អភិបាលខេត្តកណ្ដាល ដឹកនាំមន្រ្ដីជំនាញចុះពិនិត្យវឌ្ឍនភាព សាងសង់សាលាមត្តេយ្យខ្មែរអមតៈ នៅក្រុងអរិយក្សត្រ

លោក គួច ចំរើន ចុះពិនិត្យវឌ្ឍនភាពសាងសង់ «សាលាមត្តេយ្យខ្មែរអមតៈ» ថ្មី នៅក្រុងអរិយក្សត្រ ព្រមទាំងជម្រុញឱ្យពន្លឿនការងារប្រកបដោយគុណភាព និងមានគុណភាពរឹងមាំល្អ ព្រមទាំងសាងសង់ឲ្យសម្រេចរួចរាល់ជាស្ថាពរតាមផែនការដែលបានគ្រោងទុក។

ជាក់ស្ដែងនៅថ្ងៃទី២២ ខែមិថុនា ឆ្នាំ២០២៦ លោក គួច ចំរើន អភិបាល នៃគណៈអភិបាលខេត្តកណ្ដាល បានដឹកនាំមន្ត្រីជំនាញ និងអាជ្ញាធរក្រុងអរិយក្សត្រ ចុះពិនិត្យដោយផ្ទាល់ពីវឌ្ឍនភាព នៃការដ្ឋានសាងសង់អគារ «សាលាមត្តេយ្យខ្មែរអមតៈ» ដែលស្ថិតក្នុងភូមិខ្សាច់ សង្កាត់អរិយក្សត្រ ក្រុងអរិយក្សត្រ ខេត្តកណ្ដាល។

ក្នុងឱកាសចុះពិនិត្យនោះដែរ លោកអភិបាលខេត្ត បានកោតសរសើរ និងបានដាក់បទបញ្ជាណែនាំយ៉ាងម៉ឺងម៉ាត់ដល់ក្រុមការងារបច្ចេកទេស ត្រូវយកចិត្តទុកដាក់ខ្ពស់លើស្ដង់ដាសាងសង់ ដើម្បីធានាបាននូវភាពរឹងមាំ និងសុវត្ថិភាពយូរអង្វែង។ ជាមួយគ្នានេះ ឯកឧត្ដមបានជម្រុញឱ្យពន្លឿនការងារសាងសង់ ឱ្យបានរួចរាល់តាមផែនការដែលបានកំណត់។

គួរបញ្ជាក់ថា អគារសាលាមត្តេយ្យខ្មែរអមតៈចាស់ គឺធ្វើអំពីឈើ និងមានសភាពទ្រុឌទ្រោមខ្លាំង ដែលអាចបង្កហានិភ័យ និងគ្រោះថ្នាក់ជាយថាហេតុដល់កុមារា កុមារី ក៏ដូចជាសិស្សានុសិស្សដែលកំពុងសិក្សា។ ដោយមើលឃើញពីការលំបាក និងក្តីបារម្ភនេះ លោក គួច ចំរើន អភិបាលខេត្តបានផ្ដួចផ្ដើមគំនិតចាក់ដីបំពេញទីធ្លាបរិវេណសាលាឡើងវិញ ព្រមទាំងកសាងអគារថ្មីស្រឡាងនេះឡើង ដើម្បីផ្ដល់ជាកាដូ និងធានានូវបរិយាកាសសិក្សាដ៏សុវត្ថិភាពសម្រាប់កុមារតូចៗនៅក្នុងមូលដ្ឋាន៕