JD Vance៖ អ៊ីរ៉ង់ នឹងបានប្រយោជន៍ច្រើនណាស់ ពីកិច្ចព្រមព្រៀងសន្តិភាព បើធ្វើខ្លួនឲ្យល្អ

ស្របពេលពិភពលោក ទទួលបានដំណឹងល្អ អំពីការបញ្ចប់សង្គ្រាមនៅមជ្ឈិមបូព៌ា អនុប្រធានាធិបតីអាមេរិក JD Vance បានបញ្ជាក់យ៉ាងច្បាស់ថា អ៊ីរ៉ង់ នឹងទទួលបានប្រយោជន៍ច្រើនណាស់ ពីកិច្ចព្រមព្រៀងសន្តិភាពនេះ បើធ្វើខ្លួនឲ្យល្អ។

ថ្លែងក្នុងបទសម្ភាសជាមួយ Fox News និងផ្សាយបន្តដោយគេហទំព័រ Dawn នៅថ្ងៃពុធ ទី១៧ ខែមិថុនា ឆ្នាំ២០២៦ លោក Vance ប្រាប់ថា ទីក្រុងតេហេរ៉ង់ នឹងទទួលបានប្រយោជន៍យ៉ាងប្រាកដ ប៉ុន្តែពួកគេ ដាច់ខាត ត្រូវតែផ្លាស់ប្តូរខ្លួនឯង ជាមុនសិន។

ក្នុងនោះ លោកបញ្ជាក់យ៉ាងច្បាស់ថា តាមពិតទៅ កិច្ចព្រមព្រៀងនេះ គឺសាមញ្ញខ្លាំងណាស់។ វាចែងថា ទីមួយ៖ អ៊ីរ៉ង់មិនអាចមានអាវុធនុយក្លេអ៊ែរបានឡើយ, ទីពីរ៖ ច្រកសមុទ្រ Hormuz ត្រូវតែបើកចំហ និងទីបី៖ មានផលប្រយោជន៍ទាំងអស់ ដែលជនជាតិអ៊ីរ៉ង់អាចទទួលបាន ប្រសិនបើពួកគេធ្វើខ្លួនឲ្យបានល្អ»។

ទោះបីជាយ៉ាងណាក៏ដោយ លោកគំរាមថា អ៊ីរ៉ង់ នឹងមិនទទួលបានអ្វីទាំងអស់ បើមិនព្រមបញ្ឈប់ការផ្តល់មូលនិធិដល់ក្រុមភេរវកម្ម និងមិនព្រមឈប់គាំទ្រ ដល់ការស្តារកម្មវិធីអាវុធនុយក្លេអ៊ែរឡើងវិញទេនោះ។

ជុំវិញរឿងនេះដែរ ភាគីអ៊ីរ៉ង់ឯណោះ ក៏ចេញការព្រមានយ៉ាងម៉ឺងម៉ាត់ ដល់សហរដ្ឋអាមេរិក រួចហើយផងដែរ ថា ទីក្រុងវ៉ាស៊ីនតោន នឹងពើបប្រទះការសងសឹក យ៉ាងចាស់ដៃបំផុត បើពួកគេរំលោភលើកិច្ចព្រមព្រៀង បណ្តោះអាសន្ន។

សូមជម្រាបជាថ្មី កិច្ចព្រមព្រៀងសន្តិភាពជាប្រវត្តិសាស្ត្រ ដើម្បីបញ្ចប់សង្រ្គាមមជ្ឈិមបូព៌ា ដែលអូសបន្លាយពេលជិត ៤ ខែ ត្រូវបាននាយករដ្ឋមន្ត្រីប៉ាគីស្ថាន Shehbaz Sharif បញ្ជាក់កាលពិថ្ងៃចន្ទថា សម្រេចបានហើយ។

ពិធីចុះហត្ថលេខាជាផ្លូវការ គ្រោងធ្វើឡើងនៅថ្ងៃសុក្រ ទី១៩ ខាងមុខ ក្នុងប្រទេសស្វីស ដ្បិតថា លក្ខខណ្ឌលម្អិត មិនត្រូវបានគេទម្លាយជាសាធារណៈ ទាំងស្រុងក៏ដោយ៕

អត្ថបទ៖ សុខ សុវណ្ណ