ព័ត៌មានជាតិ

បង្កប់តម្លៃប្រវត្តិសាស្រ្ត ១ ពាន់ឆ្នាំមុន ជាហេតុផលទេសចរចូលចិត្តទៅថតរូបថ្ងៃលិចនៅប្រាសាទនាគព័ន្ធ

បានផុស

៤៩ នាទី មុន

នៅ

ថ្ងៃពុធ ៣ មិថុនា ២០២៦

ដោយ

ចំណុចលេចធ្លោមួយដែលទាក់ទាញទេសចរចូលចិត្តទៅទស្សនា និងថតរូបថ្ងៃលិចនៅប្រាសាទនាគព័ន្ធ ក្រៅពីមានទីធ្លាស្រឡះល្អដែលផ្តល់អារម្មណ៍ស្រស់ស្រាយគឺទីនោះបង្កប់តម្លៃប្រវត្តិសាស្រ្តដែលផ្សារភ្ជាប់អតីតរាជធានីក្នុងរាជ្យព្រះបាទជ័យវរ្ម័នទី៧។ នេះបើតាមលោក ជា សារិទ្ធ បុរាណវិទូ និងជាមន្រ្តីផ្នែកអភិរក្សប្រាសាទនៃអាជ្ញាធរជាតិអប្សរា។

ប្លែកពីប្រាសាទដទៃទៀតដូចជា អង្គរវត្ត ភ្នំបាខែង ភ្នំក្រោម ឬប្រែរូបជាដើម លោក ជា សារិទ្ធ មន្រ្តីផ្នែកអភិរក្សប្រាសាទនៃអាជ្ញាធរជាតិអប្សរាបានបញ្ជាក់ថា ទីតាំងប្រាសាទនាគព័ន្ធទទួលបានការពេញនិយមខ្លាំងសម្រាប់អ្នកទេសចរមកទស្សនាថ្ងៃលិច ខណៈទីតាំងក៏ផ្សារភ្ជាប់ទៅកាន់ប្រវត្តិសាស្ត្រកាលពីជាង ១ ពាន់ឆ្នាំមុន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

«នៅទីនោះប្រៀបបាននឹងគោលនៃរាជធានីមួយ ដែលស្ថិតនៅលើកោះកណ្តាលបារាយណ៍ ដោយមានប្រាសាទតាសោមនៅទិសខាងកើត និងប្រាសាទព្រះខ័ននៅទិសខាងលិច។ នៅពេលដែលយើងទស្សនាថ្ងៃលិច ដោយបែរមុខទៅទិសខាងលិច យើងអាចស្រមៃទៅដល់ប្រាសាទព្រះខ័ន ដែលធ្លាប់ជានគរនិងជារាជវាំងបណ្តោះអាសន្នរបស់ព្រះបាទជ័យវរ្ម័នទី៧»។

លោកបានរំលឹកពីដំណើរប្រវត្តិសាស្ត្រនៅពីក្រោយប្រាសាទព្រះខ័ន ដែលក្រោយព្រះបាទជ័យវរ្ម័នទី ៧ ទទួលបានជ័យជម្នះក្នុងសង្គ្រាម ព្រះអង្គបានគង់នៅនគរជ័យស្រី (ប្រាសាទព្រះខ័ន) ដើម្បីរៀបចំស្តារនិងជួសជុលរាជវាំងនៅអង្គរធំ (យសោធរបុរៈ) ឡើងវិញ បន្ទាប់ពីត្រូវបានពួកចាមវាយបំផ្លាញខ្ទេចខ្ទី។

ក្រោយពីរៀបចំនគរនៅអង្គរធំរួចរាល់ ព្រះអង្គបានយាងចេញពីទីនោះទៅគង់នៅអង្គរធំវិញ ហើយបានកែប្រែប្រាសាទព្រះខ័នឲ្យក្លាយជាប្រាសាទសម្រាប់ឧទ្ទិសថ្វាយដល់ព្រះបិតារបស់ព្រះអង្គ។

បើតាមលោក ជា សារិទ្ធ រចនាសម្ព័ន្ធនៃប្រាសាទទាំងបី (ប្រាសាទនាគព័ន្ធ តាសោម និងព្រះខ័ន) សុទ្ធសឹងតែជាផ្នែកមួយដ៏មានសារៈសំខាន់បំផុតនៃនគរជ័យស្រីក្នុងរាជ្យព្រះបាទព្រះបាទជ័យវរ្ម័នទី ៧៕