ព័ត៌មានជាតិ

កោះរ៉ុងល្បីដើមឈើឆ្នេរឡុងប៊ិច ខណៈនៅសៀមរាបផ្ទុះចាប់អារម្មណ៍ទេពមច្ឆាបាយ័នមុជទឹកប្រលែងត្រី

បានផុស

៣ ម៉ោង មុន

នៅ

ថ្ងៃអង្គារ ៧ កក្កដា ២០២៦

ដោយ

ខណៈនៅកោះរ៉ុងមួយរយៈមុនផ្ទុះដើមឈើនៅឆ្នេរឡងប៊ិច បានក្លាយជាទីទាក់ទាញដល់ភ្ញៀវទេសចរជាតិ និងអន្តរជាតិនៅខេត្តព្រះសីហនុ ដោយឡែកនៅខេត្តសៀមរាបកំពុងផ្ទុះការចាប់អារម្មណ៍ក្រុមសម្តែងទេពមច្ឆា ចុះហែលទឹកប្រលែងលេងជាមួយមច្ឆាតូចធំក្នុងអាងទឹកដ៏ធំ ដែលផ្តល់ចំណីអារម្មណ៍ថ្មីសម្រាប់ទេសចរទៅកម្សាន្ត។

នាងទេពមច្ឆានេះគឺជាក្រុមសម្តែងប្រចាំនៅមជ្ឈមណ្ឌលអភិរក្សសត្វសមុទ្រ-ទឹកសាប អង្គរ វ៉ាយឡាយ & អឹឃ្វារីយ៉ូម (Angkor Wildlife & Aquarium) ក្នុងខេត្តសៀមរាប។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បើតាមប្រភពពីបុគ្គលិកនៅមជ្ឍមណ្ឌលអភិរក្សសត្វព្រៃ អង្គរ វ៉ាយឡាយ & អឹឃ្វារីយ៉ូម (Angkor Wildlife & Aquarium) ខេត្តសៀមរាបបានបញ្ជាក់ថា កម្មវិធីនាងទេពមច្ឆាសម្តែងជាមួយសត្វត្រីក្នងអាងហែលទឹក ទទួលបានការគាំទ្រយ៉ាងខ្លាំងពីសំណាក់ទស្សនិកជន។

ប្រភពបានបន្តថា ដំបូងឡើយកាលពីឆ្នាំ ២០២៥ ខាងសួនកម្សាន្តបានអញ្ជើញក្រុមសម្ដែងទេពមច្ឆាមកពីប្រទេសជិតខាងឱ្យមកសម្ដែងក្នុងឱកាសបុណ្យចូលឆ្នាំខ្មែរ។

ក្រោយមកដោយសារតែការទទួលបានការគាំទ្រយ៉ាងខ្លាំងពីសំណាក់ទស្សនិកជន ខណៈបុគ្គលិកខ្មែរដែលបម្រើការងារផ្ទាល់ក្នុងមជ្ឍមណ្ឌលយល់ថា ខ្លួនមានសមត្ថភាពអាចសម្ដែងបានដូចគ្នា ក៏បានចាប់ផ្ដើមហ្វឹកហាត់ដោយខ្លួនឯង។ ការសម្ដែងជាផ្លូវការបានចាប់ផ្តើមនៅក្នុងខែ តុលា ឆ្នាំ២០២៥ ចំពេលពិធីបុណ្យភ្ជុំបិណ្ឌ ដែលនេះជាការបង្កើតក្រុមសម្ដែងនាងទេពមច្ឆាដែលជាកូនខ្មែរដំបូងបំផុតនៅក្នុងប្រទេសកម្ពុជា។

ក្នុងដំណើរចុះសិក្សាពីតំបន់បេតិកភណ្ឌក្នុងទៅខេត្តសៀមរាបកាលពីពេលថ្មីៗនេះ ក្រុមអ្នកសារព័ត៌មានបានទៅដល់ទីតាំងសម្តែងនាងទេពមច្ឆា ខណៈដែលមានទេសចរជាច្រើនកំពុងទស្សនា។ ក្រុមសម្តែងសុទ្ធតែកូនខ្មែរបានប្រាប់ថា ការសម្តែងនេះជួបការលំបាកខ្លះដែរ ដោយសារត្រូវការទប់ដង្ហើមនៅក្នុងទឹកឲ្យបានយូរ សម្រាប់ការសម្ដែងជូនទស្សនិកជនទស្សនា។

ក្រុមសម្តែងទេពមច្ឆាខ្មែរនៅអង្គរ វ៉ាយឡាយ & អឹឃ្វារីយ៉ូម

ការសម្តែងក៏ត្រូវការសម្របខ្លួនជាមួយសម្ពាធទឹក និងសត្វត្រី និងត្រូវរៀនបច្ចេកទេសហែលទឹក ដើម្បីកុំឱ្យត្រីផ្អើល។ លើសពីនេះក៏ត្រូវរៀនសម្របខ្លួនក្នុងការហែលជាមួយត្រីធំៗ ដូចជាត្រីរាជ និងត្រីកូរាំងជាដើម។

យ៉ាងណាមិញ ក្រុមអ្នកសម្តែងបានប្រាប់ថា សត្វត្រីនៅក្នុងអាងគឺជាត្រីទឹកសាបមកពីបឹងទន្លេសាប និងទន្លេមេគង្គ មិនបង្កគ្រោះថ្នាក់ខ្លាំងដូចត្រីទឹកប្រៃ ដូចជាត្រីឆ្លាមដែលអាចខាំនោះទេ។ ប៉ុន្តែហានិភ័យធំបំផុតគឺអាចត្រីហែលបុក ឬប៉ះទង្គិចប៉ុណ្ណោះ ហើយក៏ត្រូវចេះរបៀបដោះស្រាយក្នុងស្ថានភាព ដូចជាពេលត្រីបុក ឬរបូតរបាំងមុខកំឡុងពេលសម្ដែង។

បើតាមក្រុមអ្នកសម្តែង ការសម្ដែងកម្មវិធីនីមួយៗ មានរយៈពេលប្រហែល ១៥ ទៅ ២០ នាទី ខណៈការសម្ដែងត្រូវធ្វើឡើងនៅក្នុងអាងទឹកដែលមានជម្រៅប្រហែល ៣ ម៉ែត្រ ទៅ ៣.២៣ ម៉ែត្រ។

បច្ចុប្បន្ន ការសម្ដែងនាងទេពមច្ឆាបាយ័នធ្វើឡើងជារៀងរាល់ចុងសប្តាហ៍ គឺថ្ងៃសៅរ៍ និងថ្ងៃអាទិត្យ និងថ្ងៃបុណ្យជាតិ។ ក្នុងមួយថ្ងៃមាន ២ លើក គឺពេលព្រឹកម៉ោង ១០:៣០ នាទី និងពេលរសៀលម៉ោង ២:៣០ នាទី។

ប្រភពពីអ្នកគ្រប់គ្រងនៅអង្គរ វ៉ាយឡាយ & អឹឃ្វារីយ៉ូម (Angkor Wildlife & Aquarium) បានបញ្ជាក់ថា ដំបូងឡើយការរៀបចំការសម្តែងនាទេពមច្ឆាបាយ័ននេះ សម្ដែងតែថ្ងៃបុណ្យជាតិប៉ុណ្ណោះ ប៉ុន្តែដោយសារមានការសាកសួររកពីភ្ញៀវទេសចរច្រើន ទើបសម្រេចចិត្តដាក់សម្ដែងរៀងរាល់ចុងសប្ដាហ៍។

បើតាមប្រភពអ្នកគ្រប់គ្រង ការសម្ដែងនេះក៏ជាចំណីចក្ខុប្លែកថ្មីមួយក្នុងប្រទេសកម្ពុជា និងជួយទាក់ទាញភ្ញៀវទេសចរមកកម្សាន្តនៅខេត្តសៀមរាប ក្រៅពីការទៅទស្សនាប្រាសាទបុរាណ គឺទេសចរអាចមកមើលសត្វត្រីដែលកំពុងអភិរក្ស និងទស្សនាការសម្ដែងដ៏ជក់ចិត្តនេះ៕