ្លួនទុកមុនទាល់តែសោះ ដោយសារតែរឿងជប៉ុននេះ មិនដែលស្ថិតក្នុងរបៀបវារៈជជែកគ្នា កាលពីមុនមកឡើយ។

នៅពេលឃើញលោក ស៊ី ជីនពីង ឡើងម៉ឺងម៉ាត់បែបនេះ លោក ដូណាល់ ត្រាំ ក៏បានជួយពន្យល់ និងការពារជប៉ុនភ្លាមៗ។ លោក ត្រាំ បានប្រាប់ទៅមេដឹកនាំចិនវិញថា មូលហេតុដែលលោកស្រី Takaichi ត្រូវបង្ខំចិត្តងាកមកពង្រឹងវិស័យសន្តិសុខជាតិឱ្យកាន់តែរឹងមាំ និងសកម្មជាងមុនបែបនេះ គឺដោយសារតែជប៉ុន កំពុងប្រឈមមុខនឹងការគំរាមកំហែងកាន់តែខ្លាំងឡើង ពីសំណាក់ប្រទេសកូរ៉េខាងជើង។

ការព្រួយបារម្ភ និងការមិនពេញចិត្តរបស់ចិន ទៅលើជប៉ុននេះ មិនមែនជារឿងចៃដន្យនោះទេ ព្រោះមួយរយៈចុងក្រោយនេះ ជប៉ុនបានលុបចោលច្បាប់រឹតបន្តឹងស្ទើរតែទាំងអស់ លើការលក់អាវុធទៅក្រៅប្រទេស។ លើសពីនេះទៅទៀត លោកស្រីនាយករដ្ឋមន្ត្រីជប៉ុន ថែមទាំងបានបង្ហាញសញ្ញាថា ជប៉ុនអាចនឹងបន្ធូរបន្ថយគោលការណ៍ប្រឆាំងអាវុធនុយក្លេអ៊ែររបស់ខ្លួនថែមទៀតផង ដែលទង្វើទាំងនេះ បានធ្វើឱ្យចិនក្តៅក្រហាយ និងចេញមុខព្រមានជាបន្តបន្ទាប់។

ទំនាក់ទំនងរវាងចិន និងជប៉ុន បានធ្លាក់ចុះដុនដាប និងតានតឹងខ្លាំង តាំងពីឆ្នាំមុនមកម្ល៉េះ បន្ទាប់ពីលោកស្រី Takaichi បានលើកឡើងថា បើចិនវាយលុកចូល​កោះ​តៃវ៉ាន់ នោះជប៉ុន ប្រហែលជាត្រូវបញ្ជូនកងទ័ពរបស់ខ្លួនទៅជួយអន្តរាគមន៍។ ពាក្យសម្តីនេះ បានធ្វើឱ្យទីក្រុងប៉េកាំង​ក្ដៅ​ស្លឹក​ត្រចៀក ព្រោះចិនតែងតែចាត់ទុកតៃវ៉ាន់ជាទឹកដីរបស់ខ្លួន ហើយមិនខ្វល់ថានឹងត្រូវប្រើកម្លាំងបាយ ដើម្បីគ្រប់គ្រងកោះនេះវិញនោះឡើយ។ ជាការសងសឹក ចិនបានដាក់ទណ្ឌកម្មជាច្រើនលើជប៉ុន រាប់ចាប់តាំងពីការរឹតបន្តឹងពាណិជ្ជកម្ម និងមិនលើកទឹកចិត្តឱ្យប្រជាជនចិនទៅដើរលេងកម្សាន្តនៅប្រទេសជប៉ុនទៀតផង។

រឿងរ៉ាវកាន់តែគួរឱ្យចាប់អារម្មណ៍នោះគឺ ក្រោយពេលបញ្ចប់ជំនួបជាមួយមេដឹកនាំចិនភ្លាម លោក ដូណាល់ ត្រាំ និងលោកស្រី Takaichi បានជជែកគ្នាតាមទូរស័ព្ទភ្លាមៗ។ មេដឹកនាំទាំងពីរ បានព្រមព្រៀងគ្នា ក្នុងការរក្សាទំនាក់ទំនង និងជជែកគ្នាលើបញ្ហាសំខាន់ៗ នៅក្នុងតំបន់ឥណ្ឌូ​ប៉ាស៊ីហ្វិក ទោះបីជាជប៉ុន និងអាមេរិក មិនបានទម្លាយព័ត៌មានលម្អិតនៃកិច្ចសន្ទនានោះដល់សាធារណជនក៏ដោយ៕

​ប្រែសម្រួល៖ ឈាង