អ៊ីរ៉ង់គំរាមបិទផ្លូវទឹកសំខាន់ៗទាំងអស់ ដែលផ្ដល់ប្រយោជន៍ឱ្យអាមេរិក និងសម្ព័ន្ធមិត្ត ​

អង្គភាពឆ្មាំបដិវត្តន៍អ៊ិស្លាមអ៊ីរ៉ង់ (IRGC) បានព្រមាននៅថ្ងៃពុធនេះថា ខ្លួននឹងបិទ​គ្រប់​ផ្លូវទឹកទាំងអស់ «ដែលផ្ដល់ប្រយោជន៍​ឱ្យ​សហរដ្ឋអាមេរិក និងសម្ព័ន្ធមិត្ត» ខណៈភាពតានតឹងកើនឡើង ដោយ​​អាមេរិក​ប្រកាសបិទផ្លូវទឹកអ៊ីរ៉ង់ ហើយអ៊ីរ៉ង់ប្រកាសបិទច្រកហ័រមូហ្សជាថ្មី។ នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ។

IRGC បានប្រើពាក្យ «ច្រករបៀងនាំចេញ» ដែលសំដៅលើច្រកដឹកជញ្ជូនសំខាន់ៗក្នុងតំបន់ ហើយបានបញ្ជាក់ក្នុងសេចក្ដីថ្លែងការណ៍ថា «គ្រប់ប្រទេសទាំងអស់ត្រូវតែអាចនាំចេញថាមពលបានដូចគ្នា បើមិនដូច្នោះទេ គឺគ្មានប្រទេសណាមួយអាចនាំចេញបានឡើយ»។

ការព្រមានរបស់អ៊ីរ៉ង់ធ្ងន់ៗបែបនេះ ធ្វើឡើងខណៈអ្នកវិភាគជាច្រើនជឿថា អ៊ីរ៉ង់អាចប្រើក្រុមប្រដាប់អាវុធ​ហ៊ូទីនៅយេម៉ែន ដើម្បីបិទច្រកសមុទ្រ បាប អែល ម៉ាន់ដេប (Bab el-Mandeb) ដែលតភ្ជាប់សមុទ្រក្រហម ទៅឈូងសមុទ្រអេដីន​។ ច្រកសមុទ្រនេះ គឺជាផ្លូវ​ដឹកជញ្ជូន​ប្រេងរបស់អារ៉ាប៊ីសាអូឌីត និងទំនិញពិភពលោកដ៏សំខាន់ ដែលតភ្ជាប់អាស៊ី និងអឺរ៉ុប។

កាលពីពេលថ្មីៗនេះ មន្ត្រីជាន់ខ្ពស់របស់ក្រុមហ៊ូទីក៏បានព្រមានផងដែរថា ពួកគេ​កំពុងត្រៀមបិទច្រក បាប អែល ម៉ាន់ដេប ប្រសិនបើអារ៉ាប៊ីសាអូឌីតដែលជាសម្ព័ន្ធមិត្តរបស់អាមេរិក បន្តវាយប្រហារ​លើ​យេម៉ែន ​ដែល​អាចធ្វើឱ្យតម្លៃប្រេងឡើងដល់ ២០០ ដុល្លារ/បារ៉ែល។

គេមើលឃើញថា ស្ថានការណ៍នៃជម្លោះអាមេរិក-អ៊ីរ៉ង់ កាន់តែតានតឹងដោយភាគីទាំង២ វាយប្រហារគ្នាទៅវិញទៅមក។

​អាមេរិកអះអាងថា អ៊ីរ៉ង់បានវាយប្រហារនាវាពាណិជ្ជកម្មចំនួន ៧ គ្រឿងក្នុងរយៈពេល ១ សប្តាហ៍ បណ្តាលឱ្យមានអ្នកស្លាប់ បាត់ខ្លួន និងរងរបួសជាច្រើននាក់។ អ៊ីរ៉ង់​ឯណោះវិញថា ការវាយប្រហាររបស់អាមេរិកក្នុងប៉ុន្មានថ្ងៃចុងក្រោយនេះ បានសម្លាប់ជនស៊ីវិលយ៉ាងហោចណាស់ ៣០ នាក់ និងទាហាន ៧ នាក់។

ជាមួយនឹងការគំរាមបិទ «ច្រករបៀងនាំចេញ​ទាំងអស់» IRGC ក៏បានប្រកាសថា ច្រកសមុទ្រហ័រមូហ្ស ​នឹងបន្តបិទ «រហូតដល់ទីបញ្ចប់នៃអំពើអាក្រក់របស់អាមេរិក»។ មុនពេលសង្គ្រាមផ្ទុះឡើង ការដឹកជញ្ជូនប្រេង និងឧស្ម័នប្រមាណ ២០% នៃពិភពលោក ឆ្លងកាត់ច្រកសមុទ្រនេះជារៀងរាល់ថ្ងៃ។

ជាការសងសឹក IRGC អះអាងថា ខ្លួនបានវាយប្រហារលើទីតាំងយោធាអាមេរិកនៅបារ៉ែន គុយវ៉ែត និងហ្ស៊កដានី ខណៈគុយវ៉ែត និងហ្ស៊កដានីបានរាយការណ៍ពីការវាយប្រហារ និងការស្ទាក់បាញ់មីស៊ីលចេញពីអ៊ីរ៉ង់។

​ដោយឡែកប្រធានាធិបតីអាមេរិក លោក ដូណាល់ ត្រាំ ឯណោះវិញ បានព្រមានថា នឹងវាយប្រហារលើរោងចក្រថាមពល និងស្ពានរបស់អ៊ីរ៉ង់នៅសប្តាហ៍ក្រោយ ប្រសិនបើ​អ៊ីរ៉ង់មិនព្រមវិលត្រឡប់ទៅកាន់តុចរចា។ លោកបាននិយាយថា៖ «ខ្ញុំនឹងទុកគោលដៅថាមពលជាគោលដៅចុងក្រោយ ប៉ុន្តែទីបំផុត យើងនឹងវាយប្រហារគោលដៅថាមពល»។

​គួរគូសបញ្ជាក់ថា កំណើនភាពតានតឹងនៃជម្លោះ​ កំពុង​ជំរុញឱ្យតម្លៃប្រេងពិភពលោក​ឡើងថ្លៃជាថ្មី ខណៈមានការព្រួយបារម្ភថា ការរំខានដល់ច្រក​ហ័រមូហ្ស និង បាប អែល ម៉ាន់ដេប ​អាច​រំខានយ៉ាងខ្លាំងដល់ការផ្គត់ផ្គង់ថាមពល និងពាណិជ្ជកម្មសកល រួមទាំងការបង្កើនតម្លៃដឹកជញ្ជូន៕