សេដ្ឋកិច្ច

កម្ពុជារកចំណូលបានជាង ៩០០ លានដុល្លារ ពីការនាំចេញស្រូវ-អង្ករ នៅក្នុងរយៈពេល ៥ ខែ

បានផុស

១ ថ្ងៃ មុន

នៅ

ថ្ងៃព្រហស្បតិ៍ ១៨ មិថុនា ២០២៦

ដោយ

កម្ពុជា ទទួលបានប្រាក់ចំណូលប្រមាណ ៩១៨ លានដុល្លារ ពីការនាំចេញស្រូវ-អង្ករ នៅក្នុងរយៈពេល ៥ ខែ ឆ្នាំ ២០២៦។ នេះបើយោងតាមទិន្នន័យរបស់សហព័ន្ធស្រូវអង្ករកម្ពុជា (CRF)។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទិន្នន័យរបស់ CRF បង្ហាញថា កម្ពុជា សម្រេចបានការនាំចេញអង្ករចំនួនជាង ៥៦ ម៉ឺនតោន (៥៦៨ ៩១២) នៅក្នុងរយៈពេល ៥ ខែ ២០២៦ ទៅកាន់គោលដៅចំនួន ៦៣ ដែលសម្រេចបានទំហំទឹកប្រាក់ ៣២៧ លានដុល្លារ ចំណែក ស្រូវចំនួន ២ ៧៥៣ ៨១៦ តោន ស្រូវសើម គិតជាទឹកប្រាក់ប្រមាណ ៥៩១.៤១ លានដុល្លារ។

លោកឧកញ៉ា ឡាយ ឈុនហួរ ប្រធានសហព័ន្ធស្រូវអង្ករកម្ពុជា មានប្រសាសន៍ថា នៅឆ្នាំ ២០២៥ និង២០២៦ ដោយសារតែមានទឹកគ្រប់គ្រាន់ កសិករបានបង្កើនការដាំដុះ និងសមត្ថភាពសម្ងួត រួមទាំងការគាំទ្ររបស់រាជ្ឋាភិបាល និងទីផ្សារអន្តរជាតិ បានធ្វើឱ្យការនាំចេញស្រូវ អង្ករ មានការកើនឡើង។

របាយការណ៍របស់ CRF បង្ហាញថា នៅក្នុងរយៈពេល៥ខែ ឆ្នាំ២០២៦ កម្ពុជាបាននាំចេញអង្ករបានចំនួន ៥៦៨ ៩១២តោន តាមរយៈក្រុមហ៊ុននាំចេញអង្ករចំនួន ៦១ ក្រុមហ៊ុន ទៅកាន់គោលដៅចំនួន ៦៣ ដែលក្នុងនោះទៅកាន់បណ្តាប្រទេសនៅក្នុងតំបន់អឺរ៉ុបចំនួន ៣១ បានបរិមាណអង្ករចំនួន ១៥៤ ២៥៤ តោន គិតជាទឹកប្រាក់ចំនួន ១០៥.១២ លានដុល្លារ ទៅកាន់ប្រទេសចិន និងហុងកុង ចំនួន ១៦២ ១២៥ តោន គិតជាទឹកប្រាក់ចំនួន ៩៤.៩២ លានដុល្លារ ប្រទេសក្នុងអាស៊ានចំនួន ៥ ប្រទេសបានបរិមាណចំនួន ២០៨ ៥៩៣ តោន គិតជាទឹកប្រាក់ចំនួន ៨៧.៣២ លានដុល្លារ និងទៅកាន់គោលដៅ ២៤ ប្រទេសផ្សេងទៀតមាន អាហ្វ្រិក មជ្ឈិមបូព៌ា អាមេរិក កាណាដា អូស្ត្រាលី ញូហ្សេឡេន បានចំនួន ៤៣ ៩៤០ តោន គិតជាទឹកប្រាក់ចំនួន ៤០.០៧ លានដុល្លារ៕

អត្ថបទ៖ ឡេង ដេត