ព័ត៌មានអន្ដរជាតិ

ចិនអះអាង ថា កងទ័ពខ្លួន គឺសម្រាប់សន្តិភាពពិភពលោក ខណៈវិទ្យាស្ថានអូស្ត្រាលី ថា «មានការគំរាមកំហែង»

បានផុស

៣១ វិនាទី មុន

នៅ

ថ្ងៃពុធ ១៧ មិថុនា ២០២៦

ដោយ

ប្រទេសចិន បានលើកឡើង នៅថ្ងៃទី១៥ ខែមិថុនា ថា ការពង្រឹងយោធារបស់ខ្លួនគឺមានប្រយោជន៍សម្រាប់សន្តិភាពពិភពលោក ដោយរិះគន់ចំពោះរបាយការណ៍របស់ក្រុមអ្នកស្រាវជ្រាវអូស្រា្តលីដែលរកឃើញថា ការគំរាមកំហែងក្នុងការវាយប្រហារដោយផ្ទាល់របស់ទីក្រុងប៉េកាំងលើប្រទេសអូស្ត្រាលី កំពុងកើនឡើង។

ភ្នាក់ងារសារព័ត៌មាន AFP បានផ្សាយថ្ងៃទី១៥ ខែមិថុនា ឆ្នាំ២០២៦ ឲ្យដឹងថា របាយការណ៍របស់វិទ្យាស្ថាន Lowy របស់ប្រទេសអូស្រ្តាលី រាប់រៀបថា ប្រទេសចិនមានសមត្ថភាពវាយប្រហារដោយមីស៊ីលដោយផ្ទាល់លើប្រទេសអូស្ត្រាលី ហើយការគំរាមកំហែងនៃចលនានេះកំពុងកើនឡើង ខណៈទីក្រុងប៉េកាំងកំពុងប្រមូលផ្តុំអាវុធរយៈចម្ងាយឆ្ងាយ និងល្បឿនលឿនជាងសំឡេង និងសាងសង់កោះសប្បនិម្មិតនៅសមុទ្រចិនខាងត្បូងថែមទៀតផង។

អ្នកនាំពាក្យក្រសួងការបរទេសចិន លោក Lin Jian ។ រូបភាព៖ Reuters

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សមត្ថភាពរបស់ចិនក្នុងការវាយប្រហារអូស្ត្រាលីនឹងកើនឡើងក្នុងរយៈពេលមួយទសវត្សរ៍ខាងមុខ ខណៈមីស៊ីលផ្លោងរយៈចម្ងាយមធ្យម DF-27 និងមីស៊ីលផ្លោងអន្តរទ្វីបដែលអាចបំពាក់អាវុធ កំពុងកើនឡើង។

ការរកឃើញនេះ ចិនបានចេញថ្កោលទោស ចំពោះការវិនិច្ឆ័យខុសយុទ្ធសាស្ត្រធ្ងន់ធ្ងរ ចំពោះរបាយការណ៍ កាលពីថ្ងៃទី១៥ ខែមិថុនា ដោយនិយាយថា៖ « ប្រទេសចិនប្តេជ្ញាចិត្ត ចំពោះមាគ៌ានៃការអភិវឌ្ឍដោយសន្តិភាព»។

អ្នកនាំពាក្យក្រសួងការបរទេសចិន លោក Lin Jian ប្រាប់អ្នកយកព័ត៌មានក្នុងសន្និសីទសារព័ត៌មានមួយថា៖ « ការរីកចម្រើននៃកម្លាំងយោធារបស់ប្រទេសចិនតំណាងឱ្យការកើនឡើងនៃកងកម្លាំងសម្រាប់សន្តិភាពពិភពលោកប៉ុណ្ណោះ»។

លោកបន្ថែមថា៖ « ការអភិវឌ្ឍកម្លាំងយោធារបស់ប្រទេសចិនគឺមានបំណងការពារអធិបតេយ្យភាពជាតិ សន្តិសុខ និងផលប្រយោជន៍នៃការអភិវឌ្ឍន៍ ហើយមិនមែនសំដៅលើប្រទេសណាមួយជាក់លាក់ឡើយ»។

លោក Lin Jian ជំរុញឱ្យស្ថាប័នពាក់ព័ន្ធឈប់ផ្សព្វផ្សាយពីការគំរាមកំហែងរបស់ចិន ហើយមើលការអភិវឌ្ឍរបស់ប្រទេសខ្លួនផ្អែកលើគោលបំណងយុត្តិធម៌ និងសមហេតុផល៕

សម្រួល៖ ណឺ មិនា