កីឡា

ស្មាត់ឆ្នើម Luvi បានជាប់ជាកីឡាករល្អប្រចាំការប្រកួតច្រើនជាងគេក្នុង«តេជោលីគ»នៅវគ្គសន្សំពិន្ទុ

បានផុស

១១ នាទី មុន

នៅ

ថ្ងៃអង្គារ ៣០ មិថុនា ២០២៦

ដោយ

ស្មាត់ឆ្នើមសញ្ជាតិឥណ្ឌូណេស៊ី Luvi Febrian របស់ក្រុមបាល់ទះបញ្ជាការដ្ឋានអង្គរក្ស បានក្លាយជាកីឡាករល្អប្រចាំការប្រកួតច្រើនជាងគេក្នុងព្រឹត្តិការណ៍ប្រកួតបាល់ទះ«តេជោលីគ» សម្រាប់ការប្រកួតសន្សំពិន្ទុដែលបានបញ្ចប់ទាំងពីរជុំកាលពីថ្ងៃទី២៨ ខែមិថុនា ឆ្នាំ ២០២៦។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការប្រកួតសន្សំពិន្ទុចំនួន ១២ ប្រកួតរបស់ បញ្ជាការដ្ឋានអង្គរក្ស កីឡាករ Luvi បានក្លាយជាកីឡាករល្អប្រចាំការប្រកួតចំនួន ៥ លើក។ រូបគេ ក្លាយជាកីឡាករ MVP ៣ លើកនៅជុំទី២ គឺ ១៦ ពិន្ទុ បញ្ជាការដ្ឋានអង្គរក្ស ឈ្នះក្រសួងមហាផ្ទៃ ៣-១, រកបាន ២០ ពិន្ទុ ពេលឈ្នះ ស្នងការកោះកុង ៣-០ និងរកបាន ២១ ពិន្ទុ ពេលឈ្នះ ស្នងការខេត្តស្វាយរៀង ៣-១។

កាលវគ្គសន្សំពិន្ទុជុំទី១ Luvi រកបាន ២២ ពិន្ទុ ពេលបញ្ជាការដ្ឋានអង្គរក្ស ឈ្នះ កងពលធំអន្តរាគមន៍លេខ៣ដោយលទ្ធផល ៣-០ និងរកបាន ២០ ពិន្ទុ ពេលឈ្នះ ស្នងការរាជធានីភ្នំពេញ ៣-១។ ការឈ្នះពានកីឡាករល្អប្រចាំការប្រកួត ៥ លើកនេះ គឺច្រើនជាងគេកីឡាករណាទាំងអស់។

ជាមួយគ្នានេះ ស្មាត់សញ្ជាតិអាមេរិក Jalen Penrose បានក្លាយជាកីឡាករល្អប្រចាំការប្រកួតចំនួន ៤ លើក ហើយរូបគេនៅមានឱកាសក្លាយជាកីឡាករល្អប្រចាំការប្រកួតបន្តទៀត ដោយសារក្រុមស្នងការខេត្តស្វាយរៀង បានបន្តប្រកួតវគ្គពាក់កណ្តាលផ្តាច់ព្រ័ត្រ។

ចំណែកកីឡាករ ធី ម៉េងហួស ក៏បានក្លាយជាកីឡាករល្អប្រចាំការប្រកួតចំនួន ៤ លើកដែរ ប៉ុន្តែឱកាសឈ្នះពានស្មាត់ឆ្នើមប្រចាំព្រឹត្តិការណ៍ហាក់ដូចស្តួចស្តើងមែនទែន ដោយសារក្រុមក្រសួងមហាផ្ទៃបានអស់ឱកាសឡើងវគ្គបន្តហើយ។

ទន្ទឹមជាមួយគ្នានេះ ចាន់ វាសនា ស្មាត់របស់ ស្នងការរាជធានីភ្នំពេញ កីឡាករ លឹម ចិត្រា ស្មាត់របស់ ស្នងការខេត្តស្វាយរៀង និង ពិន សារ៉ុន ស្មាត់ របស់ វិសាខា បានក្លាយជាកីឡាករល្អប្រចាំការប្រកួត ៣ ដងដូចគ្នា។ ពួកគេនៅបន្តលេងវគ្គពាក់កណ្តាលផ្តាច់ព្រ័ត្រទៀត។

កីឡាករឥណ្ឌូណេស៊ី Ageng និងកីឡាករ ស៊ុយ ខន របស់បញ្ជាការដ្ឋានអង្គរក្ស ព្រមទាំងកីឡាករ មឿន ម៉េងឡាយ របស់ក្រសួងមហាផ្ទៃ បានក្លាយជាកីឡាករល្អប្រចាំការប្រកួតម្តងម្នាក់ដូចគ្នា។ នៅមានកីឡាករចំនួន ១៤ នាក់ផ្សេងទៀតដែលបានក្លាយជាកីឡាករល្អប្រចាំការប្រកួតម្តងម្នាក់ដូចគ្នា។

សូមបញ្ជាក់ថា ការប្រកួតតេជោលីគ វគ្គពាក់កណ្តាលផ្តាច់ព្រ័ត្រ នឹងធ្វើនៅថ្ងៃពុធ ទី១ ខែកក្កដា ឆ្នាំ ២០២៦ ដែលជាការប៉ះគ្នារវាងក្រុម វិសាខា ជាមួយ ស្នងការរាជធានីភ្នំពេញ ហើយក្រុម បញ្ជាការដ្ឋានអង្គរក្ស ប្រកួតជាមួយ ស្នងការខេត្តស្វាយរៀង។ ក្រុមចាញ់ ប៉ះ ក្រុមចាញ់ដណ្តើមចំណាត់ថ្នាក់លេខ ៣ ខណៈក្រុមឈ្នះ ប៉ះ ក្រុមឈ្នះ ដណ្តើមជើងឯកនៅថ្ងៃសុក្រ ទី៣ ខែកក្កដា ឆ្នាំ ២០២៦៕

កីឡាករឥណ្ឌូណេស៊ី Luvi