អ៊ីរ៉ង់ វាយប្រហារសងសឹកលើមូលដ្ឋានទ័ពអាកាសអាមេរិក ក្រោយរងការទម្លាក់គ្រាប់បែក

ស្ថានការណ៍នៅតំបន់មជ្ឈិមបូព៌ា បានផ្ទុះឡើងយ៉ាងក្តៅគគុកជាថ្មីម្តងទៀត នៅពេលដែលកងឆ្មាំបដិវត្តន៍ឥស្លាមអ៊ីរ៉ង់ (IRGC) បានប្រកាសនៅថ្ងៃព្រហស្បតិ៍ ទី​២៨ ខែ​​ឧសភា ឆ្នាំ​២០២៦ នេះ ថា ពួកគេបានបើកការវាយប្រហារសងសឹក ទៅលើមូលដ្ឋានទ័ពអាកាសមួយកន្លែង របស់សហរដ្ឋអាមេរិក នៅវេលាម៉ោងប្រហែល ៤:៥០នាទីទៀបភ្លឺ (ម៉ោងនៅក្នុងតំបន់)។

យោងតាម India Today ការវាយបកវិញយ៉ាងគំហុកពីភាគីអ៊ីរ៉ង់នេះ ធ្វើឡើង ដើម្បីឆ្លើយតបទៅនឹងអ្វីដែលពួកគេបានហៅថា ជាការវាយប្រហាររបស់កងទ័ពអាមេរិក នៅក្បែរព្រលានយន្តហោះ Bandar Abbas កាលពីព្រឹកមិញ។ ប្រព័ន្ធផ្សព្វផ្សាយរបស់អ៊ីរ៉ង់ មិនបានទម្លាយឱ្យដឹងពីទីតាំងជាក់លាក់ នៃមូលដ្ឋានទ័ពអាមេរិក ដែលរងការវាយប្រហារទេ ហើយ​កង​ឆ្មាំបដិវត្តន៍អ៊ីរ៉ង់ បានព្រមានខ្លាំងៗថា បើអាមេរិកហ៊ានបន្តសកម្មភាពយោធាណាមួយទៀតនោះ ពួកគេនឹងវាយបកវិញយ៉ាងចាស់ដៃ និងខ្លាំងក្លា​ជាងនេះទៅទៀត។

ការប្រកាសសងសឹកពីខាងទីក្រុងតេហេរ៉ង់នេះ បានកើតឡើងតែប៉ុន្មានម៉ោងប៉ុណ្ណោះ បន្ទាប់ពីមន្ត្រីជាន់ខ្ពស់របស់​អាមេរិក បានចេញមុខអះអាងពីសកម្មភាពយោធាថ្មីៗរបស់ខ្លួន ក្នុងការកម្ទេចប្រតិបត្តិការដ្រូនរបស់អ៊ីរ៉ង់ នៅក្បែរច្រកសមុទ្រហ័រមូស (Hormuz)។ បើតាមប្រភពព័ត៌មានពីទីភ្នាក់ងារព័ត៌មាន Reuters កងទ័ពអាមេរិក បានបាញ់ទម្លាក់ដ្រូនវាយប្រហាររបស់អ៊ីរ៉ង់ចំនួន ៤គ្រឿង ដែលមន្ត្រីអាមេរិកជឿជាក់ថា បានកំពុងបង្កើតការគំរាមកំហែងដល់កងកម្លាំងរបស់ខ្លួន ក៏ដូចជា នាវាពាណិជ្ជកម្មនានា ដែលធ្វើដំណើរឆ្លងកាត់ផ្លូវទឹកយុទ្ធសាស្ត្រមួយនេះ។ ក្រៅពីនេះ កងទ័ពអាមេរិក ក៏បានវាយប្រហារលើស្ថានីយបញ្ជាដ្រូននៅលើដីមួយកន្លែង នៅក្បែរព្រលានយន្តហោះ Bandar Abbas ដែលគេសង្ស័យថា កំពុងរៀបចំបាញ់បង្ហោះដ្រូនមួយគ្រឿងទៀតផងដែរ។ ទោះជាយ៉ាងណា មន្ត្រីអាមេរិក បានពន្យល់ថា ប្រតិបត្តិការនេះ មានរយៈពេល​ខ្លី និងធ្វើឡើង ក្នុងគោលបំណងការពារខ្លួន ដើម្បីរក្សាកិច្ចព្រមព្រៀងឈប់បាញ់ ដែលបានចូលជាធរមាន កាលពីដើមខែមេសាកន្លងទៅ តែប៉ុណ្ណោះ។

ផ្ទុយទៅវិញ ភាគីខាងប្រទេសអ៊ីរ៉ង់ បានចោទប្រកាន់ទីក្រុងវ៉ាស៊ីនតោនភ្លាមៗថា បានរំលោភលើកិច្ចព្រមព្រៀងឈប់បាញ់នេះជាញឹកញាប់។ ប្រព័ន្ធផ្សព្វផ្សាយរបស់អ៊ីរ៉ង់ បានរាយការណ៍ថា កងទ័ពជើងទឹកនៃកងឆ្មាំបដិវត្តន៍អ៊ីរ៉ង់ បានបាញ់កាំភ្លើងព្រមានទៅលើនាវាដឹកប្រេងមួយគ្រឿង ដែលមានទំនាក់ទំនងជាមួយអាមេរិក ខណៈដែលនាវានោះព្យាយាមបើកកាត់ច្រកសមុទ្រហ័រមូស រហូតបង្ខំឱ្យនាវានោះដកថយត្រឡប់ទៅវិញ។ មិនតែប៉ុណ្ណោះ របាយការណ៍មួយផ្សេងទៀត បានឱ្យដឹងថា នាវាចំនួន ៤គ្រឿងផ្សេងទៀត ដែលព្យាយាមបើកឆ្លងកាត់ផ្លូវទឹកដ៏សំខាន់នេះ ដោយគ្មានការសម្របសម្រួល ឬសុំការអនុញ្ញាតពីភាគីអ៊ីរ៉ង់ ក៏ត្រូវបានកងទ័ពជើងទឹកអ៊ីរ៉ង់ដេញ និងបង្ខំឱ្យបកក្បាលត្រឡប់ក្រោយវិញ បន្ទាប់ពីទទួលបានការព្រមានយ៉ាងម៉ឺងម៉ាត់រួចមក៕

ប្រែសម្រួល៖ ឈាង