កូវីដ-១៩

ត្រឹម១៨ថ្ងៃ ក្រសួងផែនការ ប្រកាសបញ្ចប់យុទ្ធនាការចាក់វ៉ាក់សាំងស៊ីណូវ៉ាក់ ដោយជោគជ័យ

បានផុស

៥ years មុន

នៅ

ថ្ងៃអង្គារ ៤ ឧសភា ២០២១

ដោយ

ក្រសួងផែនការបានប្រកាសបិទបញ្ចប់យុទ្ធនាការចាក់វ៉ាក់សាំងស៊ីណូវ៉ាក់ក្នុងរយៈពេល១៨ថ្ងៃ ទាំងដូសទី១ និងដូសទី២ ជូនថ្នាក់ដឹកនាំ បុគ្គលិក មន្ត្រីរាជការនៃក្រសួងផែនការ និងជាពិសេសបងប្អូនប្រជាពលរដ្ឋ បុគ្គលិកក្រុមហ៊ុន មន្ត្រីរាជការ និងជនបរទេសទូទៅ ក្នុងខណ្ឌបឹងកេងកង រាជធានីភ្នំពេញ។

លោក ស្រីដា អ្នកនាំពាក្យក្រសួងផែនការបានឲ្យដឹងថា យុទ្ធនាការចាក់វ៉ាក់សាំងស៊ីណូវ៉ាក់ដូសទី១ ជូនថ្នាក់ដឹកនាំ បុគ្គលិក មន្ត្រីរាជការនៃក្រសួងផែនការ រយៈពេល៤ថ្ងៃកន្លងមក កាលពីថ្ងៃទី០៦ ខែមេសា ឆ្នាំ២០២១ដល់ថ្ងៃទី០៩ ខែមេសា ឆ្នាំ២០២១បានផ្តល់ការចាក់វ៉ាក់សាំងបានចំនួន ១,១៣៦នាក់ (ស្រី ចំនួន ៤៨១នាក់)។ លោកបានបន្តថា ចំណែកយុទ្ធនាការចាក់វ៉ាក់សាំងស៊ីណូវ៉ាក់ដូសទី២ ក្នុងរយៈពេល១៤ថ្ងៃចាប់ពីថ្ងៃទី២០ ខែមេសា ដល់ថ្ងៃទី០៣ ខែឧសភាឆ្នាំ២០២១នេះ មានបងប្អូនប្រជាពលរដ្ឋ បុគ្គលិកក្រុមហ៊ុន មន្ត្រីរាជការ និងជនបរទេសទូទៅ ក្នុងខណ្ឌបឹងកេងកង រាជធានីភ្នំពេញ បានមកទទួលការចាក់វ៉ាក់សាំងដូសទី២ បានចំនួន ២,៣២១នាក់ (ស្រី ចំនួន ១,២៦០នាក់)។ លោកបានបន្តទៀតថា ជាលទ្ធផលរួមរបស់ក្រុមការងារខាងលើ ក្នុងយុទ្ធនាការចាក់វ៉ាក់សាំងស៊ីណូវ៉ាក់(Sinovac)ទាំងដូសទី១ និងដូសទី២ ដែលបានប្រព្រឹត្តទៅអស់រយៈពេល ១៨ថ្ងៃ គឺសម្រេចបានការផ្តល់សេវាចាក់វ៉ាក់សាំងបានសរុបចំនួន ៣,៤៥៧ នាក់ (ស្រី ចំនួន ១,៧៤១នាក់)។

ចាប់ពីថ្ងៃទី១០ ខែកុម្ភៈ ឆ្នាំ២០២១ រហូតមកដល់ថ្ងៃទី០៣ ខែឧសភា ឆ្នាំ២០២១នេះក្រសួងសុខាភិបាលនិងក្រសួងការពារជាតិបានចាក់វ៉ាក់សាំងជូនមន្ត្រីរាជការ ប្រជាពលរដ្ឋ កម្មករនិយោជិតនិងកងកម្លាំងប្រដាប់អាវុធ នៅទូទាំងប្រទេសសរុបចំនួន ១,៤៦៥,៩៨៥នាក់នាក់ស្រី៦៣៧៧៤៨ក្នុងចំណោមអ្នកស្ម័គ្រចិត្តចាក់ចំនួន១៥៣០៧៤៧នាក់ស្រី៦៦៩៤៧០នាក់៕

អត្ថបទ៖ សំអឿន

សូមចុចអាន៖ ពលរដ្ឋជិត១លាន៥សែននាក់បានចាក់វ៉ាក់សាំងជំងឺកូវីដ‑១៩