ព័ត៌មានអន្ដរជាតិ

លោក ត្រាំ ប្រាប់នាយករដ្ឋមន្ត្រីអ៊ីស្រាអែល ឱ្យដកទ័ពចេញពីលីបង់និងស៊ីរី

បានផុស

១២ វិនាទី មុន

នៅ

ថ្ងៃពុធ ១៥ កក្កដា ២០២៦

ដោយ

យោងតាមសេចក្តីរាយការណ៍របស់សារព័ត៌មាន Axios របស់សហរដ្ឋអាមេរិក ចេញផ្សាយកាលពីថ្ងៃអង្គារ ទី១៤ ខែកក្កដា ដោយដកស្រង់សម្តីមន្ត្រីអាមេរិក និងអ៊ីស្រាអែល ឱ្យដឹងថា ប្រធានាធិបតីអាមេរិក លោក ដូណាល់ ត្រាំ បានប្រាប់នាយករដ្ឋមន្ត្រីអ៊ីស្រាអែល លោក ប៊េនចាមីន ណេតាន់យ៉ាហ៊ូ ថា កងទ័ពអ៊ីស្រាអែល គួរតែដកចេញពីប្រទេសស៊ីរី និងលីបង់ អំឡុងពេលកិច្ចសន្ទនាតាមទូរស័ព្ទកាលពីថ្ងៃព្រហស្បតិ៍សប្តាហ៍មុន។

មន្ត្រីអាមេរិកម្នាក់ បានប្រាប់ Axios ថា ប្រធានាធិបតី ដូណាល់ ត្រាំ បានអះអាងថា វត្តមានរបស់យោធាអ៊ីស្រាអែលនៅលើទឹកដីស៊ីរីអាចបង្កើតនូវភាពតានតឹង និងអាចនាំឱ្យកាន់តែមានភាពតានតឹងបន្ថែមទៀត។

ប្រធានាធិបតីអាមេរិក លោក ដូណាល់ ត្រាំ។ រូបភាព៖ Reuters

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមមន្ត្រីរូបនោះ លោក ត្រាំ ត្រូវបានគេចោទថា បានប្រាប់ លោក ណេតាន់យ៉ាហ៊ូ ថា៖ « ពួកគេ[ស៊ីរីនិងលីបង់] មិនចង់ឱ្យអ្នកនៅទីនោះទេ។ អ្នកគួរតែពិនិត្យមើលការដាក់ពង្រាយទ័ពឡើងវិញ»។

ដោយឡែក កងទ័ពអ៊ីស្រាអែល IDF អះអាងថា មិនមានការផ្លាស់ប្តូរណាមួយលើដីដែលខ្លួនកាន់កាប់នោះទេ ហើយក៏មិនមានការចង្អុលបង្ហាញថា ស្ថានភាពនឹងផ្លាស់ប្តូរភ្លាមៗនោះដែរ។

ក្នុងចំណោមការវិវត្តន៍នានា លោក ណេតាន់យ៉ាហ៊ូ កំពុងមានគម្រោងធ្វើដំណើរទៅកាន់ទីក្រុងវ៉ាស៊ីនតោន នៅប៉ុន្មានថ្ងៃខាងមុខ។ នេះបើតាមការរាយការណ៍របស់សារព័ត៌មាន Walla នៅល្ងាចថ្ងៃអង្គារ។

របាយការណ៍នេះបានកើតឡើង ពេលអ៊ីស្រាអែល និងលីបង់បានបន្តកិច្ចចរចាសន្តិភាពនៅទីក្រុងរ៉ូម ដើម្បីពិភាក្សាអំពីការអនុវត្តក្របខ័ណ្ឌត្រីភាគីរវាងអ៊ីស្រាអែល លីបង់ និងសហរដ្ឋអាមេរិក។

កិច្ចព្រមព្រៀងត្រូវបានចុះហត្ថលេខានៅថ្ងៃទី២៦ ខែមិថុនា នៅទីក្រុងវ៉ាស៊ីនតោន មានគោលបំណងដកហូតអាវុធពីក្រុមភេរវករហេសបូឡារបស់លីបង់ និងសម្រួលដល់ការដកកងទ័ព IDF ចេញពីភាគខាងត្បូងប្រទេសលីបង់។

ក្រោមកិច្ចព្រមព្រៀងក្របខ័ណ្ឌនេះ អ៊ីស្រាអែលបានយល់ព្រមដកកងទ័ពចេញពីតំបន់ពីរ ដោយអនុញ្ញាតឱ្យកងទ័ពលីបង់គ្រប់គ្រងតំបន់ទាំងនោះ និងអនុវត្តវិធានការ ដើម្បីដកហូតអាវុធពីក្រុមហេសបូឡា៕

សម្រួល៖ ណឺ មិនា